Read Gangte SOLOMON LA 5 Bible Online

SOLOMON LA 5 - Gangte bible

SOLOMON LA 5

¹Ka huon a ka luta, ka suohpihnu, ka lawinu, Ka murra ka gimlimte tawh ka lakhawm a, ka khuoizu chuh a phâng pum in ka ne a, ka uain ka dâwn a, bâwngnawi tui tawh; Guolte haw, neu inla, dâwn un; hehpihna chuh kham hielin ta’n un,

²Ka ip a chuh ka lunggil vang a hak zing hi, ngaitie, ka deihtak in kawt a hung kiu hi! ei hawn sak in tin, ka suohpihnu, ka hehpih, ka vakhu, ka demna bei, ka luchang chuh dâitui in a chêk zo ta a, ka baksam chuh zan dâichîm chun a chêk zo tai.

³Ka puonâkchung ka suoh tai, bangti’n ka âk kit die? ka keng ka sil tai, bangati a sunîn kit ding ka him?

⁴Ka ngaihzawng chun a khut in ahun sawk a, kawtkhak âwng ah, ka sunggil thuk pên amah ngaiin a kilîng hi.

⁵Ka deihtak chuh kawt hawn dingin ka tho a, ka khutzungte chuh murra ah ka dieh a; ka khutzung te chuh murra a chekin, kawt kamna bawk chuh ka vak tu a.

⁶Ka deihtak a ding chun ka hawng ta a, mahleh ka deihtak chuh a na chiehmang tai, a paukam ka tha’n a thuok zo puoi: Ka hawl viela, mahleh ka mu puoi, ka uou a, mahleh ei dâwng puoi.

⁷Khawpi venga vak vielte’n ei muu a, ei zêp u a, ei suliem tau a, kulh vengte chun a hâwk ui, ka silhpuon.

⁸Ka hun ngên hi, aw Jerusalem chanu te, ka deihtak chuh na muh u chun, hehpihna a damlo ka hi tih amah chuh ana hilh un.

⁹Na deihtak chuh mi deihtak sangin bang ahi chuom a ahi? Aw numei lak laka hawihpen, Na deihtak sangin mi deihtak chuh bang ahi chuom hi? Khutibang lâwm lâwma nei nget chuh?

¹⁰Ka deihtak chuh a ngo a, asan mâm hit het ahi a, sangsawm lak ah a chungnung pên hi.

¹¹A luchang chuh sana thiengtho bang ahi a, a sam kaitha chuh a bawk pha a, va-âk bangin a vawm zîn zên hi,

¹²A mit haw chuh vakhu, luicha panga chuh, bâwngnawi a sawp thien, kituok taka chu tawbang ahi.

¹³A bieng haw chuh gimlim bawm, hampa gimlim suoh sek tawbang ahi a; a mûk haw chuh lili pak murra tuia sukchêk tawbang ahi.

¹⁴A khuthaw chuh suongmantam a zem sana zungbuh tawbang ahi; a taksa chuh saiha sapphire a zem tawbang ahi.

¹⁵A kênghaw chuh suong vam khuom, sana geikuok a kituoh bang ahi. A mel latdan chuh Lebanon tângpi sidar thing hawih pên pente tawbang ahi a.

¹⁶A kamsuok chuh a thum pena, ahi, a deihum bukim kei hi; zie hi ka deihtak chuh ahi a, zie hi ka guol deih chuh ahi; aw Jerusalem chanute haw.