Read Gangte SOLOMON LA 6 Bible Online

SOLOMON LA 6 - Gangte bible

SOLOMON LA 6

¹Na deihtak chuh khawia chieh ahi tam, Aw numei lak laka hawihpen? Khawilam ah ahim na deihtak chuh a kihei? Ei hilh in, keihaw’n le ka hun hawlpih theihna dingun.

²Ka deihtak chuh a chieh suk tai, a huon pak gimlim kehna muna chun, huon a gan guol tat sak ding leh lili pak lo dingin.

³Ka deihtak a chuh ka hi a, ka deihtak chuh keia ahi, a ganguolte chuh lili pak lak ah a tat sak sek a.

⁴Na hawih na e, aw ka deihtak, Tirzah bangin, na ngaihkai a, Jerusalem khawpi bangin; sepaihhawn puonlap bangin na lauh-um hi.

⁵Na mit heimang tan, kei apat in, ei zo ta ngâl u a. Na sam chuh, kel hawn, Gilead tângpanga kum suk dip dip a bang hi.

⁶Na hate chuh belampi guol sil zawh tung bang chuh ahi; amau chun phîk a hing chiet u a, a laku ah a chîng a um puou.

⁷Na bieng chuh vaimimthei phel abang hi, na maikhuhna sik achun.

⁸Lengnu sawmgup leh mei sawmgiet a um u a, suok nungak simsenlohte tawh.

⁹Ka vakhu, ka demna bei nu, khat mai ahi, A nu chanu neihsun, a hingnu lunglam tak ahi. Numeite’n amah a muu a, hampha a sau a; ahi, lengnu leh a meite’n le a pakcha sek ui.

¹⁰Kuo ahim zing khawvak hawih banga hung lang khah, sawltha banga hawih leh chung sunni bang thieng a, sepaih hawn puonlap haw khâi banga lauh-um kha?

¹¹Makha huon ah ka va chieh suk a, guoma thil phuh hing haw chuh en ding leh, grep guihaw chuh a sel tam, vaimimthei chuh a pak tam ti a en dingin.

¹²Ammi-nadib kangtalai haw ah, ka hetloh kâl in ei na kawih, ka tha chun.

¹³Hung kihei kitin, Hung kihei kitin, aw nang Shulam mi, hung kihei kit in, hung kihei kit in, ka hun et theihna dingun. Sepaih lamte tien nih kikala et guol a bang dinga Shulam mi hi en ding ka him?