Read Gangte ISAI 10 Bible Online

ISAI 10 - Gangte bible

ISAI 10

¹Dan ningkitel um tak siem a, thupiek giksak tak ngaihtuoh dawkte haw, na chunguh a gik hi!

²Mi chagahte hung phatna ding chuh na nang chak u a, meithaite leh pa neilote thil neih na lâksak u a.

³Gawtna ni achun bang na hih in gamla tak apat a huihpi a hung nun tieng kuo bel ding na hi? Panpihna mu dingin khawilam ah na tai ta die? Na hauhsaknate chuh khawitak ah na selgu ta die?

⁴Kidona a thah ahim, a hihloh leh sala puih a him in um inla. Khuti khawpa a hihsa chun le LALPA lungnat chuh a hai diek puo a, gawt dingin a khut a tha zing nalai hi.

⁵Nang Asuria lengpa, ka lungnatna khetbuk, ka lunghihlohna mawlh chawipa.

⁶Gâllâk la ding leh, thil lâksak ding leh khawlai buonthuok banga tawh dingin amah chuh Pathien zahlo nam do dingin sawl ing ka ting, ka lungnatna mite do dingin thu pie’ng ka.

⁷Himahlele, Asuria leng chun a lungthim in tup dang a na nei a. Nam tamtak, duoihasana tam lo hihsiet leh sukmangthai ding chuh a lungthim in a na tup gu zing a.

⁸Chapo tak mai in, “Ka sepaih lawiupa cheng hi leng ahiu a puo!

⁹Kalno khawpite leh Hamath leh Arpad khawpite, Karkhemis te ka zo a, Samari leh Damaska le ka la ta a.

¹⁰Jerusalem leh Samari khawpite sanga milim pathien tamzaw leh, milim pathien hote mapuite lalgam haw chuh gawt dingin ka khut ka zak tai!

¹¹Samari khuo leh a milimte chunga ka hih bang khan, Jerusalem khuo leh a milim hote chunga hin le hih lo ding ka him?” a ti a.

¹²Zieziekchun hiti hi hung hi’n tin, “LALPA chun Zion tâng leh Jerusalem chunga ka nasep ding chengcheng ka sep zawh tieng, Asuria leng lunggil uong tak leh kiletsak tak chuh hun gawt ing ka,” a ti a.

¹³Amah chun, “Ka khut hatna’n ka hih ahi tai, ka chitna tawh ka ching kam ngâl a; namtin gamgite chule ka chawn a a go hawu le ka lâksak a; lalchutphah a chute chule, mi hangsan tak hih bangin ka luoi tha ta a;

¹⁴Ka khut hin chitin hauhsakna chuh vacha bu bangin ka hawl dawk a; mi’n vacha tûi a pi taihsan nung a lâk bangun lei chung luohte chengcheng hi ka la vek a; tha zap ahim, kam ka ahim, hâm gi ngam mawng mawng a um puou hi,” a ti viel ngâla.

¹⁵Himahlele, LALPA chun, “Heicha chun a mang pa chuh a uon khum dinga ahim? Thing-âtna chun a ât pa chuh a nuoisieh dinga ahim? Khetbûk in a dawm pa chuh a dawm zaw dinga ahim? mawlh in mi a mang thei puo a, mi’n mawlh a dawp zawk uh ahi ngâl a,” ti’n.

¹⁶Zieziekchun, Sepaihte LALPA chun a mi thaute laka chun natna sawl intin, a taksau chung achun meikuong zing bang hin, mei tihin um ina. Mei chuh Israel vak Pathien chuh ahi a;

¹⁷Meikuong chuh Israel te thienthona Pathien ngêi chuh ahi; zie chun ni khat thu’n hamlingnei leh khau leh thil chengcheng chuh katum ina.

¹⁸A gammâng leh a lei pha gahsuohna chuh sukmangthai vek hi’n tin, natna lauh-um takin mite a sukmangthai mah bang hin, LALPA’n a tii.

¹⁹A gammânga thing a na umsunte chuh naupangte sim kham chauh a tawm hi ta’n a.

²⁰Zie ni chun mi tawmcha mai vaikit un au. Israel te a na umsunte leh, a suokcha sunte chun amau haw sumangthaite chuh gingcha ta puou untin, Israel Mi thiengtho chuh tihtakzet in gingcha zaw ta’n au.

²¹A na damsun, Jakob te a na um sunte chuh; Pathien Hat tak kawm achun vaikit un au.

²²Na mi Israel te chuh tuisuohgiet pîlnel zah in um mahleu, nutsieh a umsunte chuh vaikit ding ahi ngâl u a; sukmangthaina chuh tung tei dinga guotsa ahi ngâl a.

²³LALPA, sepaihte haw LALPA chun, tawpna, tung ngêi dinga guotsa chuh, lei chung pumpi achun hun tunsak ding ahi ngâl a.

²⁴Zieziekchun, LALPA sepaihte LALPA chun Zion a umte kawmah, “Aigupta gama a hun bawl bang u khan, khetbuk a hun khên in, a mawlh chuh na chungah lek mahleh, Asuria mite chuh lau kiu in.

²⁵Chawmlo kalin ka hun gawtna chuh lipthâk in um ta’ntin, amau haw chuh sumangthai ing ka.

²⁶Oreb suongpi a Midian te a thah lai u bang khan, Sepaihte LALPA chun amah gawtna dingin sepna chuh chawktho intin, a mawlh chuh tuisuohgiet chunglam ah lâm intin, Aigupta gama a lap bang khan zêp ina.

²⁷A hun a hungtun tieng chuleh, Asuria te thuneihna apat chun hun pawtdawk sak ka ting a namkawl u chuh na liengko u a ding chun puokgik hi ta puo’n a,” ti’n.

²⁸Melma sepaihte chun Ai khawpi a lau a, Migron khuo a hawhpai u a! A thuomphuo teu chuh Mikmas ah a nusieh u a!

²⁹Kawn sunga lepsuk in, Geba khuo ah a giek tau hi! Ramah khawpi a mite chuh suklauh in a um u a, Gibeah leng Saul khawpi a mite chuh a taisie tau a.

³⁰Aw Gallim khuo mite, aw ngeih tak in kiko un, aw Laish khuo ngaithau un! aw Anathoth, lungsiet na um na e!

³¹Madmenah khuo a umte leh, Gebim khuo a umte chuh taihmang guo’n a kikhawm sausau u a.

³²Tuni ngêi hin Nob khawpi ah melmate a um u a; Zion tâng, Jerusalem tângvum chuh khut a thin khum u a.

³³Sepaihte LALPA chun thingbâk satthak bangin gawt nêl intin, mi chapo pente leh sangpente chuh hihniem in, sumuolpho ina.

³⁴Gammâng lailung lai taka heicha a thing phuk guolin, LALPA’n a melmate chuh sattha vek intin, Lebanon tânga thing hawihpen pente a pukthâk bangin pûk zung zung un au.