Read Gangte ISAI 17 Bible Online

ISAI 17 - Gangte bible

ISAI 17

¹Ngaitiem u, Damaska chuh khawpi hitalo dingin lâkmang ahi tai, tichun, thilsie umkhawm lemlum bang mai hi ta’n a.

²Asuria khawpi chuh taihsan in a um tai. Belam hawnte umna mun ding mai hi ta’n tin, ziehaw chuh bawk un tin, kuoma’n delh dawk puo’n a.

³Ephraim bitna kulhpi chuh bei intin, Damaska kivaihawmna chuh tâwp ina. Suria gama a na umsunte le bei mang untin, Israel suonte bang phetin um un au, Sepaihte LALPA chun a tii.

⁴Zie ni chuleh hiti hi hi’n tin, “Jakob lopina tâwp ni chuh hungtung intin, a hauhsakna chuh chatgahna’n hun vukdim ta’n a.

⁵Tichun, buh-ât pa’n buh a ât a, a vui haw a khuta a lak bang mai hi hi’n tin, Rephaim phaizawl a buhvui mi’n a lakkhawm bang mai hi’n a.

⁶Himahleh, olive thing, lawh zawh kêi nunga, a zîk pi sangpen lêk a gah nih ahim, thum ahim leh thinggah tak mai bâk zik zum a gah li ahim, nga ahim a um sek bangin, tawmcha nutsieh in um ina, LALPA Israel te Pathien chun a tii.”

⁷Zie ni chuleh mi’n panpihtu dingin, a siempau lam nga tau untin, a mit teu chun Israel te Mi thiengtho chuh en ta’n au.

⁸Maichâm, amau haw khutsuok lam chuh nga ta puou un tin, amau haw khuta siem Asher te ahim, nisa limte ahim chuh zah diek ta puo’n au.

⁹Zie ni a hungtun tieng chuleh, khawpi dettakte chuh taihsan in um intin. Hiv mite leh Amor te’n Israel chate apat a a taihsiet lai u a, khawpi a nutsieh bang phet u khan, nutsieh in um ina.

¹⁰Israel Pathien, nang hun hukdawkpa leh, suongpi dettak guola nang hun vengbitpa chuh na hengilh ta a. A thasang in, gamdang pathien hona dingin huon thiengtho poh na kisiem zaw ta a.

¹¹Himahlele, na phuh ni’n na ûmkimvel a, zingkal leh na thil chi chuh na hih pak seka; himahleh, a gah lawh chuh lungkhamna leh natna nasa tak ni chun a beimang sek hi.

¹²Thilhihthei tak namte chuh tuipi gi leh, tui kinawk nasatak gi bangin, a buoi un, a sa vengvung u a.

¹³Namte chuh tui kinawk hattak gi hum hum guolin gi hum hum untin, himahleh, Pathien in a gai a, a vaikit u a, tâng panga leivui bang leh, chinpei in pawl a mût mang guolin nawhmang in a um tau hi.

¹⁴Nitâk lam chun, ngaitie, dipdapna, lauhthawng na a uma, himahleh, zingkal khuo a vâk masang in a mang tau hi, Zie hi kei uh ei susiete chanvo leh ei gukmang sakte chanvo le ahi.