Read Gangte ISAI 18 Bible Online

ISAI 18 - Gangte bible

ISAI 18

¹Ethiopia luipi gâl lam achun, tha kizap gi dup dup kizakna gam khat a um a.

²Zie gama kipat chun palaite chuh Nile luipi achun, luongkung a kuong kisiem chun a hung kitawl tha suk sek u a. Na In lam ah kilehkit vak un kintaka thangkote haw! Thu chuh, tuipi’n a khenzakna gamte leh, na na muh thilhih thei leh hat tak sang tak leh vun nâm hethut leh, khawvel in a kihchakteu kawm achun puou un.

³Khawvela um chengcheng leh, lei chung luohte haw, tâng hawa melchikna a takdawk tieng u leh en un; pengkun a mût tieng u leh ngaithau un.

⁴LALPA’n ka kawmah hiti hin a gen ahi: “Um hiet hiet ka ting, ka umna apat hin en zing ing ka ting, nisat lai taka khuolum thieng siu seu bang leh, buh ât khuolum laia dâichîm meizun bang hin,” ti’n.

⁵Grepte lakkhawm a hih ma leh, a paklunte a pulh zawh a, grep a min lun lai tak, chemcha hiem taka a bâk sât tan bangin, Ethiopia chuh melmate’n hun sumangthai un au.

⁶A sepaih luongteu chuh tânga vacha gawlhamte ding leh gamsate nek dinga nutsieh in um intin, tichun, vacha gawlhamte chun amau chuh nipi sungin neu intin, leichung a sa cheng chun phalbi sungin ne’n au.

⁷Zie tieng chuleh, khawvel pumpi’n a kihchak uh, vun nâm hethut leh, sang takte, nam thilhih thei tak leh hat tak te, tuipi’n a khenzak namte apat a Sepaihte LALPA’n thillat a muh hun chuh hungtung intin; Sepaihte LALPA hona mun, Zion tâng ngêi achun hung khawm un au.