Read Gangte ISAI 21 Bible Online

ISAI 21 - Gangte bible

ISAI 21

¹Ziehi Babulon chungchâng thu a thuchah chuh ahi: Simlam a chinpei a chiehpai bangin, gamgaw apat in, nam lauh-um tak apat chun a hung hi.

²Kilâkna lungkham um tak ka kawma het sak ahi tai; lepchieh taka hihpa chun, lepchieh takin a hih a, hihsie sekte chun a hihsieu hi. Elam sepaihte chun a do u a! Media sepaihte chun khawpi chuh a sim tau a! Babulon te’n gimtheihna a bawlteu chengcheng chuh ka suhai vek tai.

³Zieziekchun, ka kawngte hi natna nasa takin a dima, numei nauhanat guolin natna’n ei man ta a; bil a khuo za theilo khawp in natna ka thuok a, khaw mu theilo khawp in ka lungzîng a.

⁴Ka lung a vai a, lau in ka kithing ta a. Nitâk ni nêm ka ngaklah sek kha kei dingin kithinna a hung suok ta a.

⁵Kilâkna ka muhna achun, guolvakna a guonggalh zo tau a; puon phah chuh malzinte chutna dingin a kiphah a. A neu in, a chau a, hatkhat in thupiek a hun gen dawk u a: “Miliente haw, na phawteu guonggalh vak un,” a tiu a.

⁶LALPA chun ka kawmah hiti hin a gen a, “Chieh inla, gâlvengpa kawih in; amah chun a thilmuh chuh hun gen hen.

⁷Sepaih hawnte, sakawl chung chuong, a kawp kawpa chiehte, sabiltung hawnte, sangawngsau hawnte, a muh chun guntaka et phat ding ahi,” ti’n.

⁸Chun, amah chuh sakeibaknei guolin a kiko a: “Hepu, sun leh gâlven bûk chunga hin ka ding zing a, zan khuovak vakin ka venna muna hin ka um zing sek a.

⁹Ngaitie! thakhat in, mihing hawn, sakawl chung chuong, a kawp kawpa chieh a hung ui,” ti’n. Amah chun, “Babulon khawpi chuh a chim tai! A chim tai; a pathien uh, milim siemkawmte chengcheng chuh lei ah suknel in a um tai,” ti’n a dawng a.

¹⁰Ka mi Israel te haw, buh guola thehzak in na um u a, himahlele tuhin, Israel Pathien, sepaihte LALPA apat a ka chanchin pha het chuh na kawm u ah a hun phuong tai!

¹¹Edom chungchâng thu chuh: Mi’n Edom tâng apat in ei sama, “Gâlvengpa, zan hi bangtik leh a bei die? Gâlvengpa, zan hi a bei vak ta die, ei hilh in,” ti’n.

¹²Gâlvengpa chun, “Zingkal hi ding ahi tai, himahlele, zan hungtung kit ding ahi. Na dawt kit nawp u chun, hungkit unla, dâwng un,” ti’n.

¹³Ziehi, Arabia chungchâng thu chuh ahi: Aw Dedan te sangawngsau te haw, Arabia gama gamnuoi a giekte haw!

¹⁴Dangchâkte kawm achun tui pieu inla. Tema gama umte a an un gâltaite chuh ana dâwn u a.

¹⁵Chemzâm apat chun a taimang u a, chemzâm zûk dawksa apat ngêi chun, chun, thalpi zuk salsa apat leh kidona nasatak apat a taimang ahi ngâl u a.

¹⁶LALPA chun hiti hin ka kawmah a gen a, “Kithalawh kum sima kum khat sungin Kedar lopina chengcheng chuh mang zo intin.

¹⁷Kedar mi hangsan, thalkap thiem umsunte chule tawmcha hung hi’n au, LALPA Israel Pathien chun zie chuh a gen ta ngâl a,” ti’n.