Read Gangte ISAI 25 Bible Online

ISAI 25 - Gangte bible

ISAI 25

¹Aw LALPA, nang chuh ka Pathien na hi a; Hun limbawl ing ka ting, na min pakcha’ng ka. Thilmak tak, malai pek a na guonggalhte chuh ginum takin na hih ta ngâla.

²Khawpite chuh leisai kawih vum maimai na suoh saka; kulhpi nei khuo le khuo sie nung na suok sak veka; gamdang mite leng In le bangmah lo na suok saka, bangmah tika sakkit hita puo’n a.

³Zieziekchun, nam thilhih thei takte chun, hun limbawl un tin; Nam gilo takte khawpi chun hun lau ta’n au.

⁴Mi chagah leh panpih beite dingin bitna kulhpi na hi a; a lungzînnau achun a bit u a; Guohpi huihpi lak a kiselnau na hi a, nisa nuoi a lîm uh na hi ngâl a. Mi gilote chun phalbi huihpi guolin a nam u a;

⁵Mun gaw a khawlum na sukhaih guolin, gamdang mite thawm chuh subei inla; khawlum chuh meipi’n a lieh guolin mi nunsiete thawm chuh na sudai ta a.

⁶Zie tâng ahin sepaihte LALPA chun khawvel a namtin dingin nek ding phapen leh sathau lim pên a guolvakna, theng leh thau leh uain phapen a guolvakna siem intin.

⁷Chun, zie tâng mah ahin, namtin chunga lungkhamna meipi um chuh, thakhat in hâwkdawk sak intin; thihna chuh kumkhuotuong a dingin valh zo ta’n a.

⁸Tichun, thihna chuh a valh den ta a, LALPA Pathien chun mi cheng cheng chuh a mitthiu thiekhul sak ta’n tin; mite zahchâkna chuh leichung pumpi apat in lâkmang sak ta’n a. LALPA ngêi chun a gen ta ngâl a.

⁹Chun, zie ni chuleh, “Entiem u, zie hi I Pathien uh ahi! Amah chuh ka na ngak uh a, ei hukdawk theih na dingin. Amah chuh LALPA chuh ahi! Amah chuh ka taksang uh a, ei hukdam tâk ziekin, a hukdamna ahin tuhin kipâk in lawp hitiu,” ti’n au.

¹⁰Zie tâng ahin LALPA khut chuh kinga’n tin, himahlele, Moab chuh kawkhuk a buhpawl chilgawp bangin tawh den in, chil gawp in a.

¹¹Tichun, tuizap te’n tuizap dinga a khut uh a zak guol un alak u ah theihtawp in khut zak zak untin, himahleh, Pathien in a chaponau chuh tawhden tho tho ding ahi.

¹²Chun, a kulhbang sang tak teu chuh sukchim hita’n tin, leituol ah, leivui lak ah tawhden in um in a.