Read Gangte ISAI 3 Bible Online

ISAI 3 - Gangte bible

ISAI 3

¹Ngaitiem u, LALPA sepaihte LALPA chun, Jerusalem leh Juda mipite ki-ngakna a nek leh dâwn uh, a matchâk chengcheng leh a set pên uh tui cheng chuh lâksak ding ahi;

²Sepaih hangsan leh kido thiemte tawh vaihawm haw leh thiemgau leh phunsân thiem leh upate tawh,

³sawmnga chunga lawiupa leh, mi zahum leh, lemguotthiem leh mitvaidawi thiemte cheng chuh ladawk ding ka hi, a tii.

⁴Tichun, a chung u a vaihawm ding chun naupang kawih ing ka ting, chun, nausente chun a chung u ah vaihawm in au.

⁵Khutichun, mite chuh kisugimthei tuoh un tin, mitin a guolte leh a invengteu tawh kisugimthei tuoh un au; khanglaite chuh upate chungah zahlo takin um un tin, mi manloh te’n le mi zahumte chuh zah diek puo’n au.

⁶Mi’n a suohpihpa kawmah, “Nangin silhlechen na nei a, ka vaihawmpau in pang inla, zie sietna hi na khut ah um hen,” a tihna niu hungtung ina.

⁷Zie ni chuleh amah chun, “Sudamtu’n pang thei puo’ng ka, ka In ah nek ding leh silhlechen a um puoh ngâla, mipite vaihawm dingin ei siem ki’n,” ti’n dâwng ina.

⁸A lopina mit tunsak dingin, a kamsuok u leh a thilhih u chuh LALPA deihloh lam ahih ziekin Jerusalem chuh a sie zo a, Judate chuh a puk zo ta ngâl a.

⁹A langkaihnau in amau haw a hêk kawm ngâl a, a gitlohnau chuh Sodom guol zetin a latsak uh a, a sel puou hi. A chung uh a gik hi, thil phalo in a kidinthuk kawm ngâl u a.

¹⁰Mi diktat ding chun thil hung pha ding ahi a, a sep dawk gahteu chuh ne ding ahi ngâl u a.

¹¹Mi nunsie chung chuh a gik hi! Bang tienga vangsie ahi tau em! A khut thilhihte chun ditthukna chuh mu ding ahih ziekun.

¹²Ka mipite haw, a sugimtheite chuh naupang te ahiu a, a chung u a vaihawmte chuh numeite ahiu hi. Aw ka mipite haw na lawiupateu chun a hun puikhiel tau a, na chiehna ding u lampi na he thei ta puou hi.

¹³LALPA chuh genpih dingin a kisazo a, mipite vaihawm sak dingin a hung ding dawk ta a.

¹⁴LALPA’n upate leh a mite chunga lawiupate chuh vaihawmna ah a hun pui a, “Grep huon susie chuh nanguh na hiu a; na Inteu chuh mi chagahte apat na thil lâkteu chun a dim hi!

¹⁵Ka mipite tuola tawh den a, mi chagahte maichang na gawih nêl u hi bang na tihnau ahi? Sepaihte LALPA chun a tii.”

¹⁶LALPA chun, Zion chanute chuh kilek takin a um u a, dâk vul vul in a chieh u a, utcha taka mitsik-ât dieu dieu kawmin kal a suon gi tut tut u a.

¹⁷LALPA’n Zion chanute lusip achun meimasie um sak in tin, a zahmawh teu le hâwkdawk sak ina, a ti a.

¹⁸Zie ni chuleh LALPA chun a sana kicheina teu chuh lâksak ina, kenga buh haw, samlen haw, hakchau te,

¹⁹bilbah kitul gieh giehte, chaucha te, ngâwng-awh te,

²⁰luchang kânna te, kengbuh thik kikuoituohte, kawnggakte, gimlim bawmte, kivenna haw;

²¹min namna zungbuh te, nak a vawh chi te,

²²kut ni a kivanna haw puonâk chuol te,

²³lim-et te, patngatpuon te, diel te, kichei hawihna puon, a luchang u a a kawihteu chule la mang vek ina.

²⁴Tichun, gimlim a mat sekteu sang chun thil uih um intin, kâwnggak thasang chun khauhuol um ta’n tin, chun, sam bawk phatak thasang chun thik âm a deh sietna um ta’n a.

²⁵Na mite chuh chemzâma sat puk in um un tin, mihatte chuh kidona a thah in um un au.

²⁶A kulh kawtkhakteu achun a âwm uh kichup in kap untin; khawpi chuh hawmngawn a um in, leituol ah chu’n a.