Read Gangte ISAI 33 Bible Online

ISAI 33 - Gangte bible

ISAI 33

¹Ehe! nang suom tuokkhalo pi a, mi suoma pang, chitgil taka bawl tuokkhalo pi a, chitgil taka thilhih, na chung a gik hi! Mi suom na haih tieng leh suomna hun tuok in na tin, chitgil taka hih na haih tieng leh chitgil taka bawl in hung um inla.

²LALPA, ka chungu ah zahngai in, nang ka hun ngak zing ngâl u a; zingkal chenga ka bit nau hi’n la, buoina apat in ei hukdawk in.

³Kido thawm gi ziekin, mipite chuh a taimang sek u a; na lopina masang achun namte chuh a kithehzak sek ui.

⁴Na gâllâk sum lak ding haw chuh lungmul in thil a nawhkhawm supsup guolin thak khawm in um un tin; khaupe a chawp kalh lak lak guolin amau chu chawmkalh sausau un au.

⁵LALPA chuh a lopi na e! Thil bangkim chungah thu a nei a. Zion chuh thudik leh dikna’n a hih dim ta a,

⁶Amah chuh na hun leh phat kingakna, hukdamna buting, chitna leh hetna haw um kihkeih ina. Tichun, LALPA limbawl chuh a gochan hi ta’n a.

⁷Ngaitie, mi hangsante chun panpihna a ngên tau a. Kichamna siem guo a gam palaite chuh hah kah in a kap u a.

⁸Lam tuongpite chuh a thip zên zûn a, khuolzin te chun a hawh ta puou hi. Kichamna thugawlhte chuh suksiet leh mat loh in a um a; thutiem haw chuh bangmah lo a ngaih ahi tai,

⁹Gam chuh a kap in a chul zo ta a; Lebanon gammâng chuh zakcha’n a vuoi ta a, Sharon phaicham chuh gamgaw a suok ta a, Bashan leh Karmel chun a nah hing cheng a thingtha zo tai!

¹⁰LALPA chun, tuhin vang kipan ing ka ting, tuhin limbawl in um tang ka ting, tuhin limbawl in um tang ka.

¹¹Buhsi chuh nau guolin vawp in na tin un, buhpawl hing un lau; na huu a na hat u chuh nang hun katum ding mei ahi.

¹²Mipite chuh sunu-suong kihal tawbang hin na tin uh, lingbuk kisattha a kihal vam bang hi’n lau, a ti a.

¹³Nang uh gamla taka umte haw, bang thil ana hih ka him tih ngaihtuoh un la; nang haw a nai a umte chun le ka thilhih theih dân chuh ana heu in.

¹⁴Zion a mi gilote chuh a lau tau a, Pathien neilote chuh lau in a kithing sie tau a “Zie tawbang mei mi kangtum thei lak ahin kuo a ding zo ding? Zie tawbang mei kumlekhuo a kuong zing apat hin kuo a hing dawk thei ding?” ti’n.

¹⁵Kuole thil dik hih a, thudik gente, mi gimtheite min a lawkna deihlo a, gawlhgukna lak sanga a khut thinkhum a; thisan suohna ding thu zak loh na dinga a bil him a; chun, thil phalo en lo dinga a mit vengpha te chuh,

¹⁶Zie tawbang mite chuh chunglam ah cheng un tin; a kiselnau chuh suongpi kulh hi’n tin, a nek dinguh piek hizing un tin, a tui dâwn dinguh kang ngei puo’n a.

¹⁷Na mit in leng hawih na chuh mu’n tin, gam lien tak leh gamla taka kithun chuh hun mu’n la.

¹⁸Gamdang mi sieh lakhawmte leh gam entha, na lauhte chengcheng kha malai chang zo ta’n au.

¹⁹Gamdang mi, gilo tak tak, pau gil tak na hettheih loh a paute, pauchuom na hettheih loh uh a paute chuh mu kit ta puo’n lau.

²⁰Ka guolvaknau khawpi Zion chuh entie! Na mit haw chun Jerusalem chuh en un! Chenna dinga bitna mun pên hi ta’n tin. Puon-In, a kilhna bawhdawk khâk loh leh, a kaihmalhna khau tan ngeilo tawbang hi ta’n a.

²¹Zie tak achun LALPA lui lien tak tak leh lui neu haw um chêkchûk na mun chuh, lopi takin I kawm u ah um zaw’na; zie tui chung achun kidona lawng lienpi a zapna nei chi himhim chieh puo’n tin, lawng lien tak tak haw’n le chieh pel puo’n a.

²²LALPA chuh I vaihawmpau ahi a, LALPA chuh dân ei piepa ahi a; LALPA chuh I leng uh ahi a, amah chun ei hukdam ina.

²³Na khau haw chuh hihkawl in a um a, a puonzak khuomteu chuh ahih det thei puou a; puonzak chuh a zak thei puou hi, zie lai tak chun gâllâk sum tamtak chuh hawp in a um a; zie tak achun kêngbâite’n le chanvo a nei ui.

²⁴Zie khuo a um chun “Ka dam puoi” ti um ta puo’n tin, a sunga mi umte chuh a gitloh uh ngaihdam hi ta’n au.