Read Gangte ISAI 38 Bible Online

ISAI 38 - Gangte bible

ISAI 38

¹Zielai chun Hezekia chuh thih ngam in a na a. Tichun, Amoz chapa, thiemgau Isai chuh a kawmah a hung a, a kawmah, “LALPA chun hiti hin a tii, ‘Na insung hih tup in, thi ding na hi ta a, dam dawk talo ding na hi,’ a tii ti’n ava hilh a” a ti a.

²Ziephet chun, Hezekia chuh bang lam nga’n a kihei a, LALPA kawmah a paucham ta a,

³“Aw LALPA, na ma a thutak leh lunggil pha bukima ka um sekte leh, na mitmuh a thilpha chauh ka hih sek ziete kha lungsiet takin hezing in,” a ti a. Tichun, Hezekia chuh a kap hup hup maia.

⁴Khutichun, LALPA thu chuh Isai kawmah ahung tunga,

⁵“Chieh inla, Hezekia kawmah gen ah, Na pu David Pathien, LALPA chun hitihin a tii, Na pauchamna kha ka na za a; na mittuite le ka mu a; ngaitie, na damsung hi kum sawm leh kum nga behlap ing ka.

⁶Chun, nang leh zie khawpi hi Asuria leng khut apat in hukdawk ing ka ting, zie khawpi hi humbit ing ka.”

⁷Chun, “LALPA’n a thutiem chuh na chungah hih ngêi ding ahi tih melchikna chuh ziehi ahi.

⁸Ngaitie, leng Ahaz In a hunbi tiemtehna chuh kalbi sawm in kinungchawn sak kit ding ka hi” a ti a. Khutichun, nisa chuh hunbi tiemtehna achun kalbi sawm in a kinungtawl ta a.

⁹Juda leng Hezekia chuh a natna apat a a dam dawk kit nung in, zie pahchakna la hi a zik a:

¹⁰“Ka damsung hun hawih lai tak hin, thân kawtkhak achun lut ding ka hi a; Ka kum um nalaite hile Sheol kawtkhak a mang zo mai ding ka hi ta die aw!

¹¹Mihing gam ahin LALPA chuh mu talo ding ka hi a; Khawvela cheng mihingte hi mu kit talo ding ka hi hi,

¹²Ka hinna hi belampute puon-In guol a phietthâk a um in, puongante’n puonkawl a ziel bangun ka hinna hi ka ziel a; puonkawl apat a âttan bangin, sun khawvak apat zan thim laka puihlut ka hi ta hi, ka ti a.

¹³Zan khawvak in panpihna ngenin ka kiko a, Sakeibaknei in ka guhte a sukgawp bang mai in, sun cheng leh zan chengin ka hinna bei zieng dingin ka ngaihtuoh a.

¹⁴Gamvatawt leh muvanlai bangin ka tau a; vakhu bangin ka mau ka mau a, Chunglam thîlna’n ka mit a vai zo ta a; Aw LALPA sukgimtheih in ka um a, nang chuh ka bitna hung hi’n.

¹⁵Himahleh, LALPA’n ziehi a hih ta a, banga ka gen theih ding? ka hin haksat bek ziek khan, ka damsung kum um nalaite a chun awlcha cha’n chieh dên dên tang ka.

¹⁶“Aw LALPA, zie bang thil ziek hin mihingte hi a hing sek uh a, zie tak mai achun ka thagau hinna chuh a um sek hi; Zieziekchun, ei hihdam kit inla, nanga ding mai in hing ing ka ting, nang ding chauh in ei hihdam inla, ei hinsak in.

¹⁷Ka gimtheihna chengcheng kha thamuonna a suok ta a, Lauh-umna apat in ka hinna na hukbit ta a, ka gitlohna chengcheng na ngaidam ta ngâl a.

¹⁸Thân hin a hun pakcha thei puoh ngâla, thihna hinle ahun limbawl thei diek puoi; Sheol a kum sukte chuh na ginumna achun a kinga thei diek puou hi.

¹⁹Tuni a ka hun pahchak bang hin mihing, a hingte chauh in a hun pakcha thei uh ahi. Pate chun chate chuh na ginumna na hilh sawn un au.

²⁰LALPA! nei sudam ta a, kingkangte tawh la sa’n, hun pakcha’ng ka ting, Ka damsung chengin na Ho-In a chun na pahchak na la sa’ng ka,” ti’n.

²¹Chun, Isai in, theipi gah apat a siem damdawi nuhthawh chuh a uilut a belh a hung dam ding ahi ti’n leng chuh ana hilh ta a.

²²Ziephet chun, leng Hezekia chun, “LALPA In ah chieh kit tei ding ka hi tih melchikna ding chuh bang ahi die?” ti a ana dawtsa ahi.