Read Gangte ISAI 43 Bible Online

ISAI 43 - Gangte bible

ISAI 43

¹Himahleh, Aw Jakob, nangmau haw hun siempa, Aw Israel nangmau haw hun dindawk pa chun hiti hin a tii, “Lau kiu inla, ka hun tandawk ta ngâl a. Na min un ka hun sam ta a, Keia na hi tau a puo!

²Tuite na palkaih tieng u leh, kei na kawm u ah um ing ka ting; luipite na palkaih tieng uh lele, na buoinau chun hun chup puo’n a. Mei a na chiehpai tieng u lele, hun katum puo’n tin, meikuong in hun ka diek puo’n a.

³Kei hi LALPA na Pathien uh, Israel Pathien Thiengtho, nanguh hun hukdampa ka hi ngâl a. Nanguh hun puih dawkna dingin Aigupta te mang ing ka ting, Ethiopia leh Seba gamte chuh nang u dingin hun pie’ng ka.

⁴Aziek chuh, ka mit muh a lul tak leh zahum tak na hiu a, nanguh ka hun lungsiet a, ka hun hehpih ziekin nanguh sika thuok dingin nam dangte ka piedawk a; na hinnau thatheng in namte chuh ka piedawk tai.

⁵Lau kiu inla, na kawm u ah ka um ngâl a! “Na suonteu chuh suohlam apat in hun pui ing ka ting, tumlam gam apat in hun puikhawm ing ka.

⁶Mâllam kawm achun, ‘Thahdawk un,’ ti’ng ka ting; sim lam kawm achun, ‘Hên ta kiu,’ ti’ng ka; Ka chapa chuh gamla tak apat in hun pui inla, ka chanute chuh kâwlmawng tâwp apat chun hun pui un, ti’ng ka.

⁷Ka minpu mimal tin te chuh, ka lopina dinga umlo apat ka um sak leh ka guonggalh leh ka siem na hiu, hun ti ding ka hi.”

⁸Mit nei ngâla mu theilo leh bil nei ngâla za theilote chuh hun puidawk un!

⁹Namte chuh hung kikhawm u hen la, chitin a mite chuh hung kikhawm tau hen. A lak u ah kuo a zie thu hi genlawk thei leh tunung thil ding a genlawk thei um? A diknau hetpih dingin hetpihtu hun pui u hen la, a thugen u chuh a dik ngêi hi tih phuong u hen.

¹⁰Nang u haw hi Kei ei hetpihte na hiu a, ka suokte hi dinga ka hun tel na hiu a, Khutia chuh nei hetuh a, nei ginchak uh a, Kei mai hi Pathien ka hi tih na hêtchet theihna dingun, LALPA’n a tii. Kei tih loh pathien dang himhim a um puoh a, um le um ngei puo’n tin, hung um kit diek puo’n a.

¹¹“Kei, Kei mai hi LALPA chuh ka hi a, Kei tih loh Hukdampa dang a um puoi.

¹²Na lak u a pathien dang a um loh ziekin; Keimah ngêi in ka phuonglang a, ka hukdam a, ka taklang ta a; khutichun, nang haw chuh ka thu hetpihte na hiu hi, LALPA’n a tii.

¹³Kei hi Pathien ka hi a, nisa um a kipat khan kei hi Amah chuh ka hizing hi; Ka khut apat in kuomah a tai dawk thei puou a, kuoma’n ka thilhihte le a sang thei diek puou hi,” ti’n.

¹⁴Israel Mi Thiengtho, a hun Tandawkpa chun hiti hin a tii, “A hun tandawk dingin Babulon achun sepaihte ka sawl a; khawpi kulh kawtkhakte chuh hihsie’ng ka ting, a Kaldai te kiko thawm chuh kahna suok ina.

¹⁵Kei hi LALPA, na Pathien Thiengtho uh, Israel te siempa leh na leng u chuh ka hi,” ti’n.

¹⁶Tuipi ah lamlien a siem a, tui hat lak a lampite gawlh pa chun hiti hin a tii,

¹⁷Sepaih leh sepaih hawn lopi takte chuh sietna ah a pui a, sakawl leh kangtalaite sepaih haw ngêi chuh, a puk u a, thokit nei ta puo’n au! khuoilu thaumei mût mit banga mût mit in a um tau hi,

¹⁸Himahlele, LALPA chun hiti hin a tii, Tuma thilte hezing ta kiu inla, malai thilte chule ngaihtuoh diek ta kiu.

¹⁹Ngaitiem u, thil thak hih ding ka hi; tu apat hin a dâwn dawk ngâl ta a, zie chuh mu thei lo na hiu em? Gamthip a le lampi siem ing ka ting; gamgaw achun luipi te hun luon sak ding ka hi.

²⁰Ka mi, ka telte ei pahchaknau sulang dinga kei dinga ka mi siemte chuh tui dâwn ding ka piek theih na dingin thaleka tuite ka um saka.

²¹Gamgaw a chuh tui haw ka um sak ziek leh lui haw ka luon sak ziekin, gamsa haw chun le ei zah untin, si-alhaw, vangawngsau ten le ei limbawl tan au.

²²Aw Jakob te, khutisa chun le nang u vangin nei sam ngâl puou a, Aw Israel, nei chimchâk zaw bawn u a.

²³Hâlmanga na thillat teu chun, belamno nei hun chawih sak ngei puou a; Na kithawihnateu chun la, nei limbawl diek puou hi. Thillat hun ngêk in, ka hun sugiksak ngei puoh a, Gimlim hâl dingin le ka hun suchawl kha diek puoi.

²⁴Keia dingin gimlimte na chaw kha puou a, na kithawihnau gan thau in nei hih tai kha diek puou hi. Na gitlohnau ziekin puokgik nei puoksak zawu a, Na manlohnateu ziekin nei sulungkham zawu ahi.

²⁵Kei, keimah ngêi hi ka hi ka min zieka na bawhsietna teu hun thaimang sak pa chuh ka hi; Na gitlohna teu chuh hezing ta puo’ng ka.

²⁶Mawh ei chansak un la, ngaihtuoh khawm hitiu; na diknau chuh het a hih theihna dingin na thuu chuh gen un.

²⁷Na pileputeu khan thil a na hihkhiel tau a; Nanguh hun sinsak te’n le ka chungah thil a na hihkhiel tau hi.

²⁸Zieziekchun, mun thiengtho a na leng chate chuh hih buok ing ka ting, Tichun, Jakob te chungah sietna huoisie tak ka tun saka; Israel chule sukmuolpho in a um tau hi, ti’n.