Read Gangte ISAI 44 Bible Online

ISAI 44 - Gangte bible

ISAI 44

¹Himahleh, tuhin ka suok Jakob, ka mi telte Israel suonte haw ngaithau in!

²LALPA nangmau hun siempa, sûl apat a nanguh hun tungdawkpa, nanguh haw hun panpih ding chun hiti hin a tii. Aw Jakob, ka suokte na hiu a, nanguh Jeshurun haw ka mi telte haw, lau kiu in.

³“Dangchâk na gam achun tui hun pie’ng ka ting, gamgaw achun luicha luon sak ing ka. Na tu leh chateu chung achun ka thagau sung tha’ng ka ting; na suonteu chunga le ka vangsakna sungtha’ng ka.

⁴Tichun, tui laka hampa guolin kekdawk untin, lui luong panga huisumte bangin duoh un au.

⁵“Mi khat hung in tin, ‘LALPA a ka hi hi,’ ti’n. Israel mipite chun hun zuon untin, midang in Jakob kiminvawh intin; chun, midang in a ban u ah, ‘LALPA a’ tih zik intin, Israel chuh a nam min dingun hun mang ta’n au.”

⁶LALPA, Israel mipite Tandawkpa leh vengpa, Bangakai hihthei LALPA chun hiti hin a tii, “Kei a Masapen leh a Nunung pên, Pathien khat chauh ka hi a. Kei tihloh Pathien dang himhim a um puoi.

⁷Ka thilhih bang hi mi dang kuo a hih thei ding? Kuo a thil abul apat a a tâwp ding chan genlawk thei? Ei hilh u hen.

⁸Ka mite haw, lau kiu in! Malai apat in tuni gei hin thil hungtung dingte ka genlawk puoh a ahim? Nang haw hi ei hetpihte na hiu hi tih na he ngâl uh a. Pathien dang a um himhim em? Ahi, Pathien dang himhim a um puoh a, khat chale a um lam ka he puoi,” ti’n.

⁹Milim pathien siemkawm te chuh bangmahlo ahiu a; a thil deihlam teu chuh phatchuomna um diek puo’n a. Zie tawbang pathien hote chuh mitdûk leh bangmah helo ahiu a, hung muolpho tei ding ahiu hi.

¹⁰Kuo ahi bangmah phachuom lo pathien kisiem a, ahihloh leh, kuo ahi bangmah phachuom lo milim kisun kawm lâwm lâwm?

¹¹Ngaitie, kuole a ho taphawt chun muolphona tuok un tin; a siemte chule mihing mai ahiu a, bangmahlo ahiu hi. Hung u hen la, patep in um leu, suklauh in um untin, zahhuoina tuok vek ding ahiu ui.

¹²Thik sêk pa chun a cheimawi sek a, meihawl lak achun a gawlh lut a, a bân tha hattak chun sek in a susek a, thil lim khat a hun sek dawk sek hi. A nasep lai chun a gil a hung kiel a, a hung chau seka, tui a dâwn loh ziekin a sawlsam sek hi.

¹³Thingkuong siempa’n tehna khau a luoi sal a, a tiemteh a, thing nawtna’n a nawt guol a, thil tehna’n a latdan ding a siem a, mihing lim in, mihing hawihna guolin a siem a, a milim pathien In a kawih dingin a siem sek hi.

¹⁴Sidar thing ahim, a hihloh leh gangpi thing ahim leh, gammânga thing chi khat poh a mang sek a. Thing gimlimte phut in, a khan sak dingin guoh tui a ngak sek hi.

¹⁵Tichun, zie thing chuh mi’n tih dingin a mang sek uh a, khenkhat chuh milim pathien in a siem u a, a ho sek u a. Khenkhat chuh amah kisuklum na dingin mei in a tik sek a; khenkhat chuh pathien in a siem a, a masang achun bawkkhup in a ho sek hi.

¹⁶Thing danghaw chun sa a em a, a ne a, a tai mah mah sek hi. “Mei a awi a, a nuom in a lum na e!” a ti sek hi.

¹⁷Thing dang cheng chun milim a siem a, a bawkkhup a, a ho sek hi. A kawmah a paucham a, “Ka pathien na hi, ei hukdam in,” a ti sek hi.

¹⁸Zie tawbang mi chuh mingawl, a thilhih uh bang ahih helote ahiu ui. Thutak lam achun a mit u leh a lungthim teu a sudûk sek ui.

¹⁹“A kimkhat thing in ka tika, a mei-âm chung ale chângthâk ka kang a, sa le ka em a, ka ne ta a; Tuhin, a dang cheng chuh kihdak-um takin ka siem hilo ahim? Thing bawng khat âng a khupdin mai ding ka him?” tih ngaihtuoh a, hethiem leh hetna nei khat chale a um puou hi.

²⁰A vutte chuh na ne a, na ngawl dân chuh, na ngawl taluo a, panpih theih nei puoi. “Ka khuta milim pathien ka chawih hi pathien ei hiel puoi,” na ti nuom diek puoi.

²¹“Aw Jakob te haw, zie thil haw chuh hezing un; ka suokte na hiu a; ken ka hun siem na hiu a, ka suokte na hiu a, Aw Israel, hun hengilh ngeilo ding ka hi.

²²Na bawhsietna teu chuh meipi sah lieiluoi bangin ka mût mang ta a; ka kawmah hungkit un, nang haw hun Tandawkpa ka hi ngâl a,” ti’n.

²³Aw vante haw, kipâk takin la sau in, LALPA’n zie chuh a hih ta ngâl a, Lei mun niem pente haw hung kiko dawk un, tângte leh gammâng thingte haw, la sa dawk un: LALPA chun Jakob te a tandawk ta a, Israel te haw achun kisulopi ding ahi ngâl a!

²⁴LALPA, nanguh hun Tandawkpa; sûl apat nanguh hun siempa chun “Kei hi LALPA, thil chengcheng siempa ka hi, kei chauh a van zak palh a, kuomah panpih loh a leisiet siempa chuh ka hi!

²⁵Kei hi mi lepchieh te subuoi a, phunsân thiemte sungawl a; aksi apat a thil genlawkte bangmahlo chansak pa ka hi. Miching te thugen haw ka hih dika, a chitnau chuh ngawlna ahi tih ka latsak ta a.

²⁶Himahleh, ka suokte chun thu a genlawk uh a, ka thil guonggalh genlawk dinga mi ka sawl chun, ka thil guonggalh leh a genlawkteu chuh ka hih guitung sek hi. Jerusalem chuh mite hun luoh kit ding leh, Juda khawpite tun dawk kit ding ka gen a, zie khawpite chuh a sietna apat a tundawk kit dingin.

²⁷Chuleh, tuili thuk tak kawmah ‘Hung kang tan inla, na lui liente chuh hih kang vek ding ka hi,’ tih leh,

²⁸Kura kawm achun, ‘Amah chuh belam chin a ei chingpa ahi a; amah chun hih ding ka tih cheng chuh hih buting ina,’ tipa leh Jerusalem chungchâng a ‘Tundin a um kit ding na hi,’ tih leh Temple chungchâng a ‘Na suongphumte lem thak a um kit ding ahi,’ tipa chuh ka hi,” ti’n a gen ta a.