Read Gangte ISAI 45 Bible Online

ISAI 45 - Gangte bible

ISAI 45

¹LALPA’n Kura chuh leng dingin a tel ta a. Nam lien takte zo dingin a tel a, lengte thuneihna lâksak dingin a sawl a; tichun LALPA’n khawpi kawtte chuh amah a dingin hawng ina. LALPA chun Kura kawm achun,

²“Keimah ngêi in na lampi ding guonggalh ing ka ting, muol leh tângte hihguol ing ka ting, thikdai kawtte chuh hihsie’ng ka ting, a thikzawlte chuh sugawp ing ka.

³Kei hi LALPA na min a hun sampa leh, Israel Pathien chuh ka hi tih na hettheih na dingin thim laka go thil kiselgute leh ning thip a go kisel gute chuh hun pie ding ka hi.

⁴Ka suok Jakob leh ka tel chuom Israel te zalin, na min in ka hun sam dawk ta a; Nangin ei he kimahleh chin le, limbawlna lopi tak ka hun piek na hi.

⁵“Kei hi LALPA ka hi a, Pathien dang himhim a um puoi; nangin ei helo mah leh chin le, hatna hun pie ding ka hi.

⁶Ni suohna lama mite leh, tumlam geia mite’n Kei hi LALPA chuh ka hi tih a het theihna dingun leh, Keilo chuh Pathien dang him a um puoi tih a het theihna dingun zie hi ka hih ahi.

⁷Vak ka na siem a, thimna hi ka um sak ahi a, Vangsakna leh vangsietna le ka hun tun gêl gêl a hi ngâl a. Kei LALPA hin zie thilte chuh ka hih ngêi ahi.

⁸Aw Vante haw, chunglam a kipatin guoh bangin hung zuu in, chun, van apat in diktatna chuh guoh bangin hung zu henla; lei in a kam ka henla, hukdamna chuh hung kikhawh dawk henla; chamna leh diktatna um tan a; Kei LALPA hin zie chuh umsak ing ka.”

⁹Lei bel chun a siempa chuh a niel dinga ahim? Leibel in a dengpa kawmah, Banga na siem? Na nasep in hih theih a nei puoi, a ti dinga ahim?

¹⁰A pa kieng a, “Bang zieka hitibang ahi nei hin ahim?” tite leh a nu kienga “Bang dinga nei na hin ahim?” tite chuh a chunguh a gik hi.

¹¹LALPA Israel Pathien Thiengtho leh, tunung thil ding guonggalh pa chun hiti hin a tii, “Ka chate chungchâng ei dawng a, ka nasep ding ei hilh ding na hi a ahim?

¹²Kei hi leisiet siema, a sung a mihing cheng te siempa chuh ka hi. Ka thilhih theihna’n vante khu ka zak palh a; a sunga umte cheng cheng hile kei thupiek a um ahiu hi.

¹³Keimah ngêi in, thutak leh ka thiltup te subukim dingin Kura chuh ka chawktho a. A chiehna lam chengah pui lamzang ka ting; Ka khawpi chuh tungding kit intin, ka mi saltângte chuh hun thahdawk ding ahi. kuoma’n kipahman a pie puou a, a thilpiek le a pie diek puou hi,” ti’n Bangakai hihthei LALPA chun a gen tai.

¹⁴LALPA chun Israel te kawmah, “Aigupta hauhsakna leh, Ethiopia hauhsakna chuh nang haw a hung hi’n tin; Sheba mi sangte chuh na suok un hung um untin, kawlbut pum in hun zui un au; na masang u ah bawkkhup in kiphuong untin, ‘Pathien in a hun umpih a, nanguh kawm chauh ah Pathien a um a, kuomah dang kawmah a um puoi,’ hun ti’n au.

¹⁵Nangmah ngêi chuh amah leh amah kiselgu Pathien tak tak chuh na hi, Israel Pathien, a mite Hukdampa ngêi chuh!

¹⁶Milim pathien kisiemte chuh hung zakchau un tin, a bawn un buoina achun lut khawm vek un au!

¹⁷Himahleh, Israel chuh LALPA’n a hukdam a, a zawhna chuh kumlekhuo’n um in tin; a mite chuh muolpho in um ngei puo’n au,” ti’n.

¹⁸LALPA chun vante hi a siem a, amah chuh Pathien ngêi chuh a hi! Leisiet hi a siem a, a din a, a hihdet a. Mawk um mai dingin a siem puoh a, mihingte chênna dinga a siem ahi. Amah chun, “Kei hi LALPA chuh ka hi a, Pathien dang himhim a um puoi, a ti a.

¹⁹Thim lak ah a gûkin thu ka gen puoh a, ka thiltup te le ka selgu diek puoi. Jakob suonte chuh bangmah um lohna mun ei hawl dingin ka ti ngei puoh a. Kei LALPA chuh ka hi a, thudik tak ka gen sek hi,” ti’n.

²⁰Namtin laka suokcha sunte haw, hung khawm unla, ei hun naih tiem u! a suokcha sunte haw, nangmau haw chiet ki-enchien dingin hung khawm un! Thing milim siemkawm kichawih a, hukdam theilo hiel pathien kawma paucham te chun bangmah a he puou ui!

²¹Hung u henla, a chanchin uh hung gen u hen, a panpihteu chule kidawng tuoh uh hen la; Kuoa tumasang a thil hungtung ding genlawk sek? A mite hukdawk sek chuh Kei LALPA Pathien hi hilo ka him? pathien dang himhim a um puoh ngâl a.

²²Khawvela ning tin apat ka kawmah hung unla, hukdam in um un. Kei hi Pathien ka hi a, a dang himhim a um puoi.

²³Ka thutiem chuh a dik a, kisang ngeilo ahi. Mitin cheng chuh ka masanga hung khupdin un tin, keia dinga ginum dingin, keimah kama ngêi in ka kipautiem ta ngâla.

²⁴“LALPA chauh ah dikna leh Hatna a um hi,” ti’n gen un tin, himahlele, kei ei do taphawt chuh vang muolpho un au.

²⁵Tichun, Israel suonte chengcheng chuh LALPA achun guolzo un tin, tichun, LALPA suong ding ahiu hi, ti’n.