Read Gangte ISAI 46 Bible Online

ISAI 46 - Gangte bible

ISAI 46

¹Bel chuh a khuntha suk a, Nebo chun nuoi lam a en tai! A milim pathien teu chuh a ganchateu leh ganguol haw a puoksak u a, zie thil haw chuh a gancha thachawlte dinga puokgik maimai ahi tai.

²Amau chuh a chutha suk u a, a khuntha khawm tau hi. A puokgik u apat a kihukdawk thei puou a, amau ngêi chuh sala puihmang in a um tau hi.

³Aw Jakob insung mite leh Israel insung a nutsieh a um tawmchah te, gilpi apat a ka puok a, sûl apat a ka kipawlpihte haw, ka thu hi ngaithau in!

⁴Na Pathien uh ka hi a, na hung têk u a, na sam hawu a kan gei in hun enkawl ding ka hi. Ka siemsa na hiu a, hun enkawl ka ting; hun panpih ka ting, hun humbit ing ka.

⁵Nangun kuo tawh nei tehkal ding u? Kuo tawh kibanga nei kawih uh ahi? Kuo tawh nei teh u ahi?

⁶Mite chun a dangka dipteu hawng in, sanate a bun dawk sek uh a; a dangkaguoteu chuh a tehdawk sek uh a, tichun, pathien siem dingin dangkaguo sêkte a guoi sek uh a; chun, a masanga khupbawk in a ho sek u a!

⁷A liengko u a kawih dawkin a puu a, mun khat ah a kawih uh a; zie chun a ding a, himahleh, a umna mun apat chun a kichawn thei puoi. Mite’n amah chuh sam mahleu, a dâwng thei puoh a, a buoinau apat in le a hukdawk thei diek puoi.

⁸Nang haw mi gilote haw, ziehi hezing unla ngaihtuoh unla, Ka thilhihte hi geldawk un.

⁹Tuma lama thil ana umsa te kha hezing unla, Kei hi Pathien ka hi a, Kei tawbang hi kuomah a um puoi.

¹⁰A bul apat a tâwp tienga thil hung um dingte ka na genlawk a; tuma apat in thil hungtung dingte ka na genlawk tai! Ka thil guonggalh te chuh lawhsam ngei puo’n tin, Ka thilhih guotte le hih buting ngêi ing ka, ka ti a.

¹¹Suohlam apat a mi hung dingin ka sama, Mu bangin hung leng suk un tin, Ka thil gente chuh hun hih bukim in a. Ka guonggalh zo ta a, hihin um ngêi ina.

¹²“Hukdawkna hi gamla taka um banga gelte leh; mi gukhahte haw, ei na ngaithau in!

¹³Zawhna ni chuh hun hih nai ka ting; gamla lo hiel ding a hi! Ka hukdawkna ni ding chun sawt hal ta puo’n tin; Zion chuh hukdawk ing ka ting, tichun, Ka lopina, Israel te dingin hukdamna chuh Zion achun kawih tang ka,” a tii.