Read Gangte ISAI 48 Bible Online

ISAI 48 - Gangte bible

ISAI 48

¹Nanguh Jakob insung mite leh Israel mipite, Juda suona mite haw, ziehi ngaithau in! Israel Pathien chuh ka ho ui, ti’n LALPA min in na kipautiem u a himahleh, thudik leh tih tak takin na hih puoh ngâl uh a.

²Khawpi Thiengtho a mi, a min Bangakai hihthei Israel Pathien chunga ginna ngate ti’n na kisuong mah mah uh a.

³LALPA chun Israel te kawmah, “Tuma lam apat in thil hungtung dingte ka na genlawk a, tichun, thakhat in ka tunsak a.

⁴Mi genhak na hiu a, na ngâwng u chuh kahpathik banga khauh leh na chalpâng u chuh sumeng banga tâk ahi tih ka het ziekin.

⁵Zieziekchun, tuma lam apat in na masang uh a, thil hungtung dingte ka na genlawk a; na milim pathienteu leh, milimte hih a hi na tih lohna dingun, a hungtun ma pek apat in ka gen ta khah!

⁶“A thil genlawkte chengcheng kha tuhin a tungkim ta a; ka thugen chuh a dik hi ti lo ding na hiu em? Tuhin, thil thak hungtung dingte hun hilh ing ka; tumasang a ka na suklat khâk ngei loh chuh!

⁷Ziehaw chuh tuhin ka hih ta a, tumasang in zie tawbang chuh a na um kha puoi. A na um kha hile chuh, Ka hetsa vek uh ahi, ti ding na hi ngâl uh a.

⁸Mi genhakte ti a heta um zing na hih ziekun, gingcha puo’n lau tih ka he him hi. Ziehaw chuh na bil u a a lut khâk loh ziekin, ziehaw hi na helo him uh ahi.

⁹“Ka min pahchak a a um theihna dingin, ka lungnat chuh dieh tadih ing ka ting; Ka hun sukmangthai lohna dingin, kizuk kit ing ka.

¹⁰Entie, ka hun thit thieng na hi ta a, himahleh, dangkathîk sukthien tawbang hilo in. Gimtheihna meikuong a laka ka hun patep na hi.

¹¹Keimah a ding chauh in, ka thilhih hi ka hih a; Ka min hi sukminsiet in umsak ding ka him? Ka lopina chuh mi dang kawmah pie lo ding ka hi,” ti’n.

¹²Aw Jakob leh, ka tel chuom Israel, ana ngaitiem u! Kei hi Amah chuh ka hi a, amasapen leh a Nunung pên chuh ka hi.

¹³Ka khut hin leisiet kingaknate hi ka siem a; ka khut changlam in vante khu ka zak palh a; amau chuh ka sap tieng leh, a ngaitha sek ui!

¹⁴Na bawn un hung khawm unla, ngaithau un! Ka mi teldawkpa chun Babulon do intin; hih ding ka tihte chuh hih ina tih pathien dang khatcha’n le a genlawk thei puou ui.

¹⁵Kei, keimah ngêi hin thu ka gen ta a, ka na sam ta a; amau chuh ka puidawk a, a chiehna lampiu achun lawhtit sak zel ing ka.

¹⁶“Tuhin ei hun naih unla, ka thugen hi zau in! Atûng apat khan langsal takin zie thu haw hi ka gen ta a, Ka thugente chuh ka suguitung zel sek hi,” ti’n. (LALPA chun a thilhih theihna chuh ei pie a, ei sawl ta a.)

¹⁷LALPA nang haw hun hukdampa leh Israel Pathien Thiengtho chun a gen a, “Kei hi LALPA na Pathien uh, na phatna dinguh a hun sinsakpa, Na chiehna dinguh lampi a hun puipa chuh ka hi.

¹⁸“Ka thupiek a na ngaitha hita leu chin, luicha tui kangtheilo guolin vangsakna chuh hungtung ding hita a!

¹⁹Na suonteu chuh luipi pîlnel banga tamin um untin; chun, na suonlepak teu chule suongchang guola tam hung hiu in tin, amin u chuh thaihmang hita puo’n tin, ka masang apat hin sukmangthai in um ta puo’n au,” ti’n.

²⁰Babulon apat in pawtdawk unla, Kaldai te chuh taihsan meng un! kipâk taka kiko in, “LALPA’n a suok Jakob a hukdawk tai” ti’n kâwlmawng tiengin kiko unla, va phuongzak un.

²¹LALPA’n a mite gamlum leh thalek gamgawa a puih lai khan; dangchâk in a thuokgim ngei puou a; Amau haw dingin suongpi ah tui a pawtsak a, suongpite hihphel in tui a kichikdawk ta a.

²²“Mi gilote ding in bitna himhim a um puoi,” LALPA’n a tii.