Read Gangte ISAI 49 Bible Online

ISAI 49 - Gangte bible

ISAI 49

¹Nang haw thielkal a chêngte leh namte haw, ka thu hi a na ngaithau in! LALPA chun sûl apat in ei sam ta a; Ka nu sunga ka um lai in ka min ana sa tai.

²Ka kam chuh chemzâm hiem tak guolin a siem a; amah khut lim ngêi achun ei na selgu a. Thalpi chang banga hiem in, mat dingin ei na siem ta a.

³Tichun, ka kawmah, “Israel nang chuh ka suok na hi a, nang ziekin mitin in ei pakcha ding ahiu ui,” ti’n.

⁴Kei chun la, “Hahpi’n ka semgim a, himahleh, bangmahlo a hi tai! Ka hatna cheng ka mang zo ta a; himahleh, bangmah ka hih dawk diek puoi,” ka ti a. Khutisa chun le LALPA chuh ei panpih dingin ka muong a, ka nasep man chuh ei pie ngêi ina.

⁵Chun, a nasem dinga sûl apat a ei siem LALPA chun, Jakob te a kawma puikit ding leh Israel chate chuh a kawma puikhawm ding ahi a, LALPA mitmuh a limbawla ka um theih na dingin, LALPA chuh ka hatna bulpi ahi ngâla.

⁶LALPA’n ka kawmah, “Jakob namte tundin na ding leh Israel chate laka bitna a um kitna dinga suok a ka hun siem hi thil neucha ahi; Jentel te salhvak dingin le hun guot ing ka ting; khutia chuh ka hukdamna hih kâwlmawng tieng ale atun theih na dingin” a ti a.

⁷LALPA, Israel Tanpa leh Pathien Mi Thiengtho, a mite nasa taka muhsit a um leh, namte muhdah a umte vaihawm sakpa suok chun hiti hin a tii. “Lengte ‘n na pawt muu untin; ding dawk untin; miliente’n le hun hun chibai hun bûk un au,” ti’n.

⁸LALPA chun hiti hin a tii, “Hun kipah-um ah ka hun hungaih a, Hukdam na ni ah ka hun panpih hi, a tii. Ka hun vengbit a, chun, mipite tawh thugawlh banga ka hun piek na hi; gam chuh tundin kit ahih a, gam âwng haw chuh hawpzak ahih theih na dingin.

⁹Suongkultângte kawm achun, ‘Hung pawtdawk un!’ na tih a, thim laka umte kawm chun, ‘Vak ah hung dawk un’ na tih theih na dingin. Amau chun lampi vel chun nek ding kimuh un tin; tânggaw châk haw achun a kivakna dinguh hamhing um ina.

¹⁰A gil uh kiel ta puo’n tin, a dang uh châk diek puo’n a; huihlum in a sugimthei in, nisa’n ka diek ta puo’n a, amau haw lungsietpa chun puihuoi intin; tichun, lui luong pang haw achun pui intin, tui nak nei mun haw achun pui ding ahi ngâla.

¹¹“Tichun, tâng lien takte kantan in lam tuongpi siem ing ka ting, ka mite zin vielna dingin lamliente siem ing ka.

¹²Entie, ka mite chuh gamla tak apat in hung untin; mâllam leh thanglam apatte leh, simlam a Sinim gam apatte’n hung ding ahiu ui,” ti’n.

¹³Aw vante haw, kipaka lasa’n kiko unla, Aw leisiet lâwpin kiko un, tângte chun lasa dawk u hen la; LALPA chun a mite a thamuon ta a, Gimtheihna thuokte chung achun zahngaihna latsak ding ahi ngâl a.

¹⁴Himahleh, Zion chun, “LALPA’n ei taihsan ta a, ka LALPA chun ei hengilh tai” a ti a.

¹⁵LALPA chun a dâwng a, “Numei in a cha nawichep lai chuh hengilh in, a sûla pieng a chapa chuh lainat lo in a hengilh thei dem? Amau chun vang hengilh thei maithei ahiu; himahleh, ken vang hun hengilh puo’ng ka.

¹⁶Jerusalem, hun hengilh puo’ng ka, na min chuh ka khutpêk chunga zik ahi ngâl a.

¹⁷“Na gam âwng leh luoh loh a umte, mat loh a umte chuh na chênna dingun neu taluo ta ding ahi. Nanguh hun valh zote kha gamla taka um ta ding ahih ziekun.

¹⁸Dâk dawk inla, en kimvel in, Na mite chuh kikhawm khawm in, In lam a hun zuon tau hi; LALPA chun, ka hinna sâlin ka gen hi, amau chuh sana kicheina banga namat dinguh ahi a; monu sana a kivan banga kivanna a na mat dinguh ahi, a tii, ti’n.

¹⁹“Na gam chuh suksiet leh nutsieh in a um ta a; himahleh, a cheng dinga hungte dingin tuhin neu taluo ding ahi tai. Nanguh hun susiete kha gamla taka chawnmanga um ding ahi ta ngâl u a.

²⁰Ni khat tei chuh, sala na umnau a pieng dente chun na kawm u ah, ‘Zie gam hi a neu taluo a, chênna dingin gam lienzaw I pawimawh ui’ hun ti ding ahiu hi.

²¹Zie phat chuleh, na lunggil un, ‘Zie naupangte haw hi kuo’n ei hinsak a hi die aw! Ka chate cheng ka mansak a, ka nei ta puoh ngâl a. Sala puih leh delh manga um ka hi a, zie naupanghaw hi kuo’n a vak let a hi ding u?’” ti’n la.

²²LALPA Pathien chun a mite kawmah, “Namte chungah ka khut zak ing ka ting; tichun, na chapateu chuh In lam ah hun pui un au.

²³Tichun, lengte chun na chateu chuh dâwn un tin; lengnute chun le na chateu enkawl un au. Amau haw chun maia lei si’n chibai hun bûk un tin, na kêngpêk u a leivui chuh liek un au. Tichun, Kei hi LALPA chuh ka hi tih hun he ta’n au; kuole ka panpihna ngakte chuh muolpho in um puo’n au,” ti’n.

²⁴Sepaihte khut apat in gâllâk thilte chuh na la thei dinga ahim? Mi hangsan in suok dinga a puihte chuh na chuhtha thei dinga ahim?

²⁵LALPA chun a dâwng a, “Zie thil ngêi chuh ahi a hungtung ding chuh, Sepaihte’n suongkul a a khumteu chuh puihdawk in um un tin, migilo gâllâkte chuh mat in um ina. Nang hun dote chuh do ing ka ting, na chate chu hukdawk ing ka.

²⁶Nang haw hun bawl gimtheite chu amau leh amau kithah tuoh sak ka ting; lungnatna leh tuolthahna thisan chun uain guolin dâwn kham un au. Khutichun, Kei hi LALPA, nang haw hun hukdawkpa leh, Jakob mihat chuh ka hi tih micheng in he ta’n au,” ti’n.