Read Gangte ISAI 52 Bible Online

ISAI 52 - Gangte bible

ISAI 52

¹Aw Zion, halh in, halh inla, na hatna chun kivan in, Na silhlechen hawihtak chun kivan kit inla; Aw Jerusalem khawpi thiengtho, tu apat in na sung achun zektan loh te leh mi thienglo te chuh lut ding ahi ta puoh ngâla.

²Aw Jerusalem, na chunga leivui kha thingtha’n la, tho dawk inla, na lalchutphah chungah chu’n! Aw Zion chanute haw, na ngâwng a thikkawl chuh phel thau in!

³LALPA chun hiti hin a tii, “Bangmahlo a zawk na hiu a, chun, dangka lo a tatdawk hiding na hiu hi.

⁴LALPA Pathien chun hiti hin a gena, Ka mite chuh a tûng lai khan Aigupta ah khuolzin bangin a chieh suk u a; himahleh, Asuria te chun pawngbawl in ana sugimthei u a,

⁵Zieziekchun,LALPA chun zie thu ahin bang ka gen ta die, ka mite chuh aziek beia puihmang ahiu a; a vaihawm teu chula a khuoisa-akhuoisa zieng u a; sun ni tum in ka min chuh a musit u a.

⁶Zieziekchun, ka mite chun ka min he tau intin, zie ni ngêi chun a kawm u ah, ‘Zie hin ka um hi,’ tipa hi hechien ta’n au.”

⁷Tang haw chiehkân pai a, Chanchin Pha tun a, kichamna chanchin pha hun puo a, Zawhna thu kiko pih a, hukdamna thu phuong a, Zion kawma, “Na Pathien in vai a hawm hi” tite keng chuh a hawih na e!

⁸Ngaiin, khawpi vengte chuh a kiko u a, kipâk takin la a sakhawm u a, Zion tânga LALPA a hung tieng chuleh kimaichangtuoh a mu ding ahi ngâl u a!

⁹Jerusalem, hawmngawn a um sate haw, kipaka lasa’n kiko dawk un la! LALPA’n a khawpi chuh hukdawk intin, a mite chuh thamuon ding ahi ngâl a.

¹⁰LALPA’n namte mitmuh in a khut thiengtho chuh a hun zak dawk ta a, tichun kâwlmawng tawpa cheng te’n le a hukdamna chuh mu ta’n au.

¹¹Chiehdawk un! Chiehdawk un! a sung apat hin chiehdawk un! Thil thienglo himhim chuh khawih kiu inla; kisuthiengtho un, Nang haw LALPA matchâk chawite haw, thiengtho takin um un.

¹²Kinawh taka chiehdawk ding na hi puou a; taisie a pawt ding le na hi diek puou hi; LALPA chun na mau pui ding ahi a, chun, Israel Pathien chuh na nung dal uh a pang ding ahi.

¹³Ngaitie, “Ka suokpa chun chingthei takin hih intin; amah chuh nasa taka limbawl leh chawihsân in um in tin, sang taka hung um ding ahi.

¹⁴A mel chuh a hah siet ziekin mihing mel le a pu ta puoh a, pien dân ale mihing pien dân sangin a sie zaw a, mi tamtak in mak a sak guol mah un,

¹⁵Nam tamtak in maksau in tin, lengte chule maksa’n dângtha hiel untin, a muh khâk loh u chuh muu in tin, a hêtkhâk loh u chuh he ta ding ahiu hi.”