Read Gangte ISAI 55 Bible Online

ISAI 55 - Gangte bible

ISAI 55

¹Kuole, dangchâk tapohte chuh hung unla! Zie taka hin tui a um hi. Dangka neilote haw, hung kichâwk un la, neu un; Hung unla, uain leh bâwngnawi a man beiin hung kichâwk un!

²Vahna ding hilo a, bang zieka dangka seng a, lung-awihna tun diek lo dinga bang zieka na sepgim uh ahi? Ka thugente hi gunchuh takin ngaithau unla, an pha chuh neu inla, tichun, na hinnau chuh thil thau achun lung-awi hen.

³Na bil u dawh unla, ka kawmah hung un, Ka kawmah hung unla, tichun, ngaithau in la, hinna nei un lau! Nang haw tawh kumlekhuo thugawlh siem ing ka ting; David kawma vangsakna ka tiem kha hun pie’ng ka.

⁴Ngaitie, amah chuh namte hetpih dingin ka siem a, namte puitu ding leh thupie dingin ka guot a, Amah achun ka thilhih theihna etsak ing ka.

⁵Tichun, na hêtkhâk loh gamdang mite chuh sam in na tin, nang hun helo namdangte chuh na kawmah hung tai khawm un au. Kei, LALPA na Pathien, Israel Pathien Thiengtho hin ziehaw chuh hih ing ka ting, lopina leh limbawlna hun pie’ng ka!

⁶Muh baihlam a a um lai in LALPA chuh hawl unla, a naih lai hin sam un!

⁷Migilo chun a umdan chuh haihsan hen la, mi diktatlo inle a ngaihtuohna chuh haihsan henla; LALPA I Pathien kawm uh ah vaikit hen, tichun, amah chun lungsiet intin; a na ngaidam mah mah ding ahi ngâla.

⁸“Ka ngaihtuoh nate chuh na ngaihtuoh nateu tawh akibang puoh a; Ka lampite chuh na lampiteu tawh akibang puoi,” LALPA’n a tii.

⁹“Van khu lei sanga a san zawk bangin, ka umdante hi na umdanteu sangin a sang zaw ngâla; ka ngaihtuoh le na ngaihtuohnau sangin a sang zaw ngâla.

¹⁰“Vuk leh guoh tui van apat in a hung kie a; lei a chap chek seka, tichun, chitheh pa kawmah buhchi a pie a; a nete kawmah nek ding a piek theih na dingin tui a buok a, thaichi a kehsak a, a sel sak sek hi.

¹¹Khutibang mah chun, ka kam apat a thu pawt chuh um intin, lawhsam in vaikit puo’n tin; Ka deih dante chuh subuting zaw’n tin; hih dinga ka sawlna achun lawhting zawn a.

¹²“Lawp takin pawtdawk un na tin uh; thamuong taka puihkit in um un lau. Na masang uh achun tâng lien leh tâng neute chun la sa’n kiko dawk un tin, chun, gammânga thing cheng chengte chuh kipaka kiko in khutbeng un au!

¹³Hamlingnei thasang in châk thingte kek zaw’n tin; Lingbawk thasang in vaisuoklu thingte kek zaw ta’n a. Zie chuh LALPA hetzingna, kumlekhuo a dinga melchikna satthak tâk loh ding hi’n a,” ti’n