Read Gangte ISAI 58 Bible Online

ISAI 58 - Gangte bible

ISAI 58

¹Ngeihtak in kiko inla, kilen ki’n, pengkun guolin na aw suoh vuohvuoh inla, ka mite kawmah a bawhsietnau chuh hilh inla, Jakob insung mite kawm achun a gitlohnau chuh hilh in!

²Amau haw chun ni chengin ei ho sek u a, Ka lampi thute le het a nuom sek u a; diktat taka hih leh, a Pathien uh vaihawmna haihsan ngeilo namte bangin ka kawmah vaihawmna diktak ei ngên sek u a, Pathien hun naih le a utcha sek ui.

³“Bang zieka na muh loh dinga an ka ngawlh sek uh ahi? Na hetloh dinga bang zieka kingainiem ka hiu hi? Ngaitiem u! na anngawlh niu chun nangmau haw lunglutna lam chauh na buoipih u a, na nasemteu cheng chuh na sugimthei sek u a.

⁴Kinakna leh kinielna ding leh, nunsietna khuttuma kichûm dingin an na ngawl sek u a; na awu hi chunglama zak theih ding khawp in an na ngawl kha puou hi.

⁵An na ngawlh tieng u leh, nangmau kisugimthei in, hampa vuoi bangin na luu na khun u a, saidippuon leh vut chutna dingin na phah u a. Zie chuh an ngawlh dân dik ahim? Zie chuh kipâk dingin nei ngaihtuoh um?

⁶“An ngawlh dân diktak, ka deihlam chuh ziehi ahi: Diktatlohna namkawlte leh, sukgimtheihna kawlbuh chuh phel sak unla, sukgimtheih a umte chuh thahdawk un.

⁷Eimah an mi gilkielte kawm hawp leh, gimthei kinawhdawk haw eimah In a puih hi hilo maw? Sangawn a umte puona khuh leh, eimah sa tawbang pute kawma kiselguk loh hi ahi puoh a ahim?

⁸“Zie tieng chuleh, na vak chuh zing nino suok bangin hung vak dawk intin, chun, na sukdam na chuh kin takin hung kilang intin. Nang hun hukdam dingin hun umpih zing ka ting, LALPA lopina chun na masang ah hun veng zing ina.

⁹Sukgimtheihna te, khutchal a kikawk a, pau phalote hi na lak u apat na paihmang u chun; na paucham tieng u leh LALPA’n hun dâwng in tin; panpih ngên a na kiko tieng leh, Zie hin ka um hi” ti’n a.

¹⁰Gilkielte a dinga na kiphal a, tasamte na suktai chun, na kimvela thimnate chuh sunlai bangin vak intin; na thim melmul na chuh sun tawbang hita’n a.

¹¹Chun, LALPA chun hun pui zing intin, gamgaw ale thilpha’n hun hih tai zing intin, na guhhaw le hihhat ina. chun, huon tuia chawm tawbang leh tuinak kang ngeilo tawbang hita’n la.

¹²Tichun, na mite chun malai pek a In sie ta kha tungding kit untin, a suongphum chung mah a chun sa kit un au. Tichun, nang chuh “A sietna siempha,” “Mi umna dinga lampite siemphapa” tih hung hi ta’n la.

¹³Chawlhni chuh bawhsie lo dinga, ka ni thiengtho a na deihlam hih lo dinga na kêngpêk chuh na kihei saka, chawlhni kipah-um na saka; LALPA ni thiengtho chuh na zah a, nangmah lampi hawh lo a, nangmah thu gen lo a na limbawl chun,

¹⁴LALPA chung achun kipâk in na tin, leichung a munsang haw achun hun chuon sak ing ka ting; na pu Jakob gochan thil in hun vak ing ka, LALPA’n zie thu hi a gen ahi.