Read Gangte ISAI 6 Bible Online

ISAI 6 - Gangte bible

ISAI 6

¹Leng Uzziah a thih kum chun LALPA chuh Lalchutphah sangtak leh lopi taka chawihsâna chu’n ka mu a, chun, a puonsilh mawng chuol chun Ho-In chuh a hihdim vek a.

²Chun, a kawma chun Seraf te a ding u a, tha gup a nei chiet u a; a tha nih u chun a mai uh a khuh a, a tha nih un a kêngpêk uh a khuh u a; nih chun a leng u a.

³Sepaihte LALPA chuh “A Thiengtho ie, A Thiengtho ie, A Thiengtho ie! Lei chung pumpi hi a lopina’n a dim hi,” ti’n a kidâwng tuoh, a kidâwng tuoh u a.

⁴Tichun, a kikopa kiko thawm chun Ho-In kawtkhak bul suongvuih nasan a kilîng dul dul a, In chuh meikhu’n a hung dim ta a.

⁵Ziephet chun, ken, “Mûk thienglo pu ka hi a, mûk thienglo pu mite laka um ka hih ziekin, ka chung a gik na e! a mangthai chuh ka hita hi; ka mit in LALPA, Sepaihte LALPA chuh a mu ta ngâl a,” ka ti a.

⁶Khutichun, maichâm apat chaicheh a mei-âm chawiin Seraf khat ka kawmah a hung leng a.

⁷Chun, Seraf chun zie mei-âm chun ka mûk a hun dep a, ka kawmah “Ngaitie, zie hin na mûk a sukha tai, tichun na manlohna lâkmang ahi ta a, na gitlohna le ngaihdam ahi tai,” a hun ti a.

⁸Ziephet chun, “Kuo a ka sawl ding, kuo a ei u dinga chieh ding?” ti’n LALPA aw chuh ka za a. Tichun, ken, “kei zie hin ka um hi, ei sawl in,” ka ti a.

⁹Amah chun, chieh inla, zie chite hi hilh in, “Bil in a zak chuh zau in na tin, ahin la, a ngaihna vang chuh he puo’n lau; muu in na tin, himahleh, hechien puo’n lau,” a ti a.

¹⁰Chun, ka kawmah, “Zie mite lunggil hi hih thim unla a bilteu sungawng unla, a mitteu sîn sak un; khutilochun, a mit un muu untin, a bil un zau untin, a lunggil un le heu untin, hung kihei kit untin, sukdam in um kha’n au,” a ti a.

¹¹Tichun, ken a kawmah, “Bang chan ahi die LALPA?” ka ti a. Amah chun ei dâwng a, “Khawpite hi mihing umlo hiela a hung hawma, Inte hi a cheng ding umlo khawpa, gam pumpi suksiet dimdem a a um a, a hawma nutsieh ahih ma cheng.

¹²LALPA’n mite chuh gamla taka a chawnmanga, gamsung a mun haw hi tamtak nutsieh a a hung um macheng in.

¹³A sunga mite hi sawm laka khat a um lai chanin sukmangthai zawhin um un tin! himahlele, dawl thing leh gangpi thing a kiphuk nunga a bulsum a um zing bangin, chi thiengtho chuh a bul a na um zing ina,” ti’n.