Read Gangte ISAI 60 Bible Online

ISAI 60 - Gangte bible

ISAI 60

¹Tho inla, salh vak in; na vak chuh a hungtung ta a, LALPA lopina chun a hun salhvak ta ngâla.

²Ngaitie, lei chung hi thim in khuh intin; thim sah tak chun mipite chuh khuh ding ahi a; himahleh, LALPA chuh na chungah vak intin; A lopina vak chun hun salh ding ahi.

³Tichun, na vak achun namtin hungkhawm un tin; lengte le na zingkal phal vak nino zuon in hungkhawm un au!

⁴Khawdak in la, en kimvel in! Na mite chuh a chiehkhawm u a, na kawmah a hung ui! Na chapate chuh gamla tak apat in hung un tin; Na chanute chuh nau dawnte chun hun pawm un au.

⁵Zie chuh mu’n na tin, kipâk in dim in na tin; na lungthim chuh kipâk in kithing in la. Namte hauhsakna chuh na kawmah puok in um in tin; Tuipi apat a hauhsaknate chuh na kawmah hungtung ina.

⁶Midian te gam leh, Ephah gam apat in, sangawngsau liente chuh hung untin; Seba apat in gimlim leh sanate hun puoksak un tin. Tichun, LALPA pahchakna chuh hun phuongzak ta’n au.

⁷Kithawihna dingin belamte chuh Kedar leh Nebaioth apat in na kawmah hun kai untin; LALPA sukkipahna dingin maichâm achun la’n un au. Tichun, LALPA’n a Ho-In chuh tuma sangin sulopi zaw ta’n a.

⁸Zie taka meipi banga kitawl zung zung leh, a kawtcha a vakhu a bu lam zuona leng bang mai haw khu kuote ahiu hi?

⁹Amah chun ahun limbawl tâk ziekin, LALPA na Pathien min a ding leh Israel Mithiengtho a ding chun na chapate chuh a dangkau leh sana tawh gamla tak apat a pui dingin, matheilo in tuikuol a umte chun ei ngak un, Tarshis lawngte chun masak pên hih guo’n au.

¹⁰Chun, gamdang mite chun na kulhbang teu chuh lemto kit un tin; A lengteu in na nau sem un au. Ka lungnat in amau haw ka gawt a; himahleh, tuhin ka lungsietna leh ka deihsakna sulang ing ka.

¹¹Na kawtkhakteu chuh hawnsa’n um zing intin, sun leh zan in kikhak ta puo’n a. Tichun, lengte leh namte chun a hauhsaknau hun puo lut un au; mite chun namtin sum chuh na kawma ahun chawih u a, a lengteu le ahun puih theih na dingun.

¹²Na nau sem nuom lo namte leh lalgam chuh mangthai ding ahi ngâl u a, ahi, zie namte chuh huoisie taka sukmangthai in um un au.

¹³Ka mun thiengtho cheimawi dingin Lebanon lopina chuh na kawmah hung ina, châkte, phante, châklem te chuh Jerusalem a puoklut in um un au; tichun, ka keng ngakna mun chuh sulopi tang ka.

¹⁴Chun, nanguh hun sugimthei sekte suonlepak haw chuh hung un intin; na masang u ah khupbawk un au. Tichun, a hun musitte chengcheng khan chibai hun bûk in na kêngpêk nuoi ah khun un au. Zie tieng chuleh nang chuh, “LALPA khawpi Israel Pathien Thiengtho khawpi, Zion” hun ti’n au.

¹⁵Khawpi nutsieh a um leh hawmngawn, kiheisan nung leh, muhdah um khawpi himahleh chin, lien tak leh lopi takin hun siem ing ka ting; kumlekhuo a kipah na mun in hun siem ing ka.

¹⁶Chun, namte nawitui chuh chên ta’n na tin, lengte hauhsakna achun kivak in na tin, Namte leh lengte’n hun enkawl un tin; Zie tieng chuleh, Kei LALPA hi na hukdampa leh a hun Tandawkpa, Jakob mihat chuh ka hi tih hun heta’n la.

¹⁷“Sumeng thasang in sana hun pie’ng ka ting, thik thasang in dangka, thing thasang in sumeng, suong thasang in thik hun pie ding ka hi. Nanguh hun enkawl dingin thamuonna chuh guot ing ka ting, Nasem lawiupa chuh Diktatna hih sak ing ka.

¹⁸Na gamsung achun thagum a kibawlna chuh zak hita puo’n tin; Sietna leh gawtna thawm le na gamgi sung ah zak hi diek ta puo’n a. Na kulh bâng u chuh ‘Hukdamna’ ti’n na tin, na kulhkawt te chuh ‘Pahchakna’ ti’n lau.

¹⁹“Sun laia na vak ding chuh nisa hita puo’n tin; zan a hun salhvak ding le thapi hita puo’n a; himahleh, kei, LALPA hi kumlekhuo a dingin na vak hi tâng ka ting; chun, na Pathien u chuh na lopi nau hita’n a.

²⁰A ni chuh tum ta puo’n tin; chun, na tha chule mang diek ta puo’n a. LALPA chuh kumkhuo a na vak hi ta’n tin, chun, na lungkhamna nite chuh tâwp ta’n a.

²¹Na mipite le a bawn un mi diktat hiu intin; kumlekhuo’n gam hi luoh un au. Mitin kawma ka lopina sulang dingin Amau haw chuh ka phut a, ka siem ahi ngâl uh a.

²²Na lak uh a nam neupen le nam lopi tak hung hiu in tin, nam tawmchah le nam hattak hun hi’n au. Kei LALPA chuh ka hi a, ahun hun in kin takin hih ing ka,” ti’n.