Read Gangte ISAI 61 Bible Online

ISAI 61 - Gangte bible

ISAI 61

¹Liengvaite kawma Chanchin Pha gen dinga LALPA’n thau ei nuh ziekin, LALPA Pathien thagau chuh ka chungah a um. Amah chun lunggil thasie te sudam ding leh, saltâng te kawma pawt na thu leh, suongkul tângte pawtna thu phuong ding leh,

²LALPA lungkim kum thu phuong ding leh I Pathien uh phulakna ni a tung tai tih gen ding leh lusûnte thamuon ding leh,

³Zion a lusûnte chuh vut thasanga pakchavui, lungkhamna sanga kipahna sathaute, nguoina thagau hilo a pahchakna silhlechen te a kawm u a pie ding leh, amau haw chuh diktatna thing LALPA phuh ngêi, a thil dik hih teu zieka Pathien chuh a lopi theihna dinga sawl ka hi.

⁴Chun, malaia khawpi lui siesa chuh tungding kit un tin; khawpi siesa chuh siemphau intin; khang tamtak a ana sie chuh siempha kit un au.

⁵Chun, gamdang mite chun na ganguol teu chuh enkawl untin; gamchuom mite chun na nau sem untin, Na lo teu hun bawl sak un tin, na grep huonteu hun thawh sak un au.

⁶Nang haw vang chuh, LALPA thiempute tih hung hiu in na tin uh, mite chun Pathien nasemte hun ti ding ahiu hi. Namte hauhsakna chuh chen un na tin uh, a hauhsak nau chuh na lopinau hi ding ahi.

⁷Na zahchâknau leh na muolphonau thasang in a lehnih in muu un na tin, na zahchâkna gûn u khan na chantawk u ah lâwpin lasa’n lau; zieziekchun, na gam u chuh a lehnih in luoh un na tin; kumsawt kipahna chuh nanguh a hi ta’n a.

⁸“Kei LALPA hin vaihawmna dik ka ngaina sek ngâla, diklohna leh chapona hi ka haw a. Tichun, amau haw diktatna chuh tihtakzet in a kawm u ah pie’ng ka ting; chun, kumlekhuo a thuthun chuh amau haw tawh siem ing ka.

⁹Tichun, a suonteu chuh namtin lak ah minthang un tin. Kuole, a suonteu mu taphawt chun LALPA vangsakna changte ahiu hi tih he’n au” ti’n

¹⁰LALPA achun nasa takin kipâk ing ka ting, ka lungthim le ka Pathien chung ah kipâk in a; amah chun hukdamna puon ei silh saka, diktatna puonâk chuol in ei thuom ta ngâla. moneipa chuh pakchavui a a kithuom a, mo chuh sana khite a a kichei bangin.

¹¹Lei hin a thil dâwn a suohdawk bang leh huon in asunga thaichi haw a kehdawksak bang hin; LALPA Pathien chun diktatna leh kipahna pie’n tin, namte masang achun hung khang dawk sak ding ahi ngâla.