Read Gangte ISAI 64 Bible Online

ISAI 64 - Gangte bible

ISAI 64

¹Vante khu bawtthêk inla hung kum suk mai leh chun, muol le tângte chun hun muu un tin, lau in kiko un au!

²Munphieh thing, mei in kuong puotpuot a a kâk a, mei in tui so vulvul a a kâk bangin; na melmate kienga na min suklat na dingin, na masang achun namte kilîng ding hiu a!

³Ka kinep loh hiel uh thil huoisie na hih lai khan na hung kum a, tâng te’n ahun muu a, na masangah a kithing u kha!

⁴Masang apat in mite’n nang chauh lo chuh, amah ngakte nasep sak sek nang tih loh Pathien a hekha puou a; a bil un a za kha puou a, a mit un le a mu kha diek puou hi.

⁵Nang chun lawp taka um a, diktaka hih te, na lampi haw a nangmah hun hezing sek te chuh na lawp sek a; ngaitie, nang na lungna a, kei un thil ka hih gilo u a, ziehaw achun sawttak ka na um tau a; tichun hukdam in ka um thei ding um?

⁶Ka bawn un ka na buok vek tau a, ka diktatnau cheng le puonsie nen kihdak-um tawbang phet ahi. Ka gitloh ziekun nahpa hung vuoi tawbang phet ka hi tau a, ka sukkhelhna teu chun huih guolin ei tawkmang sek hi.

⁷Tichun, na min sama nang hun tu dinga kisuhalh kuomah a um puou a, kei u kawmah na mai na sel ta a; Ka gitloh ziekun nei sumangthai ta a.

⁸Tuhin vang chuh aw LALPA, nang chuh ka pau na hi a, kei u hi bellei ka hiu a; nang chuh keihaw ei dengpa na hi. Zieziekchun, ka bawn u hin na khutsuok ka hiu hi.

⁹Aw LALPA, ka chungu ah lungna taluo ta ki’n la, ka manlohnateu hile kumlekhuo’n hezing diek ki’n. Na mipite ka hiu a, ka chungu ah zahngai in.

¹⁰Na khawpi thiengtho chuh gamgaw a suok ta a; Zion chuh gamgaw a suok ta a, Jerusalem chuh a hawm in a um tai!

¹¹Ka In thiengtho u leh hawih tak, ka puteu in a hun na pahchak seknau mun chuh meia hâl tumin a um ta a! Nuom ka sakna mun teu chuh suksiet in a um tai!

¹²Aw LALPA, ziehaw chunga chuh tawi lo a um nalai ding na him? Thip keia um in, nasa tak ei sugimthei zing dinga ahim?