Read Gangte ISAI 65 Bible Online

ISAI 65 - Gangte bible

ISAI 65

¹Ei sam ngeilo te hawl dingin ka um a, ei hawl lo te muh dingin ka um zing hi; ka min a ei sam ngeilote kawm achun, “Zie hin ka um hi, Zie hin ka um hi” ka ti a.

²Mi genhakte leh helchîng namte ding chun ni tum in ka bân ka zak sek hi; amau chun a ngaihtuoh na bang zel un lam diklo a zui u a.

³Ka masang ngêi ah ei sulungna zing uh a, huon thiengtho te achun a kithawi u a; milim pathien maichâmte achun gimlim a hâl zing uh a.

⁴Thân sung ah a chuu a, kithawihna munte achun a zan giek u a; vawksa a neu a, a belsung u achun thil tenum tincheng chuh a huon sek u a,

⁵Tichun, mi dangte kawmah, “Kiveng in la, ei hung naih kih, nang haw sang chun ka thiengtho ngâl u a,” a ti sek ui. Zie tawbang mite chuh ka nak a meikhu leh ni tum a meikuong tawbang ahiu hi.

⁶Ngaitie, ka masangah zik ahi; “Thip hiet hiet puo’ng ka ting, mahleh dinthuk ing ka, ahi, a angsung ngêi u ah dinthuk ing ka.

⁷A gitlohnau leh a pulepateu gitlohna chuh dinthuk ding ka hi. Milim pathien hona munte achun gimlimte a hâl u a, ka min a gensie sek ngâl uh a. Zieziekchun, a thilhih khelhnau bang zelin gawt ding ka hi!” LALPA’n a tii.

⁸LALPA chun hiti hin a tii, “Grep tui chuh a gah apat kithawk dawk ahi a, susie kiu in, zie chun vangsakna a um hi” a tih guol un. Ka suokte ziekin sumangthai vek puo’ng ka ting; a bawn un sumangthai lo ding ka hi.

⁹Chun, Jakob apat chikhat siem dawk ing ka ting; Juda achun a goluoh ding siem sak ing ka ting; ka suokte chuh zie chun cheng un au.

¹⁰Chun, ka mipi kei ei hawlte a ding chun, Sharon phai chuh belam hawn tatna mun hung hi’n tin, Akor guom chuh bâwng hawn giehna mun hung hita’n a.

¹¹Himahlele, nang haw LALPA nungngat a, ka tâng thiengtho Zion ngaihsak lo a, vang-etna pathien Gad leh Mini hona dawhkhâng bawla, a tupna a tun dem tih hetna dinga dawhkan a uain chawkhel a khawna sung dim sek te haw;

¹²Ka hun sap lai in nei dâwng puou a, ka hun hopih lai in le nei ngaihsak puou a, ka mitmuh in thil gilo chuh na hih u a, ka kipahpih loh thil na tel zawk ziekun chemzâm a thah in um un na tin; na bawn un zie thihna masang achun kûn un lau.

¹³Zieziekchun, LALPA Pathien chun hiti hin a tii, “Ngaitiem u, ka suokte chun vah takin ne’n tin un, himahleh, nang haw vang chuh gilkiel in um un lau; ka suokte chun tui dâwn un tin, himahleh, nang u chuh dangchâk in um un lau; ka suokte chuh kipâk takin um un tin, himahleh, nang u chuh vang zakcha takin um unlau!

¹⁴Ngaitiem u, ka suokte chun lungthima kipah ziekin lawp takin la sau un tin, nang haw vang chuh lunggil a na lungkham ziekun kap un na tin; thagau a na lungkham ziekun khuoisa vungvung un lau.

¹⁵Chun, na min u chuh hansie buok dingin ka mi tel te kawmah kawih un na tin; tichun, LALPA Pathien in hun sulum in tin; himahleh, a suokte chuh vang min dang in sam ta’n a.

¹⁶Kuole, gamsung a vangsakna ngên taphawt chun, Pathien ginum tak vangsakna chuh ngên ta’n au. Kuole, thutiemna nei taphawt chun, Pathien ginum tak min chun kipautiem untin; tuma a lungkhamna haw kha hetngilh a a um tâk ziek leh ka mitmuh apat a sel ahih tâk ziekin.”

¹⁷“Ngaitiem u, van thak leh lei thak ka siem hi! Tuma thilte chuh hetzing hi ta puo’n tin, lungthima le lut diek ta puo’n a.

¹⁸Himahleh, ka thilsiem a chun kumlekhuo’n lawp leh kipâk in um un. Jerusalem thak ka siem chuh lawpna’n dim intin; a mite le kipâk takin um un au.

¹⁹Jerusalem chung achun kipâk ing ka ting, ka mite chung ale kipâk ing ka ting. A sung achun kah thawm het hita puo’n tin, beidawng te kiko git le zak hi ta puo’n a.

²⁰A sung achun nautil a thi um puo’n tin, teksie chuh kumting takin dam untin; Kum zakhat a thi chuh lamzilh a thi a ngaih hi’n tin, migilo kum zakhat chauh dam chuh hansie dawl a ngaih hi’n a.

²¹Chun, amau chun In sau un tin, a sung ah cheng un tin, grep huonte siem untin; a gah te chuh ne’n au.

²²Midang luoh dingin In sa ta puou un tin, midang nek dingin grep huon le bawl ta puo’n au. Ka mite chuh thing bangin damsawt un tin, a sepgim gah u chuh sawttak tak chên ta’n au.

²³A thawn in semgim ta puou untin, vangsietna ding chauh in cha hing ta puou un tin; LALPA vangsakte suon ahiu a, a chateu chuh a kawm u ah um zing tan au.

²⁴Chun, hiti hi hi’n tin, amau chun ei sap masang un dâwng ing ka ting; thu a gen zing lai un ngaitha ding ka hi.

²⁵Ngei leh belamno te chuh takhawm tau intin, sakeibakneite chun bâwngchal guolin buhpawl neu intin, chun, leivui chuh gûl an hi’n a. Ka tâng Thiengtho Zion achun kisuknatna leh, kisuksietna himhim um ta puo’n a” LALPA’n a tii.