Read Gangte ISAI 66 Bible Online

ISAI 66 - Gangte bible

ISAI 66

¹LALPA chun, “Van ka chutphah ahi a, lei ka keng ngakna ahi: In bang tawbang a nei sak sak dinguh? Ka chawlhna mun ding chuh khawitak ahi?

²Zie thil haw cheng hi keimah khut ngeia ka siem ahi a! tichun, keia ahi tau hi, LALPA’n a tii. Himahleh, mi gimthei, thagau a kisik tuntun leh ka thu a kithing sek te lam chuh en zawng ka.

³Bâwngchal that chuh mihing that tawbang ahi a; belam no a kithawi chuh ui gawl âttan tawh kibang ahi a, an thillat lânte chule vawk thisan a kithawi tawbang ahi; gimlim lân chule milim pathien vangsak tawbang ahi. Ahi, amau lampi a tel zawu a; thil tenum hih teu achun a lungthim uh a kipâk sek u a.

⁴Ka sap lai khan kuoma’n ei dâwng puou a, a kawm u a thu ka gen laia kha bil a a zak loh u a, ka mitmuh a thil gilo chuh a bawl zawk u a, ka kipah loh lam thil chuh a tel ziekun, ken le amau haw thepna ding chuh tel sak ing ka ting, a lauh zawng u haw chuh a chung u ah tunsak ing ka” ti’n.

⁵Nang haw, amah kihcha a, a thu zawpte haw, LALPA thugen hi a na ngaithau in: Na suohpih teu nanguh hun hawte leh ka min zieka hun nawhdawkte chun hiti hin a tiu a “LALPA chuh pahchak in um hen” a tiu a. Himahleh, amau haw chuh hung muolpho ding ahiu hi!

⁶Ngaiun! Khawpi sunga kiko thawm nasatak khuh! Ho-In sunga kiko thawm khu LALPA’n a melmate a gawtna thawm gi ahi!

⁷Nauvei a a nat masang in nau a nei a, a nauhanat masang in chapa a nei tai.

⁸Zie tawbang thil chuh mi’n a he khau a ahim? Zie tawbang thil mu kha chuh kuo a uma ahim? Gam chuh ni khat thu’n a kisiem zieng thei em? Namte chuh mitphetkal mai in a pieng thei em? Zion chuh a nauhanat nat leh chapa hing zieng ding ahi ngâla.

⁹Pien hun tunsak ngâl in pieng dawk lo in a um ding a ahim? LALPA’n a tii. Nau pien sak ding kei hin sûl chuh ka khâk dinga ahim? LALPA Pathien in a tii.

¹⁰Jerusalem hehpih chengcheng te haw, Jerusalem chuh kipahpih unla! nang haw zie khawpi lungsiet chengcheng te chuh lawp unla! Tuhin, a chunga lungkham cheng chengte chuh kipâk un.

¹¹Tichun, lungmuonna nawitui chuh na chep u a, na lung-awih theihna dingun; chun, a lopina kiting tak chuh kipâk taka dangno keuh keuh a na dâwn theih na dingun.

¹²LALPA chun hiti hin a ti ngâla, “Ngaitie, chamna chuh luipi bangin luon sak ing ka ting, Jentel te hauhsakna chuh luicha a kuong dim zuoh zuoh bangin luong lut ta’n tin, tichun, zie chuh sen un na tin uh, a nungzang ah naupuok in hun puo’n tin, a pheichung achun kichawm kichawm inla.

¹³Nu’n a cha a lungmuon bangin hun lungmuon ing ka ting; Jerusalem achun lungmuong takin um ta’n lau.

¹⁴Tichun, zie chuh mu’n na tin na lungthim kipâk intin; na guhhaw chule ham hing guolin hing dup dup intin; LALPA khut chuh a suokte chungah a uma, a lung-awih lohna chuh a melmate chungah a um hi tih het hita’na.”

¹⁵Ngaitie, a lungnatna chuh thangtawm taka sungtha ding leh a hilhgaihna meikuong a sungtha dingin LALPA chuh mei a hung ding ahi ngâla, a kangtalai haw chuh chinpei bang mai hi’n au.

¹⁶LALPA chun mei a vaihawm ding ahi a, hinna nei chengcheng chungah chemzâm in vaihawm ding ahi. Chun, LALPA’n a thah chuh a tama tam ding ahi.

¹⁷Huon haw a kithawi dinga amah leh amah kisuthieng leh kithiensak a kizui dup dupte leh, vawksa leh thil kihdak-um te, santhim sa nete chuh mangthai khawm ding ahiu hi, LALPA’n a tii.

¹⁸A thilhih teu leh a thil ngaihtuoh teu chuh ka he vek a. Namtin leh pau tinte sam khawm ding ka hi. Tichun, hungkhawm un tin, ka lopina chuh mu ta’n au.

¹⁹Chun, a lak u ah tiemtehna siem ing ka ting, tichun, a lak u a gawtna a suokcha namte Tarshis te, Pul te, thalpi luoi zing Lud namte kawmah Tubal leh Javan te ka minthan dân za khalo leh ka lopina mu khalo tuikuol gamla taka umte kawmah sawl ing ka ting; amau chun Jentel te kawmah ka lopina phuongzak un au.

²⁰Tichun, Israel chate’n a thillat uh bel thiengtho a LALPA masanga ahun chawihlut sek bangun, LALPA kawma thillat dingin namtin apat in na suohpihteu chengcheng chuh sakawl kangtalaite leh kizawnna te, chun, sabiltung chung leh sangawngsau chung haw ah ka tâng Thiengtho Jerusalem achun hun pui un au, LALPA’n a tii.

²¹Chun, amau haw lak a khenkhat chuh thiempu dingin siem ing ka ting; khenkhat chuh Levi chi dingin siem ing ka, LALPA’n a tii.

²²“Tichun, Van thak leh lei thak ka siem ding chuh, ka ma a um zing ding ahih tâk ziekin, zie tawbang chun na suonteu leh na min u chuh um zing ding ahi, LALPA’n a tii.

²³Chun, hiti hi hi’n tin, tha thak apat tha thak kit tiengin, chun, Sabbath apat Sabbath kit tiengin, mi cheng cheng chuh kei ei ho dingin ka masang ahin hung khawm zung zung un au,” LALPA’n a tii.

²⁴“Tichun, chiehdawk sek un tin, ka chunga kiphinte luong chuh mu sek un tin, a than u chuh thi ngei puo’n tin, a mei chule mit ngei puo’n tin; mi chengcheng mitmuh achun thil kihdak-um tak hi ta’n au,” ti’n.