Read Gangte THIEMPUDANTE 1 Bible Online

THIEMPUDANTE 1 - Gangte bible

THIEMPUDANTE 1

¹Chun, LALPA’n Mosi chuh a sama, kihona puon-In apat chun a hopih a,

²Israel suonte chuh hopih in la, a kawm u ah, na lak u ah kuo’n le LALPA kawma thillat na lat tieng u leh ganguol laka bâwng leh belam guol lak ngêi a na lat dinguh ahi.

³A thillat chuh, hâlmang thillat a hih chun, bâwng guol laka a chal dem umlo, a lat ding ahi. Amah chuh pawm sak a hih theihna dingin, kikhawp khâwmna puon-In kawtkhak maia chuh a lat ding ahi.

⁴Hâlmang thillat lu chung achun a khut nga’n tin, tichun, amah gitloh lâkmangna dingin pawm sak hi’n a.

⁵Chun, bâwngchal chuh LALPA ma ah that intin, chun, Aron chapa thiempute chun thisan chuh lau in tin, kihona puon-In kawtkhak bula maichâm chuh a theh viel dinguh ahi.

⁶Tichun, hâlmang kithawihna chuh avun lip intin, a semnel ding ahi.

⁷Thiempu Aron chapate chun maichâm achun mei kawih u’ntin, mei chung achun thing sep khawm un tin;

⁸Khutichun, Aron chapa thiempute chun sa kisemnelhaw, a luchang tawh a thau chuh maichâm a mei chung achun phatak in kawih u’ntin,

⁹a sunghaw leh a kênghaw vang chuh tui in sawp untin, thiempu chun, LALPA dinga gimlim tak, mei thillat hâlmang kithawihna dinga maichâm chunga a hâltum vek ding ahi. Zie thillat gim chuh LALPA a dinga gimlim ahi.

¹⁰Chun, a thillat chuh hâlmang thillat dinga ganguol laka belam ahim, kel ahim ahih chun, a chal demna bei a lat ding ahi.

¹¹Maichâm sik, mâllam pang a LALPA ma achun that intin, chun, Aron chapa thiempute chun maichâm chuh thisan chun a theh viel dinguh ahi.

¹²Chun, a sa chuh semnel untin, a luchang leh a thau chuh thiempu chun maichâm a mei chunga thing achun kawih pha’n tin,

¹³chun, a sung leh a kênghaw chuh tui in sawp intin, chun, thiempu chun sa chuh a pum in la’n intin, maichâm ah hâl intin meikhu’n zam mang ina; hâlmang thilpiek ahi a, LALPA a dinga mei a thilpiek gimlim ahi.

¹⁴Chun, LALPA dinga thillat chuh vacha chi ahih chun, a thillat ding chuh vakhu ahim vapalno ahim a lat ding ahi.

¹⁵Chun, thiempu’n maichâm ah hun chawi intin, a ngâwng hêk tan intin, a luchang chuh maichâm a a hâl intin; Chun, a thisan chuh maichâm sîka chuh a vat kang sak ding ahi.

¹⁶Chun, a lawp leh a sung cheng chuh ladawk intin, maichâm sik, suohlam panga vut kibuokna sek muna chuh a paihmang ding ahi.

¹⁷Chun, a tha haw chuh bawttawng intin, a sa vang chuh luoi kek lo in chun, thiempu chun maichâm a mei chunga thing achun a hâl ding ahi. Hâlmang thilpiek ahi a, mei a thilpiek LALPA a dinga gimlim ahi.