Read Gangte THIEMPUDANTE 10 Bible Online

THIEMPUDANTE 10 - Gangte bible

THIEMPUDANTE 10

¹Chun, Aron chapate, Nadab leh Abihu chun a meilaknau kuong chuh a lau a, a chung achun mei-âm a kawih u a, gimlim a buok u a, tichun, LALPA masang ah a thupiek loh in mei thienglo chuh a mang u a.

²Khutichun LALPA ma apat in mei a hung pawt a, amau chuh a kang lum gel ta a, LALPA ma achun a thi tau a.

³Ziephet chun, Mosi’n Aron kawmah, “Ziehi LALPA’n ana gen kha ahi, ‘Kuole, ei naih taphawt te kawm achun thiengtho in kilang ing ka ting, tichun, mipite masang achun limbawl a um ding ka hi,’” a ti a. Himahleh, Aron chuh thipkêi in a um a.

⁴Tichun, Mosi chun Aron paneu Uzziel chapa, Mishael leh Elzaphan te chuh a sama, a kawm u ah, “Hung naih unla, na suohpihteu hi, mun thiengtho apat hin giehbuk pawlam achun zâwndawk un,” a ti a.

⁵Khutichun, a va naih u a, puonâk âk pum in mithi luong chuh puon a khuh u a, giehbuk pawlam achun a zawn dawk tau a, Mosi’n a kawm u a thu a piek bang tak chun a hih tau a.

⁶Chun, Mosi chun Aron leh a chapate, Eleazar leh Ithamar te kawm achun, “Mithi sûn na hiu ui tih hetna dingin, na sam u chuh subuoh kiu unla, na puonteu le bawtthêk diek kiu in. Khutia chuh na hih u chun, thi ding na hiu a, LALPA lungnat chuh mipite chunga hin um kha’na. Himahlele, LALPA kawm apat a mei hung zieka thihna um hi, na suohpih uh Israel inkuon teu sûn vang chuh phal ahi.

⁷Chun, kihona puon-In kawtkhak apat a chuh na pawt loh dinguh ahi, khutilochun thi kha’n lau; a ziek chuh, LALPA thau nuh a kawihchuom na hih ziekun,” a ti a. Khutichun, Mosi’n thu a piek bang tak chun a hih tau a.

⁸Chun, LALPA’n Aron chuh a hopih a,

⁹“Nang na him na chapate ahim inle, kihona puon-In sung achun uain ahim, zu ahim dâwn kiu in; khutilochun, thi kha’n lau. Ziehi na suonteu inle kumkhuo a a zawp zel dinguh dân chuh ahi.

¹⁰Zie chuh, a thiengtho leh a vantâng leh a thieng leh a buok chuh na khendang theih na ding u leh

¹¹LALPA’n Mosi manga a kawm u a a gen thupiek cheng chengte chuh Israel suonte na sinsak theih na dingun,” ti’n.

¹²Mosi chun, Aron leh a chapa a dam nalai Eleazar leh Ithamar te kawm achun, “LALPA dinga mei a thillat, changbuong thillat lâk mâwk haw chuh lau inla, maichâm bul ah chawl tello in neu in; thil thiengtho ahi ngâla.

¹³Chun, LALPA kawma mei thillat lak apat a nang leh na chapate dinga piek dawk a hih ziekin, mun thiengtho a na nek dinguh ahi. Zie chuh ahi, LALPA’n thu ei piek chuh,

¹⁴Chun, a âwm pei leh a mal changlam pei chuh mun thiengtho a na nek dinguh ahi; nang leh na chapate leh na chanute tawh; Israel suonte chamna thillat kithawihna a na chanvo ding leh na chapate chanvo ding dinga guot ahi ngâla.

¹⁵Chun, amal leh a âwm chuh LALPA kawma pei thillat a lat dingin, mei a thillat thau tawh ahun chawih dinguh ahi a; zie chuh, nang leh na chapate tawh kumkhuo a na chanvo dinguh hi’n a, LALPA thupiek bang khan,” a ti a.

¹⁶Chun, Mosi chun, gitloh thawihna kêlchal chuh guntak in a hawl viel a, chun, ngaitie, ana kihalsa ahi tai tih chuh a he ta a. Khutichun, Aron chapa dam nalai Eleazar leh Ithamar chung achun a lungna ta a,

¹⁷“Bang zieka gitloh thawihna sa chuh mun thiengtho a na nek loh u a? Thil thiengtho pên hi a, mipite gitlohna pawding a LALPA ma a chamna siem sak na dinga a hun piek ahi ngâl a.

¹⁸Ngaitiem u, a thisan chuh mun thiengtho ah na la lut puou hila, kithawihna sa bêk chuh taka chuh na nek dinguh hi a, thu ka hun piek guol khan,” a ti

¹⁹Chun, Aron in Mosi kawmah “Ngaitie, tuni hin LALPA ma ah a gitloh thawihnau leh a hâlmang thillat u chuh a lat uh ahi a; hitibang thil hi ka chungah a hung um ta mai ngâla, tuni hin gitloh thawihna chuh a na ne ta leng, LALPA ngaih a thilhih ding dawl ahi dinga maw?” a ti a.

²⁰Chun, Mosi’n zie chuh a zak phetin, a lungkim ta a.