Read Gangte THIEMPUDANTE 11 Bible Online

THIEMPUDANTE 11 - Gangte bible

THIEMPUDANTE 11

¹Chun, LALPA’n Mosi leh Aron a hopih a,

²Israel suonte chuh hopih inla, Lei chunga sa chengcheng laka ganhing na nek ding hawu chuh ziehaw hi ahi.

³Sa lak ah a tin kika taphawt leh, ik dawk a kha thaichi taphawt chuh ne thei un na tin,

⁴Himahlele, khathai ahim, a tin kika lak ah ziehaw hi na nêk loh dinguh ahi, sangawngsau hin khathai lele, a tin uh kika lo ahih ziekin nanguh dingin a thienglo ahi.

⁵Chun, sangawi hin kha chuh a thai na a, mahleh, a tin uh a kikât loh ziekin nang u dingin a thienglo ahi.

⁶Sazupi le kha chuh a thai na a, a tin a kikât loh ziekin, a thienglo a ngaih ahi.

⁷Chun, vawk hih a tin a kika a, aka pai suok a, mahleh kha a thaih loh ziekin nang u dingin a thienglo ahi.

⁸Zie ganhing haw hi na nek loh dinguh ahi a, a thisa le na sukkhak loh dinguh ahi, a thienglo ahi ngâl uh a.

⁹Chun, tui a cheng haw lak ah ziehaw hi ne thei un lau: tuipi leh luicha a cheng tha leh phulip nei taphawt chuh ne thei un lau.

¹⁰Himahlele, tui laka cheng leh tuia hinna nei um chengcheng laka, tuipi a umte, luicha a umte tha leh phulip neilo taphawt chuh nang u dinga thil kihdak-um ahiu a,

¹¹Nang u dingin thil kihdak-um hin au; a sa teu chuh na nêk loh dinguh ahi a, a thikam le thil kihdak-um a na ngaih dinguh ahi. Zie tawbang thilsiem ganhingte chuh a thienglo a ngaih ahiu hi. Na nek loh dinguh ahi a, a thi le na sukkhak loh dinguh ahi.

¹²Bang hitaleh, tuia cheng, tha leh phulip neilo taphawt chuh nang u dingin thil kihdak um ahi.

¹³Chun, vacha lak ah ziehaw hi kihdak-um a na neih dinguh ahi a, na nek loh dinguh ahi a, thil kihdak-um ahiu hi, Mupi, Mulukawlh leh Mukel,

¹⁴Muvawm, leh Mu chi himhim te,

¹⁵Mukhau, Mubuong, leh Va-âk chi himhim,

¹⁶Vakengsang, Vangawngsau, Tuiva,

¹⁷Simbuchanglit, luidung mu, Tuiva kengsau,

¹⁸Tuivapi, Simbukinei, Tuivalawng leh Mubeng,

¹⁹Tuivatawt, dîl vacha himhim, Muvanlai leh bâk chite hi.

²⁰Tha nei keng li a chieh taphawt chuh nang u dingin a thienglo ahi.

²¹amahvang chuh, tha nei, keng li a chieh lak ale leichung a châwp na dinga malpi nei taphawt lak ah ziehaw hi ne thei un lau.

²²Khaupe chi himhim te, khuongthilit chi him himte, khuongbai chi himhim leh khaupe chi himhim chuh ne thei un lau.

²³Ziehaw tihloh hi ganhing keng li nei a, tha nei taphawt chuh, nang u dingin thil thienglo hivek un au.

²⁴Chun, ziehaw ziek hin a thienglo hung hithei un lau. Kuole ganhing thikam khawih kha taphawt chuh nitâk lam chanin a thienglo hiding ahi.

²⁵Chun, kuole ziehaw luong la taphawt chun a silhlechen te a sawp ding ahi a, nitâk lam tiengin a buok hiding ahi.

²⁶Ganhing a tin kika a, ka pai suok lo, kha le thai lo phawt chuh nang u dingin a thienglo ahi; kuole zie khawih ta chuh thienglo in um ina.

²⁷Chun, ganhing lak ah kengbawm nei taphawt chuh nang u dingin a thiengtho ahi, a thisa luong khawih kha taphawt chuh nitâk lam chanin thienglo hi’n a.

²⁸Chun, a luong uh la taphawt chun, a puon uh a sawp dinguh ahi, nitâk lam chanin a thienglo hi’n au; nanguh a dingin thil thienglo ahi.

²⁹Chun, ziehaw hi leia bawkvak chi laka nanguh a dinga thienglo chu ahiu; bui, santhîm leh tang chi him himte,

³⁰tawkek leh thankik, tangmam leh daidepte,

³¹Ziehaw hi bawkvak a chieh laka a thienglo haw chuh ahiu hi; kuo’n le, a thisa a sukkhak chun nitâk lam chanin buok un au.

³²Chun, a thi luong in a delh khak phawt chule ûmlebel, bang matchâk hita leh nitâk lam chanin buok intin, zie nung chuleh thieng ina.

³³Zie gan thi chuh lei bel chunga a kiek khâk chun, lei bel chuh sukkêk ding ahi a, a sunga um cheng-puma chuh thienglo hi’n a.

³⁴Zie bela nek ding um chengcheng chule, a bel sawpna tui in a vat khum khâk cheng chuh thienglo hi’n tin, tui dâwn theih um haw chule thienglo hi vek ina.

³⁵Bang hitaleh, zie ganhing thi sukha taphawt chuh a thienglo ahi a, chângthâk kanna ahim, akan lumna ahim chule sukkêk vek ding ahi. A buok tâk ziekin nang u a dinga thienglo hi’n a.

³⁶Amahvang chuh, tuikhuk ahim, tui kawihna ahim, tui kitingkhawm chuh buok puo’n a, a luong uh khawih kha taphawt chuh vang buok zing ina, thil dang chunga a chuk khâk chun thienglo hi’n a.

³⁷Himahleh, thaichi mu, tuh ding lai chunga a chuk khâk chun, thienglo diek puo’n a.

³⁸Himahleh, thaichi mu chuh tuia kidieh laia a sukkhak chun thienglo hi’n a.

³⁹Ganhing nek chi a thih chun, a luong sukha taphawt chuh thienglo hiu intin, nitâk lam tiengin thieng lo in um un au.

⁴⁰Kuole, a sa ne taphawt chun, a puon uh a sawp ngêi ngêi dinguh ahi a, nitâk lam tiengin thienglo in um un au. Zie tawbang ganhing thi puo taphawt chun le, a puon uh a sawp ngêi ngêi dinguh ahi, nitâk lam tiengin thienglo in um un au.

⁴¹Chun, ganhing neu haw, leituol a bawkvaka vak thawh himhim chuh na nek loh dinguh ahi.

⁴²Bawkvaka kithawlh hi henla, keng li a chieh hiu henla, keng tamtak nei chi hi leule na nek loh dinguh ahi a,

⁴³Ziehaw sa chuh ne a na kisukbuok loh dinguh ahi.

⁴⁴Kei hi, LALPA na Pathien uh ka hi a, zieziekchun, kihihthiengtho un, kei ka thiengtho ngâl a. Lei chunga chêng a bawka vak thawh chi himhim chun kisubuok kiu in.

⁴⁵Kei hi, LALPA na Pathien uh hi dinga, Aigupta gam apat a hun puidawkpa chuh ka hi. Na thientho dinguh ahi, Kei ka thiengtho ngâl a.

⁴⁶Ziehi, ganhing chengcheng, vacha hileh, tuia cheng ganhing hileh, leia bawkvaka vak, ganhingte chunga hih dân dinga dânte chuh ahi.

⁴⁷Thiengtho leh thiengtho lo khendang na ding leh, hinna nei nek theih chi leh nêk theih loh chi na khen thiemna dingun, ti’n.