Read Gangte THIEMPUDANTE 12 Bible Online

THIEMPUDANTE 12 - Gangte bible

THIEMPUDANTE 12

¹Chun, LALPA’n Mosi a hopih a,

²Israel chate kawmah, Numei in nau a vawp a, chapa ahin chun ni sagih sung chuh buok intin, numei dân ngeina a neih huna a buok bang chun buok ina.

³Chun, nausen chuh ni giet a tit phat leh a zek tan ding ahi.

⁴Zie numei chuh sakhuo dana a thien na dingin, a thi luon apat, ni sawmthum leh thum zeh a chan ding ahi a, zie sung chun thil bangmah a sukkhak loh ding ahi a, khawih le a khawih khâk loh ding a hi a, a zehchan ding hun sung a beih masang sieh chu, puon-In thiengtho ale a lut loh ding ahi.

⁵Himahleh, numei ahin le vang chuh, ni sawm le li sung chuh buok intin, tha tina a numei hihna ngeina a neih laia tawh kibang ina. Chun, a thisan zieka a kithiensakna ding chun ni sawmgup leh gup zeh a chan ding ahi.

⁶Chapa ahim, chanu ahim nei ta lele, a kisukthienna hun sung a beih tieng chuleh, LALPA umna puon-In kawtkhak achun belamno, kum khata upa, hâlmang thillat ding leh, vapal ahim, vakhu ahim, gitloh thawihna dingin a hun chawih ding ahi.

⁷Tichun, thiempu’n zie thillat chuh LALPA kawmah pie’n tin, a buokna lakmang na dingin kithawihna chuh siem sak intin, tichun, hung thiengtho ta’n a. Ziehi chanu ahim chapa ahim hingte dinga kithawihna dân chuh ahi,

⁸Chun, belamno a neih zawh loh chun, vakhu tuok khat ahim, vapalno tuok khat ahim, a hun chawih ding ahi: khat chuh hâlmang kithawihna dingin, khat chuh gitloh thawihna dingin hi’n tin; thiempu’n kichamna chuh siem sak intin, tichun, hung thiengtho ta’n a, ti’n gen in, a ti a.