Read Gangte THIEMPUDANTE 13 Bible Online

THIEMPUDANTE 13 - Gangte bible

THIEMPUDANTE 13

¹Chun, LALPA’n Mosi leh Aron kawmah zie dânte hi a pie a:

²Mi kuole, a taksa vun a vum ahim, a khik ahim, a bawl ahim, a vun a phâk hi hileh kilawma a lat chun, thiempu Aron kawm ahim, a chapate kawm ahim a puih ngêi ngêi ding ahi.

³Chun, thiempu chun, a vun chunga natna hi chuh a na en intin, ahi umna tak mul chuh a vam a, a natna chuh vunthuol sanga lut thuk zawa a lat chun, phâk natna ahi a, thiempu chun ana en intin, a thienglo ahi tih a phuon ding ahi.

⁴Himahleh, a tivun a bawl haw chuh a vam a, a vun sung lama chuh lut thuk lo a a lat a, a mul chuh a vam loh chun, amah chuh thiempu chun ni sagih sung a kawih chuom ding ahi.

⁵Thiempu’n amah chuh ni sagih ni leh en kit intin, a natna hi chuh a ngêi ngêi ahih a, a mabeh chuh a let beh loh chun, thiempu chun ni sagih mah kawih chuom kit ina.

⁶Thiempu chun ni sagih ni leh en kit intin, a ma chuh a beih a, a vun chunga a dalh beh loh chun, thiempu chun a thieng hi ti a a phuon ding ahi, a pawn mai a hih ziekin. Amah chun a puon sawp intin, tichun, thiengtho ta’n a.

⁷Himahlele, a thien na dinga thiempu a ki-etsak nunga, a khik chu a hung vum a, dalh zâk a a kilat kit chun, thiempu a ki-etsak kit ding ahi.

⁸Thiempu chun a na en intin, a khik chu avâm a alet beh a, a dalh deuh chun, thiempu chun a thienglo ahi ti a a phuon ding ahi. Phâk natna a hih ziekin.

⁹Chun, mi’n, phâk natna a vei chun, thiempu kawma puih ding ahi, chun,

¹⁰Thiempu chun a na et ding ahi. A vun a vam a, a mul a hung vam a, a mabeh a dulh chun,

¹¹phâk natna dam theilo chi ahi a, a thienglo ahi tih thiempu’n phuong intin, a chuom a kawih ngailo ahi, a thienglo sa him a hih ziekin.

¹²Phâk hik chuh a vun chunga a vak zak beh a, amah chuh a luchang apat a a kêngpêk mawng chana thiempu hettheih a a tuom suok chun;

¹³thiempu chun en intin, phâk in a sa chung chengcheng a tuom suok chun, amah chuh a thieng hi tin a phuon ding ahi: a vun chung a vam suok chun, a thieng ahih tâk ziekin.

¹⁴Amahvang chuh, a taksa a hung dulh hen hun chun a thienglo ahi.

¹⁵Thiempu chun a taksa dulhna chuh en kit intin, a mabeh chuh a kek chun, a thienglo ahi tih a phuon ding ahi. A mabeh kek chuh phâk natna ahi tih hetna ahi a, amah chu a thienglo ahi.

¹⁶Himahlele, a taksa dulh chu a hung dam kit a, a hung vam kit chun, thiempu kawmah chieh intin,

¹⁷Chun, thiempu’n a na en intin, a thieng ahi tai tih a phuon ding ahi, a thieng ahih tâk ziekin.

¹⁸Chun, kuo’nle, a sa chunga uilut a neih a, a hung dam kit a,

¹⁹uilut umna mun chu a hung vam a, a vam san thim a hung um a, a bawk ahim a um chun, thiempu etsak ding ahi.

²⁰Thiempu chun a na enchien intin, mul kehna sanga thuk zaw a a lat a, mul chuh a hung vam chun, thiempu’n amah chuh a thienglo ahi ti a a phuon ding ahi, phâk natna ahi a, uilut apat a hung kipan ahi.

²¹Amahvang chuh, thiempu’n a na et a, a mul chuh a vam loh a, a vun sanga chu thuk zaw a a um loh a, muol thim maia lang a hih chun, thiempu chun ni sagih a kawihchuom ding ahi.

²²A ma chuh a let beh chun, thiempu chun a thienglo ahi ti a a phuon ding ahi, natna hik nei ahi.

²³Himahleh, a ngêi ngêi a hih a, a zak diek loh chun, a pawn maimai ahi a, thiempu chun a thieng hi ti a a phuon ding ahi.

²⁴Mi, mei in a kâk a, a kâk gawtna chuh a vam ahim, a san vam thim ahim a a hung bawl chun,

²⁵Thiempu’n a na en intin, a mabeh a mul chuh a hung vam a, vunthuol sanga thuk zaw a a lat chun, phâk natna ahi a, a kâkna mabeh a chuh hung kipan ahi, thiempu chun a thienglo ahi tih a phuon ding ahi, phâk natna ahi.

²⁶Himahlele, thiempu’n a na et a, mul vam a um loh a, vun sanga thuk zaw lo a, muol deuh mai a hih chun, thiempu chun ni sagih a kawihchuom ding ahi.

²⁷Chun, thiempu chun, ni sagih ni chun amah chu en intin, vuna a dalh zâk chun, a thienlohna a phuon ding ahi, phâk natna ahih ziekin.

²⁸Himahleh, ama chuh a umna ngeia um a, vuna a kithehzâk loh a, a muol deuh mai ahih chun, phâk natna ahi puoh a, thiempu chun a thieng hi tih a phuon ding ahi, mei kâkna pawn ahi.

²⁹Numei ahim, pasal ahim in, a luchang ahim, a khabemul lak ahim a meima a neih chun;

³⁰thiempu’n meima chu enchien intin, vun sanga lut thuk zaw a a kilat ahim, mul eng ngâtcha a um chun, thiempu’n a thiengloa a phuon ding ahi; luchang leh khabemul laka phâk hi ahi.

³¹Chun, thiempu’n a sam laka leh a khamul umna a meima chu a et a, vun sanga thuk lo zawa a kilat a, a sam vawm a um diek loh chun, thiempu chun sam laka meima neipa chu ni sagih a kawihchuom ding ahi.

³²Chun, a ni sagih ni chuleh thiempu chun meima chu en kit intin, sam laka meima chu a dalh zâk loh a mul-eng a um diek loh a, meima chuh vun sanga thuk zaw ale a lat diek loh chun, a kimvel chuh a met ding ahi. Sam lak vang chuh met ding ahi puoi.

³³Thiempu’n amah chuh ni sagih dang a kawihchuom kit ding ahi.

³⁴Chun, ni sagih chuleh, thiempu chun meima chuh en kit intin, sam laka meima chuh vun chunga a dalh zâk loh a, vun sanga thuk zaw ale a lat loh chun, thiempu chun a thieng hi tih a phuon ding ahi; tichun, a puonhaw sawp intin, a thieng hi ta’n a.

³⁵Himahlele, a meima chu a kisukthien nunga vun chunga a hung dalh zâk kit chun,

³⁶Thiempu’n amah chuh a na en kit intin, meima chuh vuna a dalh zâk chun, thiempu chun mul-eng hawl ngai ta puo’n a, amah chuh a thienglo ahih ziekin.

³⁷Amahvang chuh, sam laka meima chuh a ngei mah a a muh a, mul vawm a keh chun, sam laka meima chuh a dam ahi ta a, thiempu chun a dam ei tai tih a phuon ding ahi.

³⁸Numei ahim, pasal a sa chunga a bawl, vam a um chun,

³⁹thiempu’n en intin; a vun haw chuh vam muol deuh a hih chun, a bawl maimai ahi a, vuna hung pieng ahi a, a thieng ahi.

⁴⁰Mi a sam a pulh zawh chun, lukawlh ahi a, a thienglo ahi diek puoi.

⁴¹A sip sam a pulh a, a kawlh chun, chalkawlh ahi a; himahlele, a thieng ahi.

⁴²Himahlele, a lukawlh ah ahim, a chalkawlhna ahim achun meima san deuh ahim vam hiuhieu a um chun a lukawlh leh a chalkawlh a chuh phâk hi hung kipan ahi.

⁴³Tichun, thiempu’n en intin, a lukawlh ahim, a chalkawlh ahim a meima hung pawng dawk chuh san vam hiu hieu a a taksa vuna phâk hi tawbanga alat chun

⁴⁴Amah chuh a thienglo ahi tih thiempu’n a phuon ngêi ngêi ding ahi, a luchang a phâk natna um ahi.

⁴⁵Phâk hivei chuh a puonhaw bawhthek hi’n tin, a sam met loh in kawih intin, a mûk chunglam tuom intin, “Thienglo, thienglo,” ti a a kiko ding ahi.

⁴⁶Phâk in a bawm sung cheng chuh thienglo hi’n tin, mi dangte apat a gamla taka, giehbuk pawlama a um ding ahi.

⁴⁷Silhlechen leh, samul puon ahim, patngatpuon ahim,

⁴⁸gat thawh hi henla, phêk thawh hileh, patngatpuon ahim, samul chung hilele,

⁴⁹Eng hing ahim, san thim ahim a um chun, phâk natna hik zak ahi a, thiempu kawma etsak tei ding ahi.

⁵⁰Chun, thiempu’n zie natna hik chuh a na en intin, zie hik kaihna chuh, ni sagih a kawihchuom ding ahi.

⁵¹Ni sagih ni chun natna hik chuh en kit intin, natna hik chuh a vak zaka a hih chun, zie chuh phâk dettak chi ahi a, zie puonhaw chuh a thienglo ahi.

⁵²Silhlechen chuh gat thawh ahim, a kiphan thawh ahim, samul ahim, patngatpuon ahim savun a siem chi himhim ahim, phâk umna taphawt chuh hâl ding ahi; phâk dettak chi ahi ngâla, hâltum ngêi ngêi ding ahi.

⁵³Chun, thiempu’n a et a, natna hik chuh silhlechen haw chunga chuh a vak zak loh chun,

⁵⁴hi umna chuh thiempu’n sawp ding thu pie’n tin, ni sagih a kawihchuom ding ahi.

⁵⁵Chun, hi umna kisawp nung chun thiempu’n en kit intin, natna hik chuh a lamdan chuom loh chun, vak zak kilele, a thienglo ahi a; a natna chuh a sunglam pang a um hi henla, a pawlama um hilele a det chi ahi a, na hâltum ngêi ngêi ding ahi.

⁵⁶Himahlele, thiempu’n ana et kita, a sawp nunga muol deuh chauh ahih chun, puon apat ahim, savun apat ahim, gat thawh apat ahim, phan thawh apat ahim chuh bawttha’n tin,

⁵⁷Phâk natna hik chuh puon kigat thawh ahim, kiphah thawh ahim, savun a kisiem haw ahim a a kilat naklai zing chun, ahung puong kit ahi a, a hik umna chuh meia na hâl ding ahi.

⁵⁸Chun, puon chuh a kigan ahim, a kiphan ahim, savun a kisiem chi himhim na sawp a, natna hi’n a kithiel dawk san chun sawp kit ding ahi a, tichun, hung thieng ta’n a.

⁵⁹Ziehi samul ahim, patngatpuon ahim, gat thawh ahim, phan thawh ahim savun a siem chi himhim haw a phâk hi uma a thien leh a thien loh phuondawk dân ding chuh ahi, ti’n.