Read Gangte THIEMPUDANTE 14 Bible Online

THIEMPUDANTE 14 - Gangte bible

THIEMPUDANTE 14

²Ziehi phâk natna thien sak ni a hih dân ding chuh hi’n a. Thiempu kawma puih hi’n tin,

³chun, thiempu chun giehbuk pawlam achun pui intin, a et ding ahi. A natna chuh a phat a ahih chun,

⁴thiempu chun, a kithiensakna ding chun, vacha thieng nih leh, sidar thing leh pat san leh husop thing hun chawi dingin thu pie’n a.

⁵Tichun, thiempu chun, vacha khat chuh lei bel, a sunga tui thieng tak um chung achun thah dingin thu pie’n tin,

⁶Vacha hing khat chuh, sidar thing chu tawh, patzang san chu tawh, husop thing chu tawh chawi intin, vacha kithat thisan achun dieh ina.

⁷Chun, phâk natna apat a kithiensak ding pên chuh sagih vei thehkhum intin, a thieng tai tih phuong ina. Vacha hing chuh gamlaka a lên mang sak ding ahi.

⁸Chun, a kithiensak ding chun a puonhaw sawp intin, a kisil ding ahi a, a sam haw a met muih ding ahi, zie zawh chuleh thieng ta’n a. Giehbuk sung achun lut thei intin, hilele, ni sagih sung chuh puon-In pawlama a um ding ahi.

⁹A ni sagih ni chun a sam cheng leh a khabemul leh a mitmul haw met intin, a mul chengcheng a met kawlh vek ding ahi; a puonhaw sawp intin, a taksa chuh tui in sil intin; tichun, hung thieng ta’n a,

¹⁰Chun, a ni giet ni chuleh, belamno chal dem umlo nih leh, belamno a nu khat dem umlo, kum khata upa leh changbuongnel ephah mun sawma khena mun thum, olive thau tawh kihel leh, sathau bûk khat a hun chawih ding ahi.

¹¹Chun, ana thien sak thiempu chun, a kithiensak ding mi leh zie thil chuh kihona puon-In kawtkhak bul ah LALPA ma ah kawih in tin,

¹²Chun, thiempu chun belamno chal khat chuh sathau bûk khat chu tawh la’n tin, bawhsiet thillat in lân ina. LALPA ma a pei thillat dinga pei ding ahi.

¹³Gitloh thawihna leh hâlmang thillat a thah seknau mun, mun thiengtho achun thah ding ahi: gitloh thawihna chuh thiempu chanvo a hih bang khan, zie bawhsiet kithawihna hile thiempu chanvo ahi a, a thiengtho ahi.

¹⁴Thiempu chun gitloh thawihna thisan chuh la’n tin, kithiensak ding pên bil changlam mûk haw, a khut changlam khutpihaw, a keng changlam kengpihaw chuh nuh ina.

¹⁵Chun, thau neukhat thiempu chun la’n tin, amah veilam khutpêk ah sung intin;

¹⁶a khut veilam khutpêk a thau achun a changlam khutzung dieh intin, thau chuh LALPA masangah sagih vei theh ina.

¹⁷A khutpêk a thau um nalai chun, kithiensak ding pa bil changlam lêk haw, a khut changlam khutpihaw, a keng changlam kengpihaw chuh belam thisan chu tawh nuh sak ina.

¹⁸Chun, thau um nalai cheng chuh kithiensakpa luchang achun sung ina. Zie guol hin kithiensakna chuh siem sak ina.

¹⁹Chun, thiempu chun gitloh thawihna chuh lân intin, kithiensakna chuh siem intin; zie zawh chuleh hâlmang thillat gan chuh that ina.

²⁰Tichun, hâlmang thillat leh changbuong thillat chu tawh maichâm achun lân ina. Zie guol hin thiempu chun, sukthienna chuh siem intin, tichun, hung thieng ta’n a.

²¹Himahlele, amah chuh a chatgah a, zie bang hi hih theilo ahih chun, a thillat ding chun, belamno chal chuh, thiempute a dinga LALPA kawma bawhsiet thawihna kichamna siem sak na ding in hun chawi ina. Amah chun an thillat ding chun changbuongnel, ephah mun sawm a khen mun khat leh olive thau kihel leh, thau bûk khat a hun chawih ding ahi.

²²Chun, vakhu tuokkhat ahim, vapal tuokkhat ahim a neih theih zawk zawk hun chawi intin, khat chuh gitloh thawihna ding hi’n tin, khat chuh hâlmang thillat ding hi’n a.

²³Ni giet ni, a kithiensakna ding ni chuleh, puon-In kawtkhaka thiempute kawma chuh a hun chawih ding ahi.

²⁴Tichun, thiempu chun, gitloh thawihna belamno leh, sathau bûk khat chuh la’n tin, thiempute dinga pei thillat a LALPA ma a thiempu chun a pei ding ahi.

²⁵Chun, gitloh thawihna ding belamno chuh that intin, thiempu chun gitloh thawihna thisan chuh la’n tin, kithiensak ding pa bil changlam lêk haw, a khut changlam khutpihaw, leh a keng changlam kengpi chuh nuh ina.

²⁶Chun, thiempu chun thau neukhat chuh a khutpêk achun sung intin,

²⁷a khut veilam a sathau huntieng chuh a khut changlam chun LALPA ma achun sagih vei theh ina.

²⁸Thau chun thisan a nuh na mah, kithiensakpa bil lêk changlam haw, a khut changlam khutpihaw leh, a kengpi changlam mûk haw a nuh bangmah khan nuh ina.

²⁹Chun, thiempu khutpêk a sathau um nalai chuh, kithiensak ding pa luchang achun sung intin, zie tawbang hin, thiensuohna chuh bawl ina.

³⁰Gitloh thawihna ding leh hâlmang thillat ding chun,

³¹vakhu ahim, vapal ahim gitloh thawihna chu tawh pie khawm ina. Zie guol hin thiempu chun kithiensakna siem sak ina.

³²Ziehi ahi phâk natna vei a, kithiensuohna dinga thillat dinga kigen pie zo lote hih dân ding chuh.

³³Chun, LALPA’n Mosi leh Aron a hopih a.

³⁴Luoh dinga ka hun piek Kanaan gam na lut tieng u leh, na luoh dinguh gama In khawi ale phâk hi ka kawih chun,

³⁵zie In nei chun, zie In ahin hi hileh kilawm tak um leh kilawm in ka hêi, ti a thiempu ahun hilh ding ahi.

³⁶Chun, thiempu chuh hi en dinga a lut masang in insung a thil um chengcheng chuh a buok vek loh na dingin, In chuh suk-âwng dingin thiempu chun thupie’n tin, zie zawh chuleh thiempu chuh In en ding chun lut intin,

³⁷Chun, hi chuh en intin, hi chun a eng hing lam a san lam deuh ahim a In bang chuh a nêk hawm taka, bang sanga thuk zaw a alat chun;

³⁸Thiempu chun In chuh a nutsieh a, ni sagih a khâk ding ahi.

³⁹Ni sagih ni chuleh, chieh kit intin, In chuh va en kit intin; natna hik chuh bang hawa a na dalh zak chun;

⁴⁰Phâk hi umna suong chuh lak dawka, daikieng, mun thienglo a paih dawk dingin thu pie’n a.

⁴¹Zie zawh chuleh, a bang sung nung lam cheng chuh nawt a, a kinawtthakna nen cheng chuh khawpi pawlama mun thienglo muna chuh paih ding ahi.

⁴²Zie a suong kiladawkte thasanga chuh suong dang mata, a châlna le a thak a mat a, bang chule a thak a bawl ding ahi.

⁴³Chun, suong a lak dawk a, In chuh a hiet a, a belhzawh nunga hi chuh In a ahung pawt kit chun,

⁴⁴thiempu chuh valut intin, va en kit intin, hi chuh In a ana zak chun zie In a phâk chuh a det chi ahi a, a thienglo ahi.

⁴⁵A In chuh phieu intin, a suonghaw, a thing haw leh a suong châlna haw chengcheng chule dai pawlama nin paihna a a thiel dawk ding ahi.

⁴⁶Kuole, zie In chuh, kamchak a hih nunga va lut chuh, thienglo hi’n tin, nitâk lam geia thienglo hi’nau.

⁴⁷Chun, kuole, zie In a kuol taphawtte chun a puon uh sawp untin; chun, kuole zie In a an ne taphawt chun, a puon a sawp tei dinguh ahi.

⁴⁸Himahlele, thiempu chuh a lut a, a In chuh a va et a, belhphat ahih nunga a hik chuh a dalh zâk loh chun, In chuh a thieng hi tih, thiempu chun phuong in a.

⁴⁹Zie In thien sakna ding chun vacha nih, sidar thing, patzang san leh husop thing a chawih ding ahi.

⁵⁰Vacha khat chuh leibel a sunga tui thieng tak um chung achun that intin,

⁵¹Sidar thing leh patzang san leh husop thing chuh la’n tin; vacha hing chu tawh, vacha kithat thisan achun tui thieng tak lak achun a dieh ding ahi. Chuleh, zie In chuh sagih vei a theh ding ahi.

⁵²Chun, In chuh vacha thisan te, lui tui thiengte, vacha hingte, sidar thingte, husop thing leh patzang san mang in suthieng in a.

⁵³Zie zawh chuleh, vacha hing chuh gamlaka a lên mang sak ding ahi. Zie guol hin in thiensuohna chu bawl intin; tichun, hung thiengtho ta’n a.

⁵⁴Ziehi phâk hi chitin cheng leh vun laka meima chungchâng a dân chuh ahi.

⁵⁵Puon a phâk um leh In a haw le,

⁵⁶a vum haw, a khik haw, a bawl haw le,

⁵⁷a thienlohna leh a thienthona kâwkmuh na dingin ziehi phâk chungchâng a dân chuh ahi, ti’n.