Read Gangte THIEMPUDANTE 15 Bible Online

THIEMPUDANTE 15 - Gangte bible

THIEMPUDANTE 15

¹Chun, LALPA’n Mosi leh Aron a hopih a,

²Israel suonte chuh hopih inla, a kawm u ah, Pasal kuole a zunthakna apat a thilput a um chun, a thienglo ahi a,

³a put zingzing ahi mawh, haih châng nei zel hilele, a buok ahi.

⁴Thilput nei kuolna zâlkhun taphawt chuh a thienglo hi’n tin; a chutna taphawt chule, a thienglo ahi.

⁵Kuole, a zâlkhun sukha taphawt chun, a puonhaw a sawp a, a kisil ding ahi, nitâk lam tiengin thienglo in um in a.

⁶Chun, thilput neitu chutna a chuh taphawt chun a puonhaw sawp in, tui a a kisil ding ahi, nitâk lam tiengin thienglo in um in a.

⁷Kuole, thilput neipa sukha taphawt chun a puonhaw sawp intin, a kisil ding ahi a, nitâk lam tiengin thienglo in um in a.

⁸Kuole, thilput neipa chun, chil a sietkhum taphawt chun, a puonhaw sawp intin, a kisil ding ahi a, nitâk lam tiengin thienglo a um ding ahi.

⁹Chutna, bang hitaleh, thilput neipa chutna taphawt chuh a thienglo a ngaih hi’n a.

¹⁰Kuole, a delh khakna nung sukha taphawt chule thienglo hiu un tin, chun, zie thil chuh a lachawn taphawt chun a puonhawu sawp untin, a kisil dinguh ahi a, nitâk lam chanin a thienglo hi’n au.

¹¹Kuole, thilput neipa chun khut sawp lo a a khawihkhak taphawt chule thienglo hiu intin, a kisil dinguh ahi a, nitâk lam tiengin thienglo hi’n au.

¹²Chuleh, thilput neipa chun, lei bel a khawih khâk taphawt chule sukkêk tei ding ahi a; matchâk, thinga siem a sukkhak taphawt chule tuia sawp ngêi ngêi ding ahi.

¹³Chun, amah chun, a natna a thien nung chuleh, ni sagih ngak intin; a puonhaw sawp intin, tui thieng in kisil intin; tichun, hung thieng chauh ding ahi.

¹⁴Chun, a ni giet ni chuleh, vakhu nih ahim, vapal nih ahim, LALPA ma ah kihona puon-In kawtkhak bul ah chawi intin; thiempu a piek ding ahi.

¹⁵Thiempu chun gitloh thawihna dingin khat, khat chuh hâlmang thillat dingin lân ina. Zie tawbang hin, zie natna neipa ding chun, thiensuohna siem sak ina.

¹⁶Kuole, kipawlna chi amah a a pawt chun, a kisil ding ahi a; nitâk lam tiengin thienglo hi’n a.

¹⁷Silhlechen haw, savun haw, kipawlna chi behna taphawt chuh sawp ngim a, nitâk lam tienga thiengloa um ding ahi.

¹⁸Numei a kuolpih lele, a nih u a, a kisil dinguh ahi a, nitâk lam tienga thiengloa um ding ahiu.

¹⁹Numei chuh, tha tina a dân ngeina guola a thiput lai chun, ni sagih thienglo hi’n a. Kuole amah sukha taphawt chuh, nitâk lam geia thiengloa um ding ahi.

²⁰A thi neih sunga a chutna leh a kuolna taphawt chuh a thienglo ahi.

²¹Kuole, a chutna leh a zâlkhun sukha taphawt chun, a puonhaw sawp intin, kisil intin; nitâk lam tienga thiengloa um ding ahi.

²²Kuole a chutna khawih taphawt chun, a puonhaw sawp intin; a kisil ding ahi a, nitâk lam tiengin thiengloa um ding ahi.

²³Zalkhun a thil um ahim, chutna a thil um ahim sukha taphawt chuh, nitâk lam tienga thieng lo a um ding ahi.

²⁴Kuon le, a kuolpih a, a buokna chuh a chunga a um chun, ni sagih sung thienglo hi’n tin; a kuolna zâlkhun taphawt chuh thiengloa kawih hi’n a.

²⁵Numei in, a tha tin ngeina guola a thineih sanga sawt zaw thi a neih ahim, a hun sung sawt zaw a put zing chun, a thiput sung cheng chuh thienglo hi’n tin; a tha tin ngeina dana a thi neih lai mah bang khan a um ding ahi.

²⁶A thiput sung chenga a kuolna zâlkhun leh, a sukkhak taphawt chuh a thienglo ahi.

²⁷Kuole, ziehaw thil khawih taphawt chuh, thienglo hiu untin; a puonhawu sawp untin, a kisil dinguh ahi a, nitâk lam tienga thiengloa um ding ahiu.

²⁸Amah vang chuh a thiput haih nung chuleh, ni sagih ngak intin, tichun, thiengtho ta’n a.

²⁹Chun, a ni giet ni chun vakhu nih ahim, vapal nih ahim chuh kihona puon-In kawtkhak a thiempute kawma ahun chawih ding ahi.

³⁰Tichun, thiempu chun khat chuh gitloh thawihna dingin, khat chuh hâlmang thillat dingin lân intin, tichun, thiempu chun a thiput chuh LALPA masang ah kithiensakna siem ina.

³¹Israel mipite a thien loh lai u a, a hih dân dingun, LALPA’n Mosi kawmah zie dante hi a pie a, khutia chuh, a umnau puon-In, giehbuk haw lailung lai taka um chuh a sukbuok lohna dingun. Kuole, a hihbuok ta chuh thi tei ding ahi ngâl u a.

³²Ziehaw hi, pasal thilput nei ahim, kipawlna chi amah a pawt ahim,

³³Numei, a tha tin ngeina banga a umlai leh, numei thienglo kipawlpihte a dinga dân chuh ahi.