Read Gangte THIEMPUDANTE 16 Bible Online

THIEMPUDANTE 16 - Gangte bible

THIEMPUDANTE 16

¹Chun, Aron chapate nih in LALPA kawma mei thienglo a lat u a, a thih lawh nung u chun, LALPA’n Mosi a hopih a,

²LALPA’n Mosi kawmah, “Na suohpihpa Aron hopih in la, puonzak sunga mun thiengtho a Pathien bawm chunga zahngaihna chutphah ma achun hun dang guolin mawk lut hiel kihen, khutilochun, thi kha’na; zahngaihna chutphah chung achun meipi a hung kilak ding ka hi ngâla.

³Gitloh thawihna dinga bâwngchal tuoi khat leh, hâlmang thillat dinga belamchal khat a hun kaih zawh phat chuleh, Mun thiengtho pên chuh lut thei chauh ding ahi,” a ti a.

⁴Chun, LALPA’n zie thuhilhna haw hile a pie a: Aron chuh Mun thiengtho pên a a lut masang chun a kisil ding ahi a, chuleh, thiempu puonâk chuol thiengtho âk intin, chun, a taksa tawh kisukha dingin patngatpuon in kivan intin, patngatpuon kâwnggak gâk intin, dielkawp tawh a kawp ding ahi.

⁵Israel mipi chieh khawmte chun kêlchal nih chuh gitloh thawihna ding leh, belamchal chuh hâlmang thillat dinga Aron kawma a piek dinguh ahi.

⁶Chun, Aron chun bâwngchal chuh amah leh a inkawte gitloh thawihna dingin lân intin,

⁷Zie zawh chuleh, kêlchal nih chuh kihona puon-In kawtkhak lutna a chuh a hun kaih ding ahi.

⁸Chun, Aron chun kel nih te chung achun phunsân intin, khat chuh LALPA a ding tih hetna hi’n tin, khatzaw chuh Azazel a ding tih hetna ding hi’n a.

⁹Aron chun, phunsanna apat a LALPA chanvo dinga hung pawt kel chuh, gitloh thawihna dingin lân ina.

¹⁰Azazel chanvo dinga hung um pên chuh a hing in LALPA kawma piek hi’n tin, tichun, mipite gitlohna lak mang a hih theihna dingin, thalek achun kelchal chuh thahdawk hi’n a.

¹¹Chun, Aron in amah a ding leh a inkawte dinga gitloh thawihna bâwngchal chuh la’n intin, amah leh a inkawte dingin kichamna siem ina, amah chanvo gitloh thawihna bâwngchal chuh that intin.

¹²Chun, LALPA ma a maichâm apat meilakna mei-âm a dim la’n tin, gimlim kigawinel khutdim nih tawh Mun thiengtho a chuh a lutpih ding ahi.

¹³Gimlim khu chun thu hetsakna chunga zahngaihna chutphah chuh a khuh na dingin, LALPA ma a mei ah gimlim chuh buokkhum in tin, thihna a tuok loh na dingin.

¹⁴Tichun, bâwngchal thisan chuh huntieng lân tin, a khutzung in Zahngaihna chutphah suohlam pang chuh theh intin, zahngaihna chutphah masang chuh thisan chun sagih vei a theh ding ahi.

¹⁵Chun, zie zawh chuleh, mipite gitloh thawihna ding kêlchal chuh that intin, a thisan chuh puonzak sunglam ah lutpih intin; bâwngchal thisan a hih guol mah khan hih ina. Zahngaihna chutphah leh, zahngaihna chutphah masang chuh theh ina.

¹⁶Israel chate gitlohna ziek leh a bawhsiet na teu, a gitlohna teu chengcheng ziekin Munthiengtho a ding chuom in kichamna siem ina; zie guol mah chun, a thienlohna teu lak a um, kihona puon-In a ding inle siem ina.

¹⁷Mun thiengtho a kichamna siem dinga a lut tak leh, amah leh a inkawte leh, Israel mipi chengcheng dinga kichamna siem zo a a hung pawt macheng chun, kuomah, kihona puon-In sunga chuh a um loh dinguh ahi.

¹⁸Chun, hâlmang thillat piekna maichâm lam achun pawt intin, kichamna siem intin; bâwngchal thisan leh kel thisan chuh chawi intin, maichâm kihaw a chun avel in tât ina.

¹⁹A khutzung chun thisan chuh lan tin, sagih vei theh intin, tichun, Israel chate chuh a gitlohnau apat a thiensuohna chuh a siem sak ding ahi.

²⁰Chun, Mun thiengtho leh, kihona puon-In leh, maichâm dinga thiensuohna a siem zawh tak chuleh, kelcha hing chuh lân intin;

²¹Aron chun a khut nih chuh kel hing lu chung achun nga’n tin; achung achun Israel chate manlohna chengte, a bawhsietnau haw chuh phuong in, kel lu chunga chun nga’n tin; tichun, a kaimang dinga mi kiguotsa chun thalek lam achun kaimang ina.

²²Chun, kel chun, a gitlohnau cheng chuh gamthip ah puo mang intin; kel chu thaleka chuh thahdawk ding ahi.

²³Chun, Aron chuh kihona puon-In sunga chun lut intin; Mun thiengtho a a lut laia a patngatpuon silh chuh suohtha’n tin; zie tak achun nusieh ina.

²⁴Mun thiengtho achun kisil intin, a silhlechen haw chun kithuom kit ina. Zie zawh chuleh pawt intin, amah dinga hâlmang thillat leh mipite dinga hâlmang thillat chuh lân ina.

²⁵Tichun, gitloh thawihna thau chuh maichâm chung achun hâl ina.

²⁶Chun, Azazel a dinga kel thahdawk taphawt chun a silhlechen haw chuh sawp intin, kisil intin; zie zawh chuleh, giehmun lama a chieh kit ding ahi.

²⁷Gitloh thawihna bâwngchal leh, kêlchal thisan, tatna siemna dinga Mun thiengtho a kilutpih chuh daikieng a chiehpih a, a êkhaw, a vun haw chu tawh a sa chuh hâl tum ding ahi.

²⁸Ziehaw hâla pang pên chun a puon sawp intin, kisil intin, zie zawh chuleh a giehbuk lam uh a a chieh kit ding ahi.

²⁹Chun, zie hi na kumkhuo dân dinguh hi’n tin; tha sagihna ni sawm ni chun na kisukthien dinguh ahi a, châwl na theih himhim na nasep loh dinguh ahi. A gamsung mi hi henla, gamdang mi na lak u a cheng hilele a nit chiet dinguh ahi.

³⁰Aziek chuh, zie ni hileh sukthientho na hih na dingun tatna siem hi’n tin, LALPA masanga na gitloh na cheng chenguh sukthien hi’n lau.

³¹Zie ni chuh nang u a ding a chawlhni thiengtho hi’n tin, na hinnau na sukgim dinguh, hun hung tung zel ding ale na zuih ding uh ahi.

³²Thiempu hidinga a pa thasanga namdet a um pên pên chun, kithawihna siem intin, patngatpuon silhlechen, puon thiengtho chun kivan intin,

³³Mun thiengtho pên sukthienna ding chun kichamna siem intin, kihona puon-In leh maichâm haw, thiempute leh mipite a ding inle tatna siem kit ina.

³⁴Zie dân hi, hun hung tung zel ding ale nit zel ding ahi. Zie kithawihna hi, kum khata khat vei, Israel chate, a gitlohnau apat a tatna a bawl zel ding ahi. Khutichun, Mosi chun, LALPA’n thu a piek bang tak chun a hih ta a.