Read Gangte THIEMPUDANTE 17 Bible Online

THIEMPUDANTE 17 - Gangte bible

THIEMPUDANTE 17

¹Chun, LALPA’n Mosi a hopih a,

²Aron leh a chapate leh Israel mipite hopih in la, a kawm u ah, ziehi LALPA thupiek chuh ahi.

³Israel chate kuo hita leh bâwngchal ahim belamno ahim kel ahim chuh giehbuk hi henla, dai paw hileh LALPA kawma thillat khat ahim, kihona puon-In kawtkhak bul tihloh a that ta chuh dân bawhsie ahi.

⁴Amah chuh thisan suoh a ngaih ahi a, thisan suoh ngei ahi a, a chipihte lak apat satthak hiding ahi.

⁵Zie chuh Israel chate’n a kithawihna teu, mun danga a thah teu chuh ahun lak u a, LALPA dinga chamna thillat kithawihna a a kithawih theih na dinguh ahi.

⁶Chun, thiempu chun kihona puon-In kawtkhak bula maichâm chuh thisan chun theh viel intin; chuleh, LALPA dinga gimlim tak hi dingin a thau chuh hâl ina.

⁷Israel chate chun, a kithawihnau gancha chuh, mun chuom a that a, kêlchal Pathien kawma kithawihna bawl a; LALPA a dinga ginumlo tak a um tâk loh dinguh ahi. Israel chate chun, zie dân hi, hun hung tung zel ding ale a nit zel dinguh ahi.

⁸Israel inkuon laka mi ahim, gamdang mi a kawm u a um ahim in, hâlmang thillat ahim, kithawihna ahim bawl a,

⁹Kihona puon-In kawtkhak bula, LALPA kawma hun chawilo chuh, a chipihte laka apat satthak hiding ahiu hi.

¹⁰Kuole, Israel inkuon laka mi ahim, gamdang mi na kawm u a khuosa ahim, sa, a thisan puma nete chuh, LALPA lungnatna chuh a chungah um intin, a chipihte lak apat satthak hiding ahi.

¹¹Phehlevo nei hinna chuh thisan a um ahi ngâla, na hinnau a dinga kichamna siemna chuh thisan ngêi chuh ahi ngâla.

¹²Zieziekchun, Israel chate kawma, “Kuoma’n sa, a thisan um nalai chuh na nek loh dinguh ahi; gamdang mi, na lak u a cheng te’n le a nek loh dinguh ahi” ti a a gen kha.

¹³Israel chate laka mi ahim, gamdang mi na lak u a chêngte ahim khatin gamlaka sa ahim, vacha ahim nek theih chi a hun mat chun, a thisan chuh ladawk intin, leivui a vuk khum kit ding ahi.

¹⁴Ganhing chengcheng hinna thu achun, a thisan chuh a hinna ahi a; zieziekchun Israel chate kawma, Bang sa hileh a thisan na nek loh dinguh ahi, kuole a ne taphawt chu, ka mite lak apat satthak a um ding ahiu hi, ti a a gen kha;

¹⁵Chun, zie gam mi hi hi henla, gamdang mi hita leh, ganhing mawk thih ahim, gamsa thah ahim ne ta chuh, a puon uh sawp untin, a kisil dinguh ahi, nitâk lam chanin thienglo in um un tin, zie nung chuleh hung thieng ta’n au.

¹⁶Himahleh, a puon uh a sawp loh u a, a kisil loh u chun, a gitlohna mawh u chuh kipuok un au, ti’n a ti a.