Read Gangte THIEMPUDANTE 18 Bible Online

THIEMPUDANTE 18 - Gangte bible

THIEMPUDANTE 18

¹Chun, LALPA’n Mosi chuh a hopih a,

²Israel chate chuh hopih in la, “Kei hi LALPA na Pathien u chuh ka hi,”

³Na umnau, Aigupta mite thilhih bang kha hih kiu unla, ka hun puih lutna ding, Kanaan gama mite thilhih bang le hih diek kiu unla, a dân u le zawp kiu in.

⁴Ka thupiekte chuh hih unla, ka dante chuh zawp un; Kei hi, LALPA na Pathien u chuh ka hi.

⁵Zieziekchun, ka dân leh ka vaihawm haw chuh na zawp dinguh ahi; zie chuh mi’n a hih chun hin lawh ina, Kei hi LALPA chuh ka hi ngâla.

⁶Chun, LALPA’n zie dante hile a pie a. Na inkuon kinaihpihteu himhim chuh a sangawnnau hâwk dinga na naih dinguh ahi puoi; Kei hi LALPA chuh ka hi.

⁷Na pa sangawnna, na nu sangawnna chuh na hâwk ding ahi puoi; na nu ahi a, a sangawnna na hâwk ding ahi puoi.

⁸Na pa zi sangawnna na hâwk ding ahi puoi, zie chuh, na pa sangawnna ahi.

⁹Na suohpihnu, na pa chanu ahim, na nu chanu ahim, na pienpih ahim, na pienpih loh te ahim chule, kuolpih in, na sukmuolpho ding ahi puoi.

¹⁰Na chapa chanu ahim, na chanu chanu chuh na kuolpih ding ahi puoi, nanga dinga muolphona ahi.

¹¹Na pa zi chanu, na pa hinthak chuh na suohpihnu ahi a, a sangawnna na hâwk ding ahi puoi.

¹²Na pa suohpihnu sangawnna chuh na hâwk ding ahi puoi, na pa Inkuon nai ahi ngâla.

¹³Na nu suohpihnu sangawnna chuh na hâwk ding ahi puoi, na nu Inkuon nai ahi ngâla.

¹⁴Na pa suohpihpa sangawnna chuh na hâwk ding ahi puoh a, a zi chuh na zawt ding ahi puoi.

¹⁵Na monu sangawnna chuh na hâwk ding ahi puoi; na chapa zi ahi a, a sangawnna chuh na hâwk ding ahi puoi.

¹⁶na suohpihpa zi sangawnna chuh na hâwk ding ahi puoi; na suohpihpa sangawnna ahi.

¹⁷Anu leh a chanu sangawnna chuh na hâwk ding ahi puoi; a sangawnna hâwk dingin a chapa chanu ahim, a chanu chanu ahim na neih ding ahi puoi. Na inkuon kinaihpihteu ahiu a, gitlohna huoisie tak ahi.

¹⁸Chuleh, na zi suohpihnu sangawnna hâwk dingin na zi damsung in na neih kawp ding ahi puoh a, a kilanpih dinga a suohpihnu zi a na neih ding ahi puoi.

¹⁹Numei chuh, a tha tin ngeina a, a thien loh sung chun na kipawlpih ding ahi puoi.

²⁰A chunga kisubuok dingin, na invengpa zi na kuolpih ding ahi puoi.

²¹Molek pathien hona dinga na chate na piek loh ding ahi; zie chun, LALPA na Pathien min susie ding ahi ngâl a. Kei hi LALPA chuh ka hi.

²²Numei guolin pasal na kuolpih ding ahi puoi, thil kihdak-um ahi ngâla.

²³Kisukbuokna dingin gancha himhim na kuolpih ding ahi puoi, numei himhim kikuolpih sak dingin gancha masangah a din ding ahi puoi; gitlohna huoisie tak ahi.

²⁴Zie thil haw, a khawimah ahin kisubuok kiu in; ziehaw thilte ahin, na masang u a ka nawhdawk tâk namte kha a kisubuok sek uh ahi;

²⁵a thilhih teu chun gam a subuok u a, LALPA chun a gawt a, a gama chêngte chuh a muhdah sak ahi kha.

²⁶Zieziekchun, nang haw’n vang ka dânte, ka vaihawmte na zawp dinguh ahi; zie thil kihdak-um hi a khawi hile na hih dinguh ahi puoi, na gam u a mi ahim, gamdang mi na lak u a um in le, LALPA dân thupiek hi na zawp dinguh ahi.

²⁷Zie thil kihdak-um chengcheng hi na mau a zie gama ana chêngte khan a hih u a, gam chule ana buok ta a.

²⁸Khutichun, gam chun nanguh hun haw ta puo’n tin, na masang u a chêngte bang khan hun bawl ta puo’ng ka.

²⁹Kuole, zie thil kihdak-um hih taphawt chuh, Pathien chate lak apat satthak a um ding ahi, tih na he ngâl u a.

³⁰Zieziekchun, LALPA chun, “Ka hun thupiek hi zawp unla, a thilhih teu himhim hihin nang haw kisubuok kiu un. Kei hi LALPA na Pathien uh ka hi ngâl a,” a ti a.