Read Gangte THIEMPUDANTE 19 Bible Online

THIEMPUDANTE 19 - Gangte bible

THIEMPUDANTE 19

¹Chun, LALPA’n Mosi a hopih a a kawmah,

²“Israel mipi, kikhawmkhawmte chuh hopih inla, a kawm u ah, ‘Na thientho dinguh ahi; Kei LALPA na Pathien u hi ka thiengtho ngâl a.

³Mitin in na nu leh pateu na zah dinguh ahi a, thu ka hun piek bang takin Chawlhni le na nit dinguh ahi. Kei hi LALPA na Pathien uh ka hi ngâl a,’” ti’n.

⁴“Milim ho kiu unla, milim kisun thawh pathien haw le kisiem kawm diek kiu un: Kei hi LALPA na Pathien u chuh ka hi.

⁵“LALPA dinga chamna thillat a na kithawih tieng u leh, pawm tâk hidinga na lat dinguh ahi.

⁶Na lat ni ngêi u a chuh na nek zawh dinguh ahi, a hihloh leh a zinga na nek dinguh ahi; ni thum ni tienga um zing nalai chuh meia hâl tum ding ahi.

⁷A ni thum ni a um nalaite na nek u chun, thil thienglo ahi a, pawm sak hi puo’n lau.

⁸A ne taphawt chun LALPA thil thiengtho a hih pawlhcheh ziekin a manlohna mawh kipuok intin, zie tawbang mi chuh a chipihte lak apat satthak hi’n a.

⁹“Chun, na lo u a buh na ât tieng u leh, na lo bân tieng u a na ât dinguh ahi puoi, buh sang le na hawl dinguh ahi puoi,

¹⁰Chuleh na grep huon u a asang na hawl dinguh ahi puoh a, a gah pulh le na luok dinguh ahi puoi. Mi chagahte leh gamdang mite dinga na nutsieh sak dinguh ahi, Kei hi LALPA na Pathien u chuh ka hi ngâla.

¹¹“Na gukchak dinguh ahi puoh a, thep leh thuol a thil na bawl dinguh ei puoi, lepchieh na kihilhtuoh dinguh ahi diek puoi.

¹²Chun, ka min susie’n ka min salin bangmah na kitiem dinguh ahi puoi; Kei hi LALPA na Pathien u chuh ka hi.

¹³“Na invengteu na thep dinguh ahi puoh a, na gûk sak dinguh ahi diek puoi. Mi, na thalakteu lawh chuh pie lo in, zan khat le na umsak dinguh ahi puoi.

¹⁴Bengngawng hansie na buokkhum dinguh ahi puoi, mitdûk masang ale a kipalpaihna dingin thil na kawih dinguh ahi puoi; na Pathien u chuh na kihchak dinguh ahi: Kei hi LALPA chuh ka hi.

¹⁵“Vaihawmna achun diklo taka ana hih dinguh ahi puoi; mi chagahte chuh deihsak chuom in, mi hausate chuh na zah chuom dinguh ahi diek puoi; himahleh, na invengte chungah diktakin vai na hawm sak ding ahi.

¹⁶Na chipihte lak ah mi gensie’n asuk atung a na vakviel loh ding ahi. Na invengte hinna thu ah ahilo lama na pan ding le ahi puoi, Kei hi LALPA chuh ka hi.

¹⁷“Na suohpih chuh na lunggil a na hawt ding ahi puoh a, na lungkim lohna chuh amah tawh genkhawm un, khutichun, amah zieka gitlohna na hih ding chuh peltha thei inla.

¹⁸Phuba na lak dinguh ahi puoh a, na chipihte hawtna lungthim le na vawp ding ahi puoi. Nang mah na kihehpih guolin na invengte na hehpih ding ahi zawi. Kei hi LALPA chuh ka hi.

¹⁹“Ka thuguot haw na vawp dinguh ahi. Na gancha achi chuom chuom na suoh sak loh ding ahi; na lo ah le thaichi kibanglo chîngkhawm ki’n; pat leh samul kigankhawm a na kivan ding ahi puoi.

²⁰“Mi khat in, a suok numei chuh mi dang khat kawma zawk dinga thutiemna a neih a, a chaw ding pa chun a man chuh pie nailo hileh, a suok neipa leh numei chuh ana kuolkhawm taleu, thah loh ding ahi a; gawt thawh ding ahiu. A suok a hih naklai ziekin.

²¹Himahleh, kihona puon-In kawtkhak bul ah LALPA kawma bawhsiet thawihna, bawhsiet thawihna ding belamchal ahun kaih ding ahi.

²²Tichun, thiempu chun, a gitlohna sukthienna ah LALPA ma ah bawhsiet thawihna belamchal chun kichamna siem sak in tin, tichun, thil ana hihkhelh zieka a gitlohna chuh ngaihdam hi’n a.

²³“Chun, Kanaan gam na lut tieng u leh, theikung bang hitaleh na chîn u chun, a kum masa, kum thum te chu a thienglo a na ngaih dinguh ahi a, zie kum a chuh na nek loh dinguh ahi.

²⁴Amah vang chuh, kum lina achun, theigah cheng chuh, LALPA a kipahna dingin kawih chuom ding ahi.

²⁵Chun, a kum ngana achun nanguh a ding a apun zel theih na dingin theigah chuh na nek dinguh ahi; kei hi LALPA na Pathien u chuh ka hi.

²⁶“Bang sa hileh, a thisan tawh na nekkhawm loh dinguh ahi, dawi thil leh phunsân le na chîn loh dinguh ahi.

²⁷Mithi sûnna a na sam na met muih ding ahi puoh a, na khabemul sik tuok u le na met dinguh ahi puoi;

²⁸Na taksa teu chuh mithi zieka ât in, thisan na pawt sak ding uh ahi puoh a, na taksa chung u a milim na zik ding u le ahi puoi; Kei hi LALPA chuh ka hi.

²⁹“Na chanu chuh nawchizuok a kawih in, na sukmuolpho ding ei puoi, khutia na hih chun, pathien dangte lama petmang hin na tin, gam chuh nunsietna’n dim ding ahi.

³⁰Chawlhni chuh nit inla, Ka mun thiengthote chuh na zahbawl ding ahi. Kei hi LALPA chuh ka hi.

³¹“Thitha aisânthiem zawlte kawma chu thupiek la dinga na chieh ding ahi puoh a; amau a chuh kisubuok dingin dawithiemte chule na hawldawk dinguh ahi puoi; Kei hi LALPA na Pathien uh chuh ka hi.

³²“Luchang a kelsam kekte masanga chuh na din zel sek ding ahi a, têk mel chu na zah ding ahi; tichun, Pathien zah hiding na hiu hi. Kei hi LALPA chuh ka hi.

³³“Chun, gamdang mi, na gam u a a chên u chun, na bawlsiet dinguh ahi puoi.

³⁴Gamdang mi na lak u a chêngte chuh nanguh dingin na gam u a mi him ahih dinguh ahi; nangmah na kihehpih bang taka na hehpih ding ahi. Nang haw le Aigupta gama khan gamdang mi na hiu kha. Kei hi LALPA na Pathien uh ka hi ngâl a.

³⁵“Thil tehna ah, a sauhlam tehna, a giklam tehna leh a tam lam tehna diklo taka na mat ding ahi puoi.

³⁶Bûkna diktak, khaihna diktak, ephah diktak leh Hin diktak na mat dinguh ahi. Kei hi LALPA na Pathien uh, Aigupta apat hun puidawkpa kha ka hi kha.

³⁷Chun, ka thupiek cheng chengte leh ka vaihawm cheng chengte chuh pawm a, na zawp dinguh ahi; Kei hi LALPA chuh ka hi ngâl a,” ti’n.