Read Gangte THIEMPUDANTE 2 Bible Online

THIEMPUDANTE 2 - Gangte bible

THIEMPUDANTE 2

¹Chun, Mi kuo’nle, LALPA kawma an thillat a lat chun, a thillat chuh changbuong nêl tak hiding ahi a, olive thau sunkhum intin, a chungah gimlim tawh hel ina.

²Chun, Aron chapa thiempute kawma chuh a chawih ding ahi. Amah chun, changbuong leh, sathau leh gimlim chuh a khut khat dim in la’n tin, Chun, thiempu chun maichâm chung achun hetzingna, LALPA kawma mei thillat dingin hâl ina.

³Chun, changbuong thillat um nalai cheng chuh Aron leh a chapate a ding ahi; zie chuh LALPA a dinga mei a thillat thiengtho pên chuh ahi.

⁴Chun, changbuong thillat, thuk chunga ki-upmin thawh a hih chun, changbuong nêl tak, thau a kimek, chawl tello chângthâk ahim, thau a mêk chawl helloh chângthâk pan ahim ahih ding ahi.

⁵Chun, na an thillat chuh, khangbel a kikan thawh changbuong thillat a hih chun, changbuongnel, chawl helloh, thau a kimek changbuong nêl tak ahihding ahi.

⁶Thillat dinga na piek phat leh hekphel in na tin, a chunga thau na sun ding ahi, zie chuh changbuong thillat ahi.

⁷Chun, na an thillat ding chuh thik bela kikang ahih chun changbuong nêl tak thau a kimek hel hiding ahi.

⁸Chun, zie thila chuh kisiem changbuong thillat chuh LALPA kawmah hun la’n na tin, zie chuh thiempu kawma lat hi’n tin, amah chun maichâm a a hun chawih ding ahi.

⁹Chun, thiempu chun an thillat apat in hetzingna ding ladawk intin, maichâm achun hâl ina; zie chuh LALPA a dinga gimlim, meia thillat ahi.

¹⁰Chun, changbuong thillat kilân mawk te chuh Aron leh a chapate a ding hi’n a, zie chuh LALPA a dinga mei a thillat, thil thiengtho pên ahi.

¹¹Changbuong thillat himhim LALPA kawma na lat ding u chuh chawl tello a siem hiding ahi; LALPA a dinga mei a thillat achun chawl ahim, khuoizu ahim chuh na helloh ding uh ahi.

¹²Gah masa thilpiek ding chuh LALPA kawma na hun chawih dinguh ahi, himahleh, gimlim dinga maichâm a chuh na kawih dinguh ahi puoi.

¹³Na changbuong thillat cheng chenguh achun na Pathien u tawh na thuthun uh etsakna chi na hetngilh loh dinguh ahi; na thillat teu chung achun chi na tel sak zel dinguh ahi.

¹⁴Chun, gah masapen apat changbuong thillat LALPA kawma na lat chun, buhvui masapen apat changbuong nêl meia ki-em min na lat ding ahi.

¹⁵Chun, thau sunkhum in na tin, a chunga begaw na kawih ding ahi; zie chuh changbuong thillat ahi.

¹⁶Tichun, thiempu chun buhthak kihêknel neukhat tawh, sathau leh begaw chengcheng chu tawh hetzingna dingin meia a hâl ding ahi; zie chuh LALPA dinga mei thillat ahi.