Read Gangte THIEMPUDANTE 20 Bible Online

THIEMPUDANTE 20 - Gangte bible

THIEMPUDANTE 20

¹Chun, LALPA’n Mosi chuh a hopih a,

²Israel chate kawma ziehi gen dingin a hilh a, “Israel chate lak ahim, gamdang mi na lak u a cheng hilele, a chate Molek pathien hona dinga pie taphawt chuh, mipi chengcheng in suong a sehlup ngêi ngêi ding ahi.

³Kuole, a chate Molek kawma pie a, ka puon-In thiengtho hihbuok a, ka min thiengtho suminsie chuh, amah chuh kiheimang san ing ka ting, a mite laka apat satthak a um ding ahi.

⁴Chun, zie gama mite hin a chateu Molek kawma a piek u a, a kihetloh sak u a, a suklup loh u chun,

⁵Keimah ngêi in amah leh a inkawte chuh nungngat ing ka ting keia dinga ginumlo a, Molek hote chuh do ing ka ting, a chipihteu lak apat satthak in um un au.

⁶“Chun, kuole, amau tawh zawlsai dinga thitha aisânthiem dawng sekte chuh nungngat ing ka ting; amau chuh a mipite apat chun sattha ding ka hi.

⁷Zieziekchun, kihihthiengtho unla, thiengtho in um un, Kei LALPA na Pathien u chuh ka hi ngâl a.

⁸Ka thupiekte chuh na pawm u a, na zawp dinguh ahi, Kei hi LALPA a hun hih thiengthopa chuh ka hi.”

⁹Kuole, a nu ahim a pa ahim hansie lawh ta chuh thah ngêi ngêi ding ahi; a nu ahim a pa ahim a gensiet zieka chuh, a thisan mawh chuh a kipuok ding ahi.

¹⁰Chun, kuole, mi zi tawh va zawlsai a, a invengte zi va zawlsaihpih chuh, a zawlsaipa leh a zawlsainu chuh suklup ngêi ngêi ding ahi.

¹¹Chuleh mi, a pa zi kuolpih ta chun, a pa sumuolpho ahi a, a numei leh amah chuh thah ngêi ngêi ding ahiu ui. A thisan mawh chu a mau chunga chuh um ding ahi.

¹²Mi kuo’n le a monu a kuolpih chun, a nih u a chuh suklup gel ding ahiu ui; nunsietna chungchuong hih ahiu a, a thisan mawh u chu amau in kipuok un au.

¹³Pasal in, pasal mah numei kuolpih banga a kuolpih chun, thil kihdak-um tak hih ahiu a; a nih u a chuh thah gel ding ahiu ui. A thihna mawh u chu amau in kipuok un au.

¹⁴Mi kuo’n le a nu leh a chanu chuh zi a a neih kawp chun, a thum u a chu thah vek ding ahiu ui; thil tenum tak hih ahiu a, zie tawbang thil chu na lak uh a um loh na ding in amah leh amau nih le meia na hâllup dinguh ahi.

¹⁵Mi kuo’n le gancha a kipawlpih chun, amah chuh suklup ngêi ngêi ding ahi a, gancha chule na suklup dinguh ahi.

¹⁶Chun, numei in gancha ava naih a a kipawl sak chun, numei chuh na suklup dinguh ahi a, gancha chule suklup ngêi ding ahi; a thisan mawh u chuh a kipuok dinguh ahi.

¹⁷Mi kuo’n le, a suohpihnu, a pa chanu ahim a kichênpih a, a sangawnna a muh a, ama’n le a sangawnna a muh chun thil zahchâk um tak ahi a, a chipihte lak apat a nawhdawk ding ahi. A suohpihnu kuolpih ahi a, a manlohna mawh kipuok ina.

¹⁸Kuon le, numei a tha tin thi neih lai taka a kuolpih chun, a thipawtna hâwk ahi a, amah chule a thipawtna kihawk ahi a, a nih u a chuh a chipihteu lak apat a sukmangthai ding ahiu hi.

¹⁹Khutichun, na nu suohpihnu ahim, na pa suohpihnu ahim sangawnna chuh na hâwk ding ahi puoi; zie chuh inkuon nai sangawn a siem ahi a, a manlohna mawh kipuok un au.

²⁰Mi kuon le, a pa suohpihpa zi a kuolpih chun, a pa suohpihpa sangawnna hâwk ahi a, a gitlohnau mawh kipuok un tin, cha leh nau neilo in thi’n au.

²¹Mi kuon le, a suohpihpa zi a kuolpih chun, thil thanghuoi a hi a, a suohpihpa sumuolpho ahi a; cha le nau bei in um un au.

²²“Khutichun, ka thupiek chengcheng leh ka vaihawmna cheng chengte na pawm u a, na zuih dinguh ahi; ka hun puih lutna ding gama mite chun a hun nawlh lohna dingun.

²³Na masang u a ka nawhdawk namte dân chuh na zuih dinguh ahi puoi; zie thil haw chuh na hih sek u a, zieziekchun, ka kihdak ahi.

²⁴Himahleh, nang haw kawm achun ‘A gam uh luoh sak ding na hiu a, na goluoh ding u a hun pie ding ka hi, zie gam chuh bâwngnawi leh khuoizu a luong ahi, kei LALPA na Pathien uh, nam dang te apat hun kawihchuom pa chuh ka hi’ ti’n ka na gen tai, a ti a.

²⁵Zieziekchun, sa thieng leh thienglo leh vacha thieng leh thienglo khen tha’n na tin un, sa ahim vacha ahim leia bawkvak chi ahim leh nang u dinga thienglo ka sehkhente achu na hinnau na sukbuok dinguh ahi puoi.

²⁶Keia dinga mi thiengtho na hih dinguh ahi; kei LALPA hi ka thiengtho ngâla, keia na hih na ding u a nam dangte lak apat a ka hun teldawk na hi ngâl u a.

²⁷“Kuole, pasal hileh numei hileh, thitha aisânthiem dawng taphawt chuh suklup ding ahi a; a thisan mawh u chuh a chung u a um ina, le tikit ah,” ti’n.