Read Gangte THIEMPUDANTE 21 Bible Online

THIEMPUDANTE 21 - Gangte bible

THIEMPUDANTE 21

¹Chun, LALPA’n Mosi a hopih a, “Aron chapa thiempute chuh hopih in la, a kawm u ah, A chipihteu laka mithi zieka kuomah a kisukbuok dinguh ahi puoi.

²A inkuon nai teu, a nu ahim, a pa ahim, a chapa ahim, a chanu ahim, a suohpihpa ahim;

³a hihloh leh a suohpihnu pasal nei nailote ziek chun kisubuok kha thei un au,

⁴A chipihteu laka makai pên ahih ziekun a kisubuok dinguh ahi puoi.

⁵“Thiempute chun, lusûn etsakna dinga a luchang uh a met kawlh dinguh ei puoh a, a khabemul sik tuoh u le a met dinguh ahi diek puoi; a sapum u le a ât pawp dinguh ei puoi.

⁶Pathien a dinga mi thiengtho a hih dinguh ahi a, a Pathien min uh a suksiet loh dinguh ahi; LALPA dinga meia thillat te, a Pathien u a ding nek ding sieh te a lat sek uh ahi a; zieziekchun, a thientho dinguh ahi.

⁷Thiempu chun, numei nawhchizuok ahim, minsiesa ahim, a pasal mâk nung ahim chuh a kichênpih dinguh ei puoi; Pathien a dinga mi thiengtho ahi ngâl u a.

⁸Mipite chun thiempute chuh mi thiengtho a a ngaih dinguh ahi a, a ziek chuh, ka kawma an thillat te lân sek a hih ziekun. Kei LALPA chuh ka thiengtho ngâl a; ka mite le ka hih thiengtho ahi.

⁹Thiempu chanu chuh nawhchizuoka a kisukminsiet chun, a pa suminsie ahi a; meia hâllup ding ahi.

¹⁰“Thiempu lienpen, a luchang a sathau nuh a um ta chuh, thiempu puonâk âk dinga kawihchuom ahi a; lusûn a hih suklatna dinga a sam chuh hiet loh a kawih a, a puon le a bawhthek ding ahi puoi.

¹¹Mithi luong umna achun a lut ding ahi puoh a, a nu ahim, a pa ahim thihna ale a kisubuok ding ahi puoi;

¹²Mun thiengtho apat chun a pawtdawk ding ei puoh a, Pathien mun thiengtho le a subuok ding ei puoi; Pathien sathau nuh na chuh a chungah a um a; Kei hi LALPA chuh ka hi ngâl a.

¹³Zi ding chun, nungak thiengtho a neih ding ahi

¹⁴Meithai ahim mâksa nung ahim, numei minsie sa ahim, nawhchizuok ahim chuh a neih ding ei puoi; amah chipihte, nungak thiengtho chuh zi a a neih ding ahi zawi.

¹⁵Chuleh, a chipihte laka thanghuoi taka suon a neih ding ahi puoi. Kei LALPA’n amah chuh ka sukthientho ahi tai,” ti’n a ti a.

¹⁶Chun, LALPA’n Mosi chuh a hopih a,

¹⁷“Aron kawmah, a khang uh chieh zel ale, a suonteu laka demkai taphawt chun Pathien masangah ansieh lân dingin hun naih kiu hen.

¹⁸Kuole, dem kai taphawt chun thillat lân dinga ei hun naih dinguh ahi puoi. Mitdûkte, kêngbâite, piensuolte, a hihloh leh pienzanglo te,

¹⁹Khut bawng ahim, keng bawng ahim, te;

²⁰Mi tingzang bawngte ahim, mi tieh pha lote ahim; mit phalo ahim, phâk natna veite ahim mi phulip nei leh mikiget te chun a lat dinguh ei puoi.

²¹Thiempu Aron suona demkai taphawt chun, mei a thillat lân dinga ka kawm ahun naih dinguh ahi puoi, demkai ahiu a, a Pathien uh sieh la’n dingin ahun naih loh hiel dinguh ahi.

²²Zie tawbang mi chun Pathien a dinga an thillat laka a thiengtho pên leh a thiengtho chuh ne thei gel untin,

²³Amahvang chuh, taksa demkai a hih ziekun, puonzak kieng ahim maichâm kieng nai ahim ah hung thei puo’n au, ka mun thiengtho subuok kha’n au. Kei hi LALPA amau haw hih thiengthopa chuh ka hi ngâla,” ti’n a.

²⁴Khutichun, Mosi’n, zie thu haw hi Aron leh a chapate leh Israel mipite kawma a gen chuh ahi.