Read Gangte THIEMPUDANTE 22 Bible Online

THIEMPUDANTE 22 - Gangte bible

THIEMPUDANTE 22

¹Chun, LALPA’n Mosi chuh a hopih a,

²Aron leh a chapate kawma ziehaw hi gen dingin thu a pie a, “Ka min thiengtho chuh na simmawh dinguh ahi puoh a, Israel chate’n ka kawma a thillat teu chuh na zahbawl dinguh ahi. Kei hi LALPA chuh ka hi a,

³a suonteu laka kuon le, thienglo hizing puma, Israel chate’n ka kawma thillat a hun chawihteu a naih u chun, ka masang apat satthak a um ding ahi. Ziehi hun hung tung zel ding ale na mat dinguh ahi. Kei hi LALPA chuh ka hi ngâl a.

⁴“Aron suonte kuo’n le, phâk natna a vei ahim, a taksa a thilpawt ahim a neih sung chun, thil thiengthote hi a nêk loh ding ahi. Kuole, mithi luong in a sukkhak ahim, amah a thilpawt in ahim,

⁵gancha thi a sukkhak ahim, mithi ahim a sukkhak chun thienglo hi’nau.

⁶Thiempu thienglo ta chuh, nitâk lam tiengin thieng lo in um un au; tuia a kisil masang u chun, thil thiengtho haw chuh a nek loh dinguh ahi.

⁷Nisa a tum phat leh thieng hi’n tin; zie tieng chuleh, thil thiengtho haw chuh ne thei ina, a an dinguh a hih ziekin.

⁸Sa, mawk thih ahim, gamsa peh lup ahim ne a a kisukbuok dinguh ei puoi: Kei LALPA chuh ka hi.

⁹“Thiempute chun dân ka piek hi a zuih dinguh ahi a; khutilochun, thiemmawh chang untin, thi’nau, a ziek chuh, dân thiengtho chuh a zuih loh ziekun. Kei LALPA amau haw hih thiengtho chuh ka hi ngâl a.

¹⁰“Gamdang mite chun thil thiengtho chuh a nek dinguh ahi puoi; thiempute kawma khawsa ahim, mi kithalawh ahim chun le thil thiengtho chuh a nek ding ahi puoi.

¹¹Amahvang chuh, thiempu’n dangka suma a châwk suok ahim, a In a pieng den ahim chun, thiempu chanvo an chuh ne thei ina.

¹²Thiempu chanu chun, gamdang mi a kichênpih chun, pei thillat kithawihna thiengthote laka thil chuh a nek loh ding ahi.

¹³Himahlele, thiempu chanu chuh, cha nei lo in meithai in ahim, mâk ahim a a hung um a, a pa in lama a vaihkit chun, a nungak lai mah bang khan, a pa nek ding chuh ne thei ina. Thiempu inkawte chanu chun a nek dinguh ahi.

¹⁴“Mi’n, thil thiengtho chuh heloa a nek chun, mun nga a khena mun khat chuh piekbeh intin, thil thiengtho chuh thiempu a piek ding ahi.

¹⁵Thiempu chun, thil thiengtho Israel mipite’n LALPA kawma a lat u chuh a sukbuok loh ding ahi.

¹⁶A ne ngeilo dingte nêk sak a, a sukbuok loh ding ahi; khutilochun, a chung u a mawhna tunsak in, gawt a um ding ahiu. Kei LALPA chuh ka hi ngâla, amau chuh ka suthiengtho hi.”

¹⁷Chun, LALPA’n Mosi chuh a hopih a,

¹⁸Aron leh a chapate leh Israel mipite kawma zie dante hi gen dingin thu a pie a, Israel chate ahim, gamdang mi Israel laka chêngte ahim in, hâlmang thillat, a thutiem sukpitin na dingin ahim, mah utthu a thillat ding ahim a a hun piek chun;

¹⁹Pawm sak a hih theihna dingun, bâwng ahim, belam ahim, kel ahim chuh achal dem umlo a lat dinguh ahi.

²⁰Demkai himhim na mat u chun, LALPA’n hun pawm sak lo ding ahi.

²¹Kuon le, thutiem sukpitin na dingin ahim, amah nawp thu a thillat ahim, a belam guol lak apat a LALPA kawma pie taphawt chun pawm tâk a hih theihna dingin dem umlo a lat ding ahi.

²²A mitdûkte, a zawngkhalte, a guh bawngte, piensuolte, meima neite, leh a phâkte chuh LALPA kawma an thillat ding leh mei thillat dinga na piek dinguh ahi puoi; hâlmang thillat in zie tawbang chuh na mat loh dinguh ahi,

²³Mah utthu a thillat achun bâwngchal ahim, belamno ahim, keng sau taluo ahim, a chawm taluo ahim chuh lân thei un na tin, himahleh, thutiem sukpitin na dingin chuh pawm theih hi puo’n a.

²⁴A tilchang kihihdup kha ahim, kikhen pek ahim, kisukêk ahim, ki-âttha ahim chuh LALPA kawma na lat dinguh ahi puoi; na gamsung u ah zie tawbang gan chuh kithawihna dingin le na phal dinguh ei puoi.

²⁵Gamdang mite lak apat a gancha na lak u chuh, an thillat a na piek dinguh ei puoi. Zie a chuh sietna leh dem kaihna a um ziekin; pawm theih hi puo’n a, ti’n.

²⁶Chun, LALPA’n Mosi a hopih a,

²⁷Bâwngchal ahim, belam ahim, kel ahim a hung pien tieng ni sagih masanga api tawh khen loh ding ahi; ni giet ni zawh apat chun LALPA dinga mei a thillat a pawm theih hi’n a.

²⁸Bâwngpi ahim belampi ahim chuh, ni khata a no tawh na thah khawm loh dinguh ahi.

²⁹Kipah thugenna LALPA kawma na neih tieng u leh, nang thasanga pawm tâk a hih theihna dinga na kithawih ding ahi.

³⁰Zie ni mah a chuh nek zawh ding ahi a, a zing tiengin bangmah na sit dinguh ahi puoi, kei hi LALPA chuh ka hi.

³¹“Zieziekchun, ka thupiek haw hi na pawm u a, na zawp dinguh ahi. Kei hi LALPA chuh ka hi.

³²Chun, ka mun thiengtho hi na suminsie dinguh ahi puoi; Israel mipi chengcheng chun, ka thienthona hi a het dinguh ahi. LALPA chuh ka hi a, ka hun hih thiengtho ngâl a;

³³Na Pathien uh hi dinga Aigupta gam apat a hun puidawk chu ka hi a; Kei hi LALPA chuh ka hi,” ti’n.