Read Gangte THIEMPUDANTE 23 Bible Online

THIEMPUDANTE 23 - Gangte bible

THIEMPUDANTE 23

¹Chun, LALPA’n Mosi a hopih a,

²Israel chate hopih inla, a kawm u ah, LALPA guolvakna hunbi, khawmpi thiengtho a na siem dinguh kut haw chuh ziehaw hi ahi, ti’n gen in.

³Ni gup sung chuh na nasep dinguh ahi a, himahleh, ni sagih ni vang chuh na chênna taphawt u ah Sabbath chawlhni ahi a, kikhawpna thiengtho a na mat dinguh ahi a; Zie ni a chuh na nasep loh dinguh ahi.

⁴Ziehaw hih LALPA kutte leh khawmpi thiengtho, amau hunbi zela na nit zing ding u chuh ahi:

⁵A tha khatna ni sawmleli nisa tum chun, LALPA dinga Chiehkân Kut chuh kipan ding ahi.

⁶Chun, zie tha mah ni sawmlenga ni chuh LALPA dinga Chângthâk chawl sawhloh Kut ahi a; ni sagih sung chawl sawh loh chângthâk na nek dinguh ahi.

⁷A ni khat ni chuh khawppi thiengtho hi’n tin, châwl na theih himhim na nasep loh dinguh ahi.

⁸Mahleh, ni sagih sung chuh LALPA kawma mei a thillat chuh na lat dinguh ahi. A ni sagih ni chuh khawmpi thiengtho hi’n tin, châwl na theih himhim na nasep loh dinguh ahi.

⁹Chun, LALPA’n Mosi kawmah hiti hin a gena, LALPA’n ahun piekna gam chuh na va tun u a; na buh hawu na ât tieng u leh,

¹⁰Gah masa, buhphal masapen chuh thiempu masanga na hun chawih dinguh ahi.

¹¹Chun, amah chun, buhphal chuh pawm sak na hih theihna dingun LALPA masang ah ana zap intin zie chuh chawlhni beih zawh a zingkal chuleh thiempu’n a zap ding ahi.

¹²Chun, buhphal na zap niu chuleh belamchal, kum khata upa, demna bei chuh LALPA kawma hâlmang thilpiek a na lat dinguh ahi.

¹³Chun, zie a changbuong thillat chuh, changbuong nêl chi ephah mun sawma khena mun nih thau a kimek LALPA dinga gimlim tak meia thillat ahih ding ahi; chun zie a dâwn ding thillat chuh uain hin mun li a khen mun khat ahih ding ahi.

¹⁴Chun, chângthâk ahim, a kikang ahim, buhvui kikang ahim chuh zie ni a na Pathien masanga thillatna bawl masang u a chuh na nek loh dinguh ahi. Zie dante hi na khang na khang u a na zuih zel ding u a thutiem ahi.

¹⁵Chun, chawlhni bei zinga nanghaw’n buhphal na hun chawih u a pei thillat na hun lat niu apat chun sim pan un la, chawlhni sagih na sim dinguh ahi.

¹⁶Chun, chawlhni sagih tin ni zing chana chuh ni sawmnga na sim dawk dinguh ahi zie ni chuleh LALPA kawma buh thak thillat dang na lat kit dinguh ahi.

¹⁷Inkuon tinin chângthâk pêk nih na hun chawih u a, LALPA kawma pei thilpiek a na lat dinguh ahi. Chângthâk pêk chuh changbuong ephah mun sawm a khen mun nih chawl tawh mêk hel a, LALPA kawma gah masa thillat a na piek dinguh ahi.

¹⁸Zie chângthâk chu tawh belamno sagih, demna bei, kum khata upa, bâwng tuoi khat tawh, belamchal nih tawh na lat khawm dinguh ahi. Zie chuh changbuong thillat tawh dâwn ding thillat chu tawh LALPA kawma hâlmang thillat a lat khawm ding ahi a, LALPA dinga gimlim tak, mei a thillat hi’n a.

¹⁹Chuleh, gitloh thawihna dingin kêlchal khat leh, chamna thillat dingin belamno a chal nih, kum khat a upa, a lat dinguh ahi.

²⁰Thiempu’n a siem masak pên chângthâk chuh belamno nih chu tawh, LALPA ma a pei thillat in pei in tin; thiempu chanvo, LALPA dinga thiengtho hi’n a.

²¹Chun, zie ni chuleh khawmpi thiengtho na bawl dinguh ahi a, châwl na theih himhim na nasep loh dinguh ahi.Zie hih na chênnau cheng u a na nit zing dinguh u leh na suonteu inle a hun zuih zel dinguh dân chuh ahi.

²²Chun, na lo u a buh na ât tieng u leh, na lo bân tâwp chan u a na ât dinguh ahi puoh a, buh sang le na hawl dinguh ahi puoi: mi gimtheite leh gamdang mite a dinga na nutsieh sak dinguh ahi; kei hi LALPA na Pathien u chuh ka hi, ti’n a ti a.

²³Chun, LALPA’n Mosi a hopih a, Israel chate kawm achun hiti hin gen ah, tha sagihna, ni khat ni chuh, chawlhni thiengtho ahi a,

²⁴melchikna pengkun mût a, pengkun Kut na mat dinguh ahi a, zie ni chuh khawmpi thiengtho ahi.

²⁵Na himhim na sep dinguh ahi puoh a, LALPA dinga mei a thillat na lat dinguh ahi.

²⁶Chun, LALPA’n Mosi kawmah hiti hin a gena, A tha sagihna, ni sawm ni chuh, kum tina mipite dinga gitloh thawihna ni hi’n a.

²⁷Tha sagihna ni sawm ni chuh Tatna ni ahi a, nang u dingin kikhawppi thiengtho hi’n tin, na hinnau na sukgim dinguh ahi. Chun LALPA masang a mei thillat na lat dinguh ahi.

²⁸Zie ni chuleh châwl theihna na himhim na sep loh dinguh ahi, a ziek chuh zie ni chuh LALPA na Pathien uh masang a tatna ni ahi ngâla.

²⁹Kuole, tatna ni a amah leh amah kihengilh lo taphawt chuh a chipihte lak apat satthak hi’n a.

³⁰Chun kuole, zie ni a hi nasem taphawt chuh, zie ni mah a chuh sukchimit hi’n tin, a mite lak apat paih dawk hiding ahi.

³¹Na chênna cheng u a na sem lo a na nit zing dinguh ahi a, na suonteu in akhang akhang a na zuih dinguh a thupiek ahi.

³²Zie ni chuh nang u dinga chawlhni ahi a, thiengtho taka na nit dinguh ahi, chuleh, na kisukgim dinguh ahi; Zie tha, ni kuo ni apat a chuh na nit pat dinguh ahi a, a zing nitâk chana chawlhni chuh na nit dinguh ahi;

³³Chun, LALPA’n Mosi kawm achun hiti hin a gena,

³⁴Israel chate kawm achun hiti hin gen ah: Tha sagihna, ni sawm leh nga ni chuh LALPA dinga Bawkcha Kut ahi a; ni sagih sung na mat dinguh ahi.

³⁵A ni khat ni chuh kikhawpna thiengtho hi’n tin, na himhim nasep loh dinguh ahi.

³⁶Ni sagih sung chuh LALPA masanga mei thillat na lat dinguh ahi.Ni giet ni chuh kikhawpna thiengtho hi’n tin; LALPA masanga mei thillat na lat dinguh ahi a, khawmpi thiengtho ni a chuh thachawl na theih na himhim na sep loh dinguh ahi.

³⁷(Ziehaw hi LALPA guolvakna hunbi, LALPA kawma mei manga thillat haw, hâlmang thillat te, changbuong thillat te, dâwn ding thillat te, kithawihnate, a ni bîk chieta lat dinga kikhawppi thiengtho a na siem ding teu chuh ahi.

³⁸Zie Kut hi a ngeina banga Sabbath na mat sekteu chunga behlapna ahi a, na thillat teu chule thillat vantâng, thutiem sukpitin na dinga na piek teu ahim, nawp thu a na thillat te ahim, LALPA kawma na lat sekteu tih loh a na nit ding hawu chuh ahi.)

³⁹Chun, gamsung a thai gah na lâkkhâwm zawh tieng u leh, tha sagihna ni sawm leh nga ni akipat chuh LALPA dinga guolvakna chuh ni sagih sung na neih dinguh ahi. A ni giet ni chuh Sabbath chawlhni tawh kituok kit ding ahi.

⁴⁰A ni khat ni chun na thei gah phapenteu, tum bâkte, theubawk te leh luia huisum haw chuh hun chawi un na tin, LALPA na Pathien uh masang achun kipâk takin ni sagih sung na um ding ahi.

⁴¹Zie guolvak hi kum cheng leh LALPA dinga ni sagih sung na mat sek dinguh ahi.

⁴²Israel mi cheng chuh sawlbuk a ni sagih sung a um dinguh ahi. a,

⁴³Tichun, Israel chate chuh Aigupta gam apat ka puihdawk lai khan sawlbuk ah ka um sak hi tih na suon teu chun hethei un au: kei hi LALPA na Pathien u chuh ka hi, a tii ti’n.

⁴⁴Khutichun Mosi’n, Israel mipite’n LALPA limbawlna a Kut a mat ding danteu chuh a phuong ta a.