Read Gangte THIEMPUDANTE 24 Bible Online

THIEMPUDANTE 24 - Gangte bible

THIEMPUDANTE 24

¹Chun, LALPA’n Mosi a hopih a,

²olive thau thieng tak, det dinga kithawk chuh thaumei det vak zing na dinga na kawma hun chawi dingin thupie’n.

³Thugawlh kawihna thingkuong masanga, puonzak pawlama LALPA umna puon-In a chun, nitâk cheng leh, zingkal tiengin Aron chun thaumei chuh a det ding ahi. Zie dân hi na suon zel teu chana kumkhuo dân ding ahi.

⁴LALPA masanga thaumei tunna sana thieng tak chunga chun thaumei haw chuh a maban cha a a kawihtup ding ahi.

⁵Chun, changbuong nêl tak la’n la, chângthâk sawmlenih na siem ding ahi; chun, chângthâk khat chuh ephah mun sawma khena mun nih hiding ahi.

⁶Chun, LALPA ma a sana dawhkhâng thiengtho chungah tien nih in tieng in la, tien khata gup gel gel a na tien ding ahi.

⁷Chângthâk chungah a tien nih chun begaw thieng tak na kawih ding ahi, hetzingna, LALPA dinga mei a thillat bang ahih theih na dingin.

⁸Chawlhni cheng leh Aron in LALPA ma a aban bana a kawih zing ding, Israel chate kumkhuo a a kipumpieknau etsakna ahi

⁹Chun, zie chuh Aron leh a chapate chanvo hi’n tin; mun thiengtho a a nek dinguh ahi, kumkhuo dana LALPA dinga mei thillat te laka amah a dinga thil thiengtho pên ahi, a ti a.

¹⁰Chun, Israel numei chapa, a pa Aigupta mi khat chuh Israel suonte kawmah a va chieh a tichun, amah chu tawh Israel mi khat chuh giehbuk achun a kisuol u a,

¹¹Israel numei chapa chun hansie lawh in Pathien a gensie a, tichun Mosi kawmah ahun pui u a. (Anu min chuh Shelomith ahi a, Dan nam a Debri chanu ahi.)

¹²LALPA kama thu pawt ngak na dingin pindan ah a khum tau a.

¹³Chun, LALPA’n Mosi kawmah,

¹⁴“Hansie lawhpa chuh giehbuk pawlam ah puidawk inla, a hansie gen za taphawt chun a lu chung ah a khut uh nga chiet u hen la, mipi chengcheng chun suongin sep u hen.

¹⁵Chun, Israel mipite hopih in la, kuole, Pathien hansie lawh ta chun, a gitloh mawh kipuok intin,

¹⁶Chun, kuole LALPA min gensie taphawt chuh suklup ngêi ngêi ding ahi; mi cheng cheng in suong a a seh ngei ngêi dinguh ahi: LALPA min a gensiet u chun gamdang mi le, zie gama mi himhim le suklup ding ahi.

¹⁷“Kuole, tuolthat chuh amah le thah ngêi ngêi ding ahi.

¹⁸Kuole, mi dangte gancha that chun a piek thuk teitei ding ahi. hinna thasang a hinna tih ahi ngâla.

¹⁹“Kuon le, a invengte a sukliem chun, a hih bang chuh amah chung ale hih thuk teitei ding ahi.

²⁰Guh sika guh, mit sika mit, ha sika ha, mi a sukliem banga chuh amah le sukliem ding ahi.

²¹Kuole, gancha that taphawt chun a ditthuk kit ding ahi a, kuole, tuol that taphawt chuh thah thuk kit ding ahi.

²²Chun, gamdang mite a ding leh zie gama mite a ding hin dân kibang na neih dinguh ahi. Kei hi LALPA na Pathien uh ka hi, na tih ding ahi” ti’n a gena.

²³Chun, Mosi’n zie thu chengcheng chuh Israel chate kawma a gen zawh phetin, hansie lawhpa chuh giehbuk pawlam ah a puidawk u a, suongin a sep lum tau a. Tichun, Israel chate chun Mosi kawma LALPA thupiek guol chun a hih tau a.