Read Gangte THIEMPUDANTE 25 Bible Online

THIEMPUDANTE 25 - Gangte bible

THIEMPUDANTE 25

¹Chun, Sinai tâng achun LALPA’n Mosi a hopih a,

²Israel suonte hopih in la, a kawm u ah gam ka hun piek dinga chuh na va lut tieng u leh, a gam chuh LALPA min a a chawlh ding ahi.

³Kum gup sung chuh na lo u achun thai chîng un na tin uh, na grepteu tho hah un na tin uh; a gah te chuh na lâkkhâwm dinguh ahi.

⁴Himahleh, a kum sagihna achun gam chuh a chawlhdam ding ahi; LALPA min a chawlhna hi’n a; Na loteu ah thai na chîn dinguh ahi puoh a, na grep huonteu le na thawh hah dinguh ahi diek puoi.

⁵Na buh likekteu na ât dinguh ahi puoh a, na etkawl loh uh grep le na lawh dinguh ei puoi; a gam leisiet a ding a chawlhdam na ahi ding ahi.

⁶Zie kum sung cheng chun gam chu thawh loh in um mahleh, nang haw dingin nek ding hun sepdawk intin, gamdang mi na kawm u a chêngte dingin leh, na In ganteu leh gamsate dingin, gam gahte chuh a nek dinguh hi’n a.

⁷Na gancha teu leh gamsung a ganhing te a ding inle gamsung a pieng taphawt chuh na nek dinguh ahi.

⁸Chun, chawlh kum kum sagih chuh sim un na tin un, kum sagih mun sagih hi’n a; chawlh kum, kum sagih sung chuh sawmli leh kuo hi’n a.

⁹Chun, a tha sagihna, a ni sawm ni chun gamsung pumpi achun pengkun ngeih tak chuh mût viel sak in na tin; kichamna ni chun na gamsung cheng u ah pengkun na mût viel sak dinguh ahi.

¹⁰Chun, kum sawmnga na chuh na nit thiengtho dinguh ahi a, gamsung pumpi leh a mipite a ding a zalenna na phuon dinguh ahi a, nanguh a dinga Jubili hiding ahi. Mitin in nangmau a mah kha nei kit in na tin uh, mitin nangmau insung chiet ah um kit un lau. Suok a zawk a umte cheng chule amau inkawte kawm chieta a chieh kit vek dinguh ahi.

¹¹Kum sawmnga na chuh nanguh dingin Jubili hi’n tin, thaichi chîng puo’n na tin un, ât le ât diek puo’n lau, buh likekte chule na ât dinguh ei puoi, chuleh grep na thawhhah lohteu chule na lakkhawm dinguh ei diek puoi.

¹²Jubili ahi a, nang u dinga Thiengtho hi’n tin, na lo u a thai hung piengte chauh chuh na nek dinguh ahi.

¹³Zie Jubili kum hin, thil a na kizuoksa cheng chuh a neipa kawma piekkit vek ding ahi.

¹⁴Khutichun, na invengte kawma na zawk ahim na châwk ahim inle na kilep bawl tuoh loh dinguh ahi.

¹⁵Jubili nunga a kum um zat bang zelin na invengte thil chaw’n na tin, buh leh bâl pien tam dân dungzui in na kawma a zuok ding ahi.

¹⁶A kum tam dân zilin hih pung in na tin, chun, a kum tawm dân zilin aman chuh hih niem ding na hi; buh leh bâl pawt kum tam dân zil zelin na kawma zuok ding ahi.

¹⁷Na kithep dinguh ahi puoh a, himahleh, na Pathien chuh na kihchak ding ahi; a ziek chuh, kei hi LALPA na Pathien uh ka hi ngâla.

¹⁸Zieziekchun, ka thuguot te chuh na zawp u a, ka thugawlhte chuh na pawm u a na bawl dinguh ahi; ti a chuh zie gama chuh thamuong taka khawsathei ding na hiu hi.

¹⁹Gam chun gahsuoh intin kiningting takin chên un na tin uh, thamuong taka va khawsa ding na hiu hi.

²⁰Aleh a kum sagih kum chun bang ka ne ding um, thaichi chîng lo ding ka hi ngâl u a, ka lo hawu a gah le lakhawm lo ding ka hi ngâl u a, na tih u chun,

²¹a kum gup kum chun ka vangsakna na chung u ah tunsak ing ka ting, kum thum sunga dingin gahsuoh ina.

²²Chun, a kum giet na a lo a thaichi na chîn tieng u leh, kum gup sunga na thawhdawk sau kha ne nalai ding na hiu a, na buh chîn uh a tun kit masang cheng chuh nek ding kiting taka nei ding na hiu ui.

²³Gam chuh na zawk mang den loh dinguh ahi, nang haw a ahi puoh a; gam chuh keia ahi ngâla; malzin leh khawpem ka kawma khawsa maimai na hi ngâl u a.

²⁴Gam na zawk u chun, a gam neipa châwk kit ding na phalsak dinguh ahi.

²⁵Israel mi khat chuh hung chagah a, a gam a zawk chun, a inkuo kinaihpih pên in a tat kit ding ahi,

²⁶Amahvang chuh, a tat sak ding nei lo a, ama’n a tat kitna ding kham a hun neih kit chun,

²⁷A chawpa kawm achun Jubili tun kitna ding kum um nalai chengin a hun sepdawk theih ding zah hisap in pie hen la; tichun, a gam chuh chang kit ina.

²⁸Himahlele, tatdawkna ding kham a neih zawh loh chun, a gam chuh Jubili hungtun kit macheng chuh a chawpa thuneihna nuoia chu um zing intin; Jubili hungtun kit tieng chuleh vang, a neipa kawma chu piek kit ding ahi.

²⁹Mi’n, khawpi kulh bâng nei sunga in a zawk chun, a zawk apat a kum khat a tinna achun a tat kit theih ahi, kum khat pum lûm chuh tat kit theihna nei ina.

³⁰Himahlele, kum khat sunga chuh a tat kit theih loh chun, kulh nei khawpi sunga a in chuh kumkhuo’n a suon zelte chan inle a chawpa chang den intin, Jubili kum chun le piekkit hita puo’n a.

³¹Himahlele, kulh bâng nei lo a Inhaw chuh gam châwk tawh kibang ahi a, a neipa chun châwk kit theihna a nei a, Jubili ah pawtdawk ina.

³²Amah vang chuh Levi te chanvo khuo a In haw chuh Levi te chun bangtik inle tan thei un au.

³³Zie tawbang khawpi, Levi te kipie laka khat chuh Levi te chun a zawk u chun, Jubili kum achu piek kit ngêi ngêi ding ahi; khawpi chuh Israel chate lak apat a a gochan ding u a piek a hih ziekun.

³⁴Himahlele, a khuo kimvela gancha tatna mun haw chuh vang zuok theih hi puo’n a, amau haw gochan ding a piek a hih ziekun.

³⁵Na suohpih, amah ki-enkawl theilo khawpa chagah in ahun belh chun, na khawmtuoh ding ahi; na In a mi na gawihte laka khat guolin na piek ding ahi, ti a chuh na kawma a khawsak theihna dingin.

³⁶Amah apat sum pung ahim na lak ding ahi puoh a, Pathien na kihchak a, na suohpih chuh na kawma a khawsak theihna dingin.

³⁷A pung delh in na sum na palâksak ding ahi puoh a, nek ding a kawma na piek chule a lawkna lak ding ahi puoi.

³⁸Kei hi LALPA na Pathien uh, Kanaan gam hun pie ding leh na Pathien uh hidinga Aigupta gam apat a hun puidawkpa kha ka hi.

³⁹Chun, na suohpih ahung chatgah a, na kawma ahung puklut chun suok guola na nasep sak ding ahi puoi:

⁴⁰mi na gawihte banga na kawma na umsak a, Jubili hungtun masang cheng chuh na na a sep ding ahi.

⁴¹Jubili hungtun kit phat chuleh, amah leh a chate chun hun pawtsan untin, a suonteu chênna lam ah chieh kit intin, a pileputeu In leh lo a luoh kit dinguh ahi.

⁴²Israel mipite chuh LALPA suokte ahiu a, Aigupta gam apat a a puih dawk ahiu a; suok zawk a zawk loh ding ahiu ui.

⁴³Achung u ah husie takin vai na hawm dinguh ahi puoh a, na Pathien chuh na kihchak zawk dinguh ahi.

⁴⁴Chun, suok numei leh pasal na neih ding teu chuh na kimvel u a namte laka mi, suok nu leh suokpa ding na châwk dinguh ahi.

⁴⁵Chun, gamdang mi, na kawm u a chêngte cha haw le chaw thei unlau. Zie tawbang naupang, na gam u a pieng dente chuh na matchâk uh hin au.

⁴⁶Chun, na nung u a na chateu sawm zel dingin a mi leh sa dinga siem zel dingin siem un na tin, amau haw chuh kumkhuo a na suok dingun nei un lau; amahvang chuh na suohpih uh Israel suonte khat leh khat kal a husie taka vai na hawm loh dinguh ahi.

⁴⁷Chuleh, na lak u a gamdang mi kuo ahim khat chuh hung hausa ta hen la, chun, na Israel mi chanpih chuh hung chagah ta hen la, zie gamdang mi ahim, a inkawte kawm ahim achun a suok dingun va kipie ta leh,

⁴⁸zawk a hih tâk nung chun le, tat kit theih hi’n tin, a suohpihte laka khatin tan thei un au.

⁴⁹A pa suohpih pa ahim, a pa suohpihpa chapa ahim in tan thei intin, a chipihte laka a Inkuon kinaihpih khat inle tan thei intin, chun, amah le ahung neih zawh kit chun kitan thei ina.

⁵⁰Amah a na chawpa chu tawh a kizuok apat Jubili kum ding sutkhawm u henla, a kizuok man chuh a kum tam dân zil hi’n a; tichun, kithalawh a kiguoite piek dungzui zela piek hi’n a.

⁵¹Kum tam takin a hal chun a beih sung gûn kilawm man a piek ding ahi.

⁵²Jubili kum tunna ding, kum tawmcha mai um ahih chun; amah tawh sutkhawm untin, a kum tam dân zilin a kitatna ding paisa a piekkit ding ahi.

⁵³Nam dangte nuoi a nek kithalawh, a kum-akum a kiguoite tawh kibang hi ding ahi. na mit muh a amah chuh a bawl gimtheih ding ahi puoi.

⁵⁴Khutia chuh a pawt loh ngâl chun, amah leh a chate chuh, Jubili kum hungtun kit tak leh pawtsak hi chauh ding ahiu ui.

⁵⁵Israel mi chuh suok in um den thei lo ding ahi a, Israel mipite chuh LALPA suokte a hih ziekun. Aigupta gam apat in a puidawk a; kei hi LALPA na Pathien uh ka hi ngâl a.