Read Gangte THIEMPUDANTE 26 Bible Online

THIEMPUDANTE 26 - Gangte bible

THIEMPUDANTE 26

¹LALPA chun, “Milim pathien na kisiem dinguh ahi puoh a, suong milim geikuok ahim, suongphuh ahim le na phuh dinguh ahi puoh a, ho leh bieka neih ding inle na gam u ahin milim kizikna suong na phuh dinguh ei puoi: Kei hi LALPA na Pathien u chuh ka hi ngâl a.

²Ka chawlhni chuh na nit dinguh ahi a, ka mun thiengthote chuh na zah dinguh ahi. Kei hi LALPA chuh ka hi.

³“Ka dân guola na tawih u a, ka thupiek haw na zawp u chun;

⁴A hun takin van guoh tui hun zuk sak ing ka ting; tichun, gam chun gah hun suoh intin, thing chun le gah hun suoh un au.

⁵Na buh phuol u a buh chun grep lawh hun man pha’n tin, na grep lawh u chun na thai chîn hun man pha’n tin, na chângthâk u chuh nieng leh nâl in ne’n na tin un, na gam u ahin thamuong takin khawsa’n lau.

⁶“Chun, gamsung chuh gâlmuong takin umsak ing ka ting, kuol hiet hiet un na tin, kuoma’n hun sulau puo’n a; gamsa gilohaw chuh zie gam apat hin nawhmang ing ka ting; chemzâm in na gam uh ah vaihawm ta puo’n a.

⁷Chun, na melmateu chuh delh un na tin, na masang u ah chemzâm a thah in um un au;

⁸Mi nga’n za khat delh un na tin uh, zakhat in sangsawm delh un na tin, na melma teu chuh na mau ah chemzâm a thah in um un au.

⁹Chun, hun vangsak ing ka ting, chi tamtak hun hun suon sak ing ka ting; hun supung ing ka ting; chun, na chung u ah ka thuthun sudet ing ka.

¹⁰Chun, sawttak na kawih uh a lui haw chuh neu in na tin, a thak kawihna dingin a lui haw chuh thak dawk un lau.

¹¹Chun, na lak u a ka hobuk chuh um sak ing ka ting, ka hinna chun nang haw hun kihei mangsan ngei lo ding ahi.

¹²Na laku ah cheng ing ka ting, na Pathien uh hing ka ting; nang haw le ka mite hi’n lau.

¹³Kei hi LALPA na Pathien uh, a suok uh na hih loh na ding u a, Aigupta gam apat a hun puidawkpa chuh ka hi; na namkawlteu chuh ka subawng a, chang taka dingin ka hun chieh sak hi” ti’n.

¹⁴“Himahleh, ka thupiekte na zawp loh u chun, gawt a um ding na hiu ui.

¹⁵Ka dân zawp nuom lo a, na hinnau in ka vaihawmte a hawt a, ka thupiekte leh nang haw tawh ka thugawlh na bawhsiet u chun,

¹⁶ken le na chung u ah ziehi bawl ing ka, na chung u ah thil lauh-um tak, na hinnau sumuih hiei hiei leh na mit uh suhat lo hiei hiei, kum zawn natna leh khawsik dam theilo lênsak ing ka; chun, na thaichi teu chuh na chi’n thâwn maimai uh hi’n a, na melma teu chun ne zel ding ahiu hi.

¹⁷Nang haw hun do ing ka ting, zawhin um un na tin uh, nang haw hun mudahte’n na chungu ah vaihawm un au; tiza mah mah un na tin uh, kuomah delh loh in taisie’n lau.

¹⁸“Ziehaw cheng nunga hile ka thu na zawp diek loh u chun, ka hun gawtna chuh a leh sagih in hih pung ding ka hi.

¹⁹Na hâtnau na suon pên uh chuh hihsie’ng ka ting, na chung u a van chuh thik bangin siem ing ka ting, lei chule sumeng bangin tâk sak ding ka hi.

²⁰Chun, na sep gimnau chuh phatchuomna bei hi’n tin, gam laka thing nasan inle gahsuoh diek ta puo’n au.

²¹“Nei dal u a, ka thu na zawp loh naklai u chun, na gitlohna teu zilin ka gawtna chuh aleh sagih in hihpung kit ing ka ting,

²²na laku ah gamsa lauh-um tak hun sawl ka ting, na chateu that untin, na ganguolteu hun peh sak un tin; tawmcha mai nutsieh in um un na tin, na lampiteu chuh hung thip dil del ina.

²³“Khutisa a chule ka thununna na pawm loh u a, ei kalh lama na um zing u chun,

²⁴keile nanguh kalh lam in um ing ka ting, keimah ngêi in na gitloh ziekun sagih vei sanga tamzaw’n hun gawt ding ka hi.

²⁵Na chung u ah chemzâm pan ing ka ting, zie chun thuthun na bawhsiet ziekun phuba la’n tin, na khawpiteu a na taihkhawm tieng u leh na lak u ah hi lênsak ing ka ting, melmate khuta piek hi’n lau.

²⁶Na nek muh na lampiu hun suktan sak ing ka ting, zie tieng chuleh, numei sawm in thuk khat ah chângthâk kang untin, na chângthâk u chuh teh det det in hun pie kit untin, neu in na tin un vah diek puo’n lau.

²⁷“Khutisa a chule ka thu na pawm loh u a, ei kalh lama ana um zing naklai u chun,

²⁸ka lungnatna hun taksuoh ka ting, na chung u a ka lungnatna chuh a huoisie zawsem in sagih vei behlap ding ka hi.

²⁹Na chapateu sa neu in na tin, na chanauteu sa le ne’n lau.

³⁰Chun, na munsang teu suchim ing ka ting, na nisa limteu, na gimlim hâl nau maichâmte chuh hihchim ing ka, chuleh, na luongteu chuh na milim pathien uh gawpsate chung achun paih ing ka. Ka lungnatna a tâwp khawk a tun tâk ziekin.

³¹Na khawpiteu chuh suhawm ing ka ting, na pathien hona mun teu hihsie’ng ka ting, na kithawihnateu chuh pawm ta puo’ng ka.

³²Na gam u chuh a hawm in um sak ka ting, tichun, na melmateu, a gam luohte chun a muh tieng u leh mak a sak hiel dingun hih sie’ng ka.

³³Chun, nam dangte lak ah hun thehzak ing ka ting, ahun delh dingin chemzâm chuh zûk dawk ing ka; tichun, na gam u chuh a hawm in um intin, na khawpiteu chuh suksiet sa a nutsieh in um ina.

³⁴Chun, gam chuh a hawma a um sung cheng leh, na melmateu gama na um sung cheng u chun gam chun a chawlhna ni mang in kipâk takin um ina.

³⁵A hawma a um sung cheng chun châwl intin; na um lai u a chawlhni a châwl sek lo haw kha,

³⁶“Nang haw laka mi, gam danga sala mata umte chung achun timul thawh um tak, lauhna tunsak ka ting, huih in nahpa a mût git lau in tai un au. Chemzâm masanga taisie bang mai in tai un na tin, kuomah delh loh in puksie’n lau.

³⁷Chun, kuomah delh hi sâm lo in, chemzâma delh bang mai in kipalpai tuoh lemlum un na tin; na melmateu ana nang dingin hatna mawng mawng nei puo’n lau.

³⁸Tichun, nam dangte lak ah mangthai un na tin uh, na melmateu gam chun hun valh zo un au.

³⁹Chun, na lak u a mi nutsieh haw chuh na suonteu gitlohna ziek leh nang haw gitlohna ziek chun muih tum hiei hiei un au; a pileputeu in a manlohnau a muih tum lawh bangun amau inle a gitlohna ziekun mangthai un au.

⁴⁰“Himahlele, Ka chunga a gitlohnau leh a manlohnau leh a pileputeu manlohna leh ei kalh lama a um ziek u a,

⁴¹Melmate khuta pie a, amau haw do ding khawpa ei suklungnat ziek un a gitlohnau chuh phuong un au. Atawp a, na tu leh chateu chuh a hung kingaihniem u a, a helnau leh a gitlohna ziek u a gawt a hih nung u chuleh,

⁴²Jakob kawma ka thuthun chuh hezing ka ting, Isak leh Abraham te kawma ka thugawlh khale hezing ka ting, mipite kawma gam piek dinga ka kitiemna chuh hih thak ing ka, ti’n.

⁴³Himahleh, amau chun gam chuh taihsan ding ahiu a, amau haw umlo a a hâwma a um sung chun, a Sabbath kum haw achun kipâk ina; ka vaihawmna te a deihloh ziek u leh, a hinnau in ka thuguot te a hawt sek ziekin, a manlohnau gawtna chuh a pawm dinguh ahi.

⁴⁴Khutisa chun le a melmateu gama a um u chuh, amau haw hih mang kêi ding leh, a chung u a ka thuguot te bawhsie’n paih tha puo’ng ka ting hawt le haw puo’ng ka; Kei hi LALPA a Pathien uh ka hi ngâla.

⁴⁵A suonteu kawma ka thugawlh chuh siemthak ka ting, Kei, LALPA a Pathien uh ka hi tih etsakna dinga mipite Aigupta gam apat a, ka thilhih theihna a puidawkpa chuh ka hi ngâla,” ti’n.

⁴⁶Ziehaw hi Sinai tânga Mosi manga LALPA’n amah leh Israel suonte kala a siem thupiekte, vaihawmna haw leh dante chuh ahi.