Read Gangte THIEMPUDANTE 27 Bible Online

THIEMPUDANTE 27 - Gangte bible

THIEMPUDANTE 27

¹Chun, LALPA’n Mosi a hopih a,

²Israel chate hopih in la, a kawm u ah, Mi khat in bang ahim thilkhawk diek chunga LALPA a dinga thu a tiem chun, a mihing tawh kigûn a na guot bang chuh LALPA a ding hi’n tin.

³Chun, pasal kum sawmnih a kipata kum sawmgup kikal chuh, a guot dân ding chuh mun thiengtho sekel banga dangka sekel sawmnga gu’n hi’n a.

⁴Numei piting ahih chun na guot dân ding chuh sekel sawmthum hi’n a.

⁵Chun, pasal naupang kum nga leh kum sawmnih kal a te chuh, dangka sekel sawmnih a tat theih hi’n tin; numei naupang chuh, dangka sekel sawma tat theih hi’n a,

⁶Chun, tha khat apat kum nga nuoi lam mi ahih chun, na guot dân ding chuh pasal chuh dangka sekel nga a tat theih hi’n a, numei nausen chuh dangka sekel thuma tat theih hi’n a.

⁷Chun pasal kum sawmgup chunglam chuh dangka sekel sawm leh nga a tat theih hi’n tin, numei chuh sekel sawma tat theih hi’n a.

⁸Zie kitiemna neipa chuh, a man kibitukna pie thei lo tienga chagah a hih chun, thiempu kawma puih ding ahi a; tichun, thiempu chun amah hih theih dân bang zelin a man chuh sukniem sak ina.

⁹Chun, kitiemna chuh gancha a hih a, LALPA dinga pawm tâk a hih chun, tawbanga LALPA dinga piek himhim chuh a thiengtho ahi a,

¹⁰A suk zatchuom ding ahi puoh a, apha leh asie, a sie leh apha a then ding ahi puoi. Khutia a then kuol viel chun, gan chuh a nih nih chun thil thiengtho ahih ding ahi.

¹¹Chun, sa thienglo, LALPA kawma lat loh chi ahih chun amah gancha chuh thiempu masanga a hun kaih ding ahi;

¹²Tichun, thiempu chun, a gan chuh a hawih leh hawih loh dungzui in a man chuh bithieh in tin; zie chuh pawm sak hi’n a.

¹³Himahleh, a neipa mah chun a tat nawp chun, a man chuh mun nga a khena mun khat behlap in chaw thei in a.

¹⁴Chun, kuo ahim in a In chuh LALPA dinga a piek dawk chun, thiempu’n a man ding chuh, a In hawih leh hawih loh dungzui in bithieh in tin, zie chuh set hi’n a.

¹⁵A In piedawkpa chun a tat nawp chun, a man chuh mun nga a khena mun khat piek behlap in chaw kit thei intin, a neipa diktak kawma piekkit hi’n a.

¹⁶Chun, mi khatin a goluoh, a gam huntieng LALPA dinga a lat ding chun aman na bithieh dân ding chuh achi tuhlut dân dungzui hi’n tin, buhmanpawl homer khat mun chuh dangka sekel sawmnga a na hisap ding ahi.

¹⁷Chun, a lo chuh Jubili kum apat a lat a hih chun, a man chuh a bukima zawk ding ahi.

¹⁸Himahleh, a lo chuh Jubili nunga a piek a hih le vang, thiempu’n a man chuh Jubili kum tun kitna ding kum dungzui zelin bithieh sak in tin; a man kiemna ding chu le seh sak ina.

¹⁹A piedawkpa mah chun a tat kit nawp taktak chun, mun ngaa khena mun khat a piek behlap ding ahi a, tichun, amah a hizing ta’n a.

²⁰Himahleh, lo chuh a tat nawp loh ahim, midang kawma a zawk ahim ahih chun tat kit theih hita puo’n a.

²¹Himahleh, Jubili kum a a pawt kit tieng leh, lo chuh LALPA chanvo hi’n tin, thiempute chang un au.

²²Kuon le, a gam hilo, lo a châwk thawh chuh LALPA kawma a piek dawk chun,

²³thiempu chun a man ding chuh Jubili kum tun kit chana ding chun bithieh sak intin, a man chuh zie ni mah mah a chuh a piek thâk ding ahi; a dangka chuh LALPA chanvo hi ding ahi.

²⁴Chun, Jubili kum a hungtun kit tieng chuleh, a gam neipa mah chuh chang kit ina.

²⁵Tichun, a man chengcheng chuh mun thiengtho a sekel bang zela bithieh ding ahi a, sekel khat chuh gerah sawmnih hi ding ahi.

²⁶Amahvang chuh, gancha laka pieng masapente chuh LALPA chanvo ahi a, kuoma’n zie chuh amah nawp thu a thillat in a pie dinguh ahi puoi: bâwngno hileh, belamno hileh LALPA chanvo ahi ngâl a.

²⁷Gancha thiengtho lo a hih chun, aman na bithiehna chunga mun nga a khen a mun khat piek a tat theih hi’n a. A tat kit loh chun, mi dangte kawmah man bithieh bangin zawk theih hi’n a.

²⁸Amahvang chuh, mi’n bangmah thutiem nei lo a, LALPA kawma mihing ahim, gancha ahim, gam ahim a piek thak chun, zawk ding leh tat kit ding ahi puoi.LALPA a dinga thil kilân dawk taphawt chuh thil zek thiengtho ahi ngâla.

²⁹Mihing le, bangmah thutiem um lo a sukmang ding a piek thâk chuh, tat kit ding ei puoh a, thah tei ding ahi.

³⁰Gamsung a sawma-khat chengcheng, lo a thai gah hi henla, thinggah hita leh abawn in LALPA chanvo ahi a, LALPA dinga thilzek thiengtho ahi.

³¹Mi’n a sawma-khat laka bang hileh a tat kit nawp chun, a man bithiehna chungah mun ngaa hawp a mun khat piek behlap in a chaw ding ahi.

³²Bâwng leh belam guol lak ale sawma-khat ding chuh ganchinna mawlh nuoia lut, a sawm na zel chuh LALPA chanvo thiengtho ahi.

³³Asiet leh aphat a etchil ding ahi puoh a, a then viel ding le ahi puoi; a then hâm hâm chun a nih in a thenna chu tawh thil thiengtho hi’n tin, tat kit theih hi puo’n a, ti’n a gena.

³⁴Zie haw hi LALPA’n Sinai tânga Mosi kawma Israel chate dinga thupiek a piek chuh ahi.