Read Gangte THIEMPUDANTE 3 Bible Online

THIEMPUDANTE 3 - Gangte bible

THIEMPUDANTE 3

¹Chun, a thillat chuh chamna thillat kithawihna ahih a bâwngguol lak apat a lat chun, anu hileh achal hileh LALPA ma ah demna bei a lat ding ahi.

²A thillat lu chung achun a khut nga’n tin, kikhawp khâwmna puon-In kawtkhak bul ah that intin; Aron suon thiempute chun thisan chuh maichâm ning cheng achun a theh viel dinguh ahi.

³Chun, chamna thillat kithawihna a LALPA dinga mei thillat lân intin; asungthau leh a giltuom thau chengcheng leh,

⁴a kalte nih tawh a thau, alap leh a thin dida chuh LALPA dinga an thillat in a piek ding ahi.

⁵Zie chuh, Aron chapate chun hâlmang thilpiek chu tawh maichâm a thing chunga chuh a hâl dinguh ahi; zie chuh LALPA dinga gimlim tak, mei a thillat ahi.

⁶Chamna thillat kithawihna a LALPA dinga thillat chuh belam guol lak apat ahih chun, anu hi’n achal hileh demna bei a lat ding ahi.

⁷A thillat chuh, belamno a hih chun, LALPA ma ah hun chawi intin,

⁸a thillat lu chung achun a khut nga’n tin, kihona puon-In mai ah that intin; chun, Aron chapate chun, maichâm chuh thisan a chuh a theh viel dinguh ahi.

⁹Tichun, chamna thillat kithawihna a LALPA dinga mei a thillat lân intin, a thau haw, a meia thau, a kawngguh chan in la vek intin; a sung thaute, a gil tuom thau cheng chengte

¹⁰a kal nih leh a tuom thau, a chenem leh a thin tuom dida cheng chuh suohdawk ding ahi.

¹¹Zie chuh thiempu’n maichâm a a hâl ding ahi a, LALPA dinga mei thillat hiding ahi.

¹²A thillat chuh kelcha a hih chun, LALPA masanga a hun kaih ding ahi a;

¹³a lu chung achun a khut nga’n tin, kihona puon-In mah ah that intin, chun, Aron chapate chun a thisan chuh maichâm a a theh viel dinguh ahi.

¹⁴Chun, zie a a thillat chuh lân intin, LALPA dinga mei a thillat chuh asungthau leh a gil a bek thau chengcheng,

¹⁵a kalte nih leh a tuom thau, a lap leh a thin tuom dida puma suohdawk ding ahi.

¹⁶Zie chuh, thiempu’n maichâm achun hâl intin, zie chuh LALPA dinga gimlim mei thillat chuh ahi; a thau chengcheng chuh LALPA chanvo ahi.

¹⁷Gancha chuh athau ahim, a thisan ahim chuh na nek loh dinguh ahi, tih thu hi na suonteu tiengin, na umna taphawt u ah akhang akhang a na zuih dinguh ahi.