Read Gangte THIEMPUDANTE 4 Bible Online

THIEMPUDANTE 4 - Gangte bible

THIEMPUDANTE 4

¹Chun, LALPA’n Mosi a hopih a,

²Israel chate chuh hopih in la, LALPA’n hih loh dinga thu a piek te lak ahin, abang hileh mi khat in hetloh ziekin ana hih khapalh taleh:

³A gilopen chuh, thau nuh thiempu a hih a, mipi thiemloh chansak thei ahih khelh chun a gitloh thawihna ding chun, bâwngchal dem umlo, LALPA kawma a lat ding ahi.

⁴Bâwngchal chuh kikhawp khâwmna puon-In kawtkhak bul achun hun kai intin, bâwngchal lu chung achun a khut nga’n tin, LALPA masanga bâwngchal chuh a thah ding ahi;

⁵Tichun, thau nuh thiempu chun bâwngchal thisan chuh huntieng la’n, kikhawp khawmna puon-In a chuh a chawih ding ahi.

⁶Thiempu chun thisan achun a khutzung dieh intin; Mun thiengtho puonzak mai chuh sagih vei a theh ding ahi.

⁷Chun, thiempu chun LALPA ma ah kikhawp khâwmna puon-In a gimlim hâlna maichâm kihaw achun thisan chuh neukhat tât intin; a dang cheng chuh, kikhawp khâwmna puon-In kawtkhak kienga hâlmanga kithawihna maichâm bula chuh a sunthâk ding ahi.

⁸Zie gitloh thawihna bâwngchal thau chengcheng chuh la vek intin,

⁹asungthau leh, a kal nih leh a tuom thau leh, alap tawh a thin tawh, zie chuh a kal nih tawh a suohdawk ding ahi.

¹⁰a thin tuom dida chu tawh kichamna thillat bâwngchal a kila bangin suohdawk vek intin, chun, thiempu chun hâlmang kithawihna maichâm a chuh a hâl ding ahi.

¹¹Himahleh, a vun, a sa, a luchang, a keng leh a sunghaw chuh a êk haw pum in la’n tin,

¹²pawlama mun thiengtho, vut kibuokna sek achun chawi intin, taka chuh meia a hâl tum ding ahi.

¹³Gitlohna hih chuh Israel mi pumpi a hih a, tup mawng hilo hiela, LALPA dân ka na bawhsie tau hi, ti a gilo a hung kisak u a,

¹⁴a gitlohnau ahung kihet het chuleh, mipite chun a gitloh uh thawihna dinga chuh, bâwng tuoi khat a hun kaih dinguh ahi. LALPA umna puon-In achun hun kai untin,

¹⁵mipi laka upate chun LALPA ma ah bâwng lu chung achun a khut uh ngau untin, LALPA ma a chuh a thah dinguh ahi.

¹⁶Thau nuh thiempu chun thisan chuh bang zat ahim kikhawp khâwmna puon-In a chun hun chawi intin;

¹⁷thisan achun a khutzung dieh intin, LALPA masanga puonzak chuh sagih vei a theh ding ahi.

¹⁸Chun, thisan huntieng chuh, puon-In sunga gimlim hâlna maichâm ki achun tât intin, a dang cheng chuh kikhawp khâwmna puon-In kawma hâlmang thillat maichâm bula chuh a sunthâk ding ahi.

¹⁹A thau cheng chuh la’n tin, maichâm chunga a hâl ding ahi.

²⁰Gitloh thawihna bâwngchal a hih guol mah khan, zie bâwngchal chunga hile ahih ding ahi, zie tawbang hin mipite gitloh thawihna chuh siem sak intin, tichun, ngaihdam hi’nau.

²¹Chun, bâwngchal sa chuh daikieng ah pawdawk intin, bâwngchal masa a hâl guol mah khan, a hâl ding ahi a, zie chuh mipite dinga gitloh thawihna ahi.

²²Lawiupa khat chun, LALPA a Pathien in hih loh ding a thu a piek haw laka khawipen hile a bawhsiet a, mawhchansak a hih thu hetsak ahih a;

²³a thilhih chuh gitloh a hih hetsak ahih chun, kêlchal dem umlo khat, a kithawihna dinga a hun kaih ding ahi.

²⁴Chun, kêlchal lu chung achun a khut nga’n tin, maichâm mâllam panga hâlmang thilpiek a latnau muna chuh a thah ding ahi. Zie chuh gitloh thawihna chu ahi.

²⁵Tichun, thiempu chun, gitloh thawihna thisan chuh a khutzung in neu khat la’n tin, hâlmang thillat maichâm kihaw achun tât intin; hâlmang thillat maichâm bula chuh a thisan chu a buokthâk ding ahi.

²⁶A thau cheng chuh, kichamna sathau a hâl bang khan maichâm a chuh a hâl ding ahi: zie guol hin thiempu’n kithawihna siem sak intin, tichun, ngaihdam hi’n a.

²⁷Chun, mi vantâng laka khatin, tup loh hiela LALPA’n hih loh ding ti a thupiek a bawhsiet a, mawh a chan tâk chun,

²⁸a thilhih gitloh chuh hetdawk ahih tieng leh, a gitloh thawihna ding chun kelnu, dem umlo ahun kaih ding ahi.

²⁹Chun, gitloh thawihna lu chung achun a khut nga’n tin, gitloh thawihna chuh hâlmang thillatna mun achu a thah ding ahi.

³⁰Tichun, thiempu chun thisan chuh a khutzung in la’n tin, hâlmang thillatna maichâm kihaw a chuh a tât ding ahi a, a dang cheng chuh hâlmang thillatna maichâm bula chuh a sunthak ding ahi.

³¹Chun, thiempu chun, a thau cheng chuh kichamna thillat thau a lak guol khan ladawk vek intin, maichâm a a hâl ding ahi. Tichun, thiempu’n tatna siem sak intin, ngaihdam hi’n a.

³²Chun, gitloh thawihna thillat dinga belamno ahun chawih chun, anu, demna bei hiding ahi.

³³Chun, gitloh thawihna lu chung achun a khut nga’n tin, hâlmang thillat a thah nau mun achu a thah ding ahi.

³⁴Chun, thiempu chun gitloh thawihna gan thisan chuh a khutzung in khenkhat la’n tin hâlmang maichâm kihaw achun tât intin; a thisan dang cheng chuh maichâm bula chuh a sunthak ding ahi.

³⁵Chun, a thau cheng chuh, belamno thau, chamna thillat kithawihna a lak guol khan ladawk vek intin, LALPA dinga mei thillat kha tawh a hâl khawm vek ding ahi. Zie tawbang chun thiempu’n kithawihna siem sak intin, a gitlohna chuh ngaihdam hi’n a.