Read Gangte THIEMPUDANTE 5 Bible Online

THIEMPUDANTE 5 - Gangte bible

THIEMPUDANTE 5

¹Ziehaw ziek hin gitloh kithawihna lat ding ahi: Kuole, a thil muh leh hette gen dinga vaihawmna In a sapa a um a, a muh dân leh a hetdante gen dawk lo a a um chun, a gitlohna mawh chuh puo’n a.

²Chun, kuo’nle, sakhuo dân a thil thienglo himhim, gamsa thienglo thi ahim, in gan thienglo thi ahim, a bawk a vak thawh chi ganhing thienglo thisa heloa a khawih khakpalh chun, a thilhih a kihetdawk apat chun a thienglo hi’n tin, thiemloh chang ina.

³Chun, kuo’nle, mihing a thil thienglote a sukkhak chun, helo a a sukkhak hilele, a kihetdawk apat chun a buok hi’n tin, thiemloh chang ina.

⁴Kuo ahim khatin, pilvanglo taka kihâksielna a neih a, thil bang ahim khat chunga a kihâksiel chun, a thilhih chuh a hihkhiel hi tih a kihetdawk apat chun thiemloh chang hi’n a.

⁵Chun, hiti hi hi’n tin, zie thil haw a khat pên pên a hile thiemloh ahun chan chun, a gitlohna chuh phuong in tin,

⁶Gitloh thawihna dingin belam guol laka anu, belamno ahim kel ahim a thilhihkhelh man ding chun LALPA kawma lân dingin a gitloh thawihna chuh hun chawiin tin; thiempu’n kichamna siem sak ina.

⁷Belamno a neih zawh loh a ahih leh, LALPA kawma lat dingin a gitloh man ding chun a bawhsiet thawihna dingin vakhu nih ahim vapalno nih ahim a hun chawih ding ahi; khat chuh gitloh thawihna ding hi’n tin khat chuh hâlmang kithawihna ding hi’n a.

⁸Tichun, thiempu kawmah hun chawi intin, amah chun, gitloh thawihna chuh lân masa’n tin, a ngâwng chuh tanpai lo in ât intin,

⁹a thisan chuh maichâm pang achun theh intin, a dang cheng chuh maichâm bula chuh a vatkang sak ding ahi. Zie chuh gitloh thawihna chuh ahi;

¹⁰Chun, a nihna chuh dân dungzui takin hâlmang kithawihna’n lân ina. Zie guol hin thiempu’n gitloh thawihna siem sak intin, tichun, ngaihdam hi’n a.

¹¹Amahvang chuh mi’n vakhu nih ahim, vapal nih ahim le a piek theih loh chun, a gitloh thawihna ding chun changbuongnel ephah mun sawm a khen mun khat chawi intin, sathau ahim, gimlim ahim, a chunga a kawih ding ahi puoi, a ziek chuh, an thillat a kithawihna ahi puoh a, gitloh thawihna ahih ziekin.

¹²Thiempu kawmah hun chawi intin, tichun, amah chun, LALPA kawma latsa ei tai tih etsakna dingin a khut dim in ham intin, mei thillat bangin maichâm chungah hâl ina. Zie chuh gitloh thawihna dinga thillat chuh ahi.

¹³Chun, zie thil haw laka a khat pên pên chunga a hihkhelh chungchâng achun, thiempu’n kichamna siem sak in tin, ngaihdam hi’n a; a um nalai cheng chuh changbuong thillat bangin thiempu chanvo ding ahi.

¹⁴LALPA’n Mosi kawmah zie dante hi a pie a:

¹⁵Kuo’n le, thil a hihkhelh a, LALPA thil thiengthote chunga a gitloh khakpalh chun, a gitloh thawihna dingin belam guol laka belamchal, demna bei, mun thiengtho sekel tawbang dangka sekel bang zah ahim tawh kigûn a ngaih bawhsiet thawihna LALPA a ding a ahun kaih ding ahi.

¹⁶Chun, thil thiengtho chunga ana hihkhelhna chuh din intin, amun nga a khen mun khat beh in tin, thiempu a piek ding ahi. Thiempu chun gitloh thawihna belamchal chun kichamna siem sak intin, ngaihdam hi’n a.

¹⁷Kuo’n le, thil a hihkhelh a, hih loh dinga LALPA’n thu a piekte helo a ana hih khâk chun, he kilele thiemloh chang himhim in tin, a gitloh man chuh a muh ding ahi.

¹⁸Chun, belam guol laka belamchal, demna bei, bawhsiet thawihna ding thiempu kawma chuh a hun kaih ding ahi. Helo a a hihkhelh khakpalh chungthu achun thiempu chun kithawihna siem sak intin, tichun, ngaihdam hi’n a.

¹⁹Ziehi LALPA dân bawhsie a, gitlohna zieka ditthuk kitna kithawihna thillat dân chu ahi.