Read Gangte THIEMPUDANTE 6 Bible Online

THIEMPUDANTE 6 - Gangte bible

THIEMPUDANTE 6

¹LALPA’n Mosi kawmah thu haw hi a gena:

²Kuon le thil hihkhiel in LALPA thu bawhsie taleh, sum vawpsak thu ahim, lepbawl thu ahim, gukchak thu ahim a a invengte thêm in, a invengte lepbawl ta leh,

³ahihloh leh thilmang mu henla, ka mu puoi ti’n kihâksiel ta leh, zie thil haw hih a khawipen hile a hihkhelh chun, ti a a kihâksiel chun,

⁴Hiti hi hi’n tin, a gitloh ngeia, thiemloh a chan chun, a thilgûkte, lepchieh a a thil lak te, a kawma sum vawp sakte leh thilmang a muh te,

⁵zuou thu a a kihâksielna thil haw cheng chuh a ditkit ding ahi; a kim in din kit vek intin, a mun nga a khena mun khat chuh a piek beh ding ahi a; gitloh thawihna a bawl ni chuleh a neipa chuh a piekkit ding ahi.

⁶A sukkhelh thawihna ding in LALPA âng ah belamchal, demna bei a belam hawn laka kipat, kiphutawk a a ngaih a hun kaih ding ahi; bawhsiet kithawihna ding thiempu kawma a hun kaih ding ahi.

⁷Chun, thiempu chun LALPA ma ah kichamna siem sak intin, thiemloh channa dinga a hihkhelh haw cheng chuh ngaihdam hi’n a, ti’n.

⁸Chun, LALPA’n Mosi a hopih a,

⁹Zie hâlmang kithawih na dânte hi Aron leh a chapate kawmah gen ah. Ziehi hâlmang thillat dân ding chu ahi; hâlmang thillat chuh maichâm chung achun zan khuo’n a zing chanin um intin, chun maichâm a mei chuh a mitloh ding ahi.

¹⁰Chun, thiempu chuh patngatpuon silhlechen in kivan intin, a sapum khuhna dingin patngatpuon pheika cheng intin; chun, maichâm a hâlmang thillat kângvam haw chuh la’n tin, maichâm sika a kawih ding ahi.

¹¹Chun, a silhlechen chuh suoh tha’n tin, van dangin kivan intin, avut vam haw chuh dai pawlam munthieng ah pawdawk ina.

¹²Chun, maichâm chunga mei chuh tihkuong zing hi’n tin, a mit loh ding ahi. Thiempu chun zingkal cheng leh a chung achun thing kawih intin, hâlmang thillat chuh a chung achun phatak in kawih intin, chun, chamna thillat thau chuh a hâl ding ahi.

¹³Maichâm chunga mei chuh kuong zing intin, a mit loh ding ahi.

¹⁴Chun, ziehi changbuong thillat dân ding chuh ahi: Aron chapate chun maichâm bul a LALPA masanga a lat dinguh ahi.

¹⁵Chun, ama’n a khut khat dim in an thillat a changbuong nêl tak leh sathau leh an thillat chunga begaw chengcheng chuh ladawk in tin, LALPA dinga gimlim tak, hetzing na dinga maichâm a a hâl ding ahi.

¹⁶Chun, a dang cheng chuh Aron leh a chapate’n a nek dinguh ahi; zie chuh mun thiengtho ah chângthâk chawl tello a siem hi’n tin, kihona puon-In maia a nek dinguh ahi.

¹⁷Zie chuh chawl tello ding ahi, mei a ka thillat amau chanvo dinga ka piek ahi, zie chuh gitloh thawihna leh bawhsiet thawihna banga thil thiengtho tak ahi.

¹⁸Zie chuh Aron suona pasalte taphawt in a nek ding uh ahi; LALPA a dinga hâlmang thilpiek ahi a; a suon zel teu chana kumkhuo dân hiding ahi; kuole zie sukhata chuh thiengtho ina, ti a thu na piek ding ahi, a ti a.

¹⁹Chun, LALPA’n Mosi a hopih a,

²⁰“Thau nuh a a um niu a Aron leh a chapate’n a lat dinguh thillat chuh ziehi ahi; changbuong an thillat a lat sek ding, changbuong nêl tak ephah mun sawma khena mun khat, zingkal leh a kimkhat, nitâk leh a kimkhat.

²¹Zie chuh, sathau tawh hel in, chângthâk huonna khangbel in kang intin, chuleh, hehphel a, changbuong thillat kithawihna thilpiek a lat ding ahi; zie chuh LALPA dinga gimlim dinga na lat ding ahi.

²²Chun, Aron chapate laka amah thasanga thau nuh thiempu chun la’n intin; kumkhuo a dân dingin LALPA hâlmang a meikhu a zam mang sak ding ahi.

²³Tichun, thiempu dinga an thillat taphawt chuh hâltum vek ding ahi a, nek loh ding ahi,” ti’n. An thillat, thiempu pieka um mawngmawng chuh, nek loh hiel ding ahi, hâltum suok kêi ding ahi.

²⁴Chun, LALPA’n Mosi a hopih a,

²⁵“Aron leh a chapate kawm achun ziehi gitloh thawihna dân ding chuh ahi a, hâlmang thillat kithah sek na achun gitloh thawihna chule LALPA ma a thah ding ahi; zie chuh thil thiengtho tak ahi” ti’n gen in, a ti a.

²⁶Gitloh thawihna siem thiempu chun zie sa chuh a nek ding ahi a, kihona puon-In huongsung a mun thiengtho a chuh a nek ding ahi.

²⁷Kuole, zie kithawihna sa khawih taphawt chuh thil thiengtho ahih ziekin thiengtho in tin, chun, a thisan chuh bang puon hileh a thehkhum khâk chun a behna tâk chuh mun thiengtho a a sawp ding ahi.

²⁸Chun, asa kihuonna leibel taphawt chule sukkêk ngêi ngêi ding ahi a, sumeng bela huon a hih le chuh, tuia sawpa nawt ngim kei ding ahi.

²⁹Chun, kuo hita leh, thiempu suona pasal taphawt chun kithawihna sa chuh a ne thei dinguh ahi; zie chuh thillat thiengtho tak chuh ahi.

³⁰Himahleh, gitloh thawihna thisan chuh kichamna dinga kihona puon-In a chawihlut ahih chun, a sa chuh nek loh ding ahi a, mei a hâltum ding ahi.