Read Gangte THIEMPUDANTE 7 Bible Online

THIEMPUDANTE 7 - Gangte bible

THIEMPUDANTE 7

¹Chun, ziehaw hi, gitloh thawihna thillat dân ding chuh ahi: thil thiengtho pên ahi.

²Zie kithawihna dinga gancha kimang chuh, maichâm mâllam panga, hâlmanga kithawihna gan kithahna muna chuh thah ding ahi a, a thisan chun maichâm chuh theh viel ding ahi.

³Chun, a thau chengcheng, a mei bul thau leh alap,

⁴a kal leh, a kal a bek thau chengcheng leh, a thin tuom dida a kalte nih pum in suohdawk in tin,

⁵Chun, thiempu chun LALPA a dinga mei a thillat dingin maichâm a hâla, meikhu a a zam mang sak ding ahi. Zie chuh gitloh thawihna ahi.

⁶Thiempu suona pasal taphawt in zie chuh ne thei untin, amahvang chuh, thil thiengtho a hih ziekin, mun thiengtho a a nek dinguh ahi.

⁷Chun, bawhsiet thawihna chuh gitloh kithawihna tawbang mah ahi a, a dân khat ahi; zie a kichamna siem thiempu chuh zie chuh a chan ding ahi.

⁸Thiempu, mi kuole hâlmang thillat a latsak pa thiempu ngêi chun, hâlmang thillat a a lat vun chuh a chan vek ding ahi.

⁹Chun, an thillat himhim, a kan thawh hi henla, bela huon thawh hileh meia kihaihmin thawh hileh, thiempu, Pathien kawma kithawihna lân pên chuh a chan ding ahi.

¹⁰Himahlele, an thillat kihuon thawh taphawt chuh, Aron suon, thiempute chanvo hi’n tin, chan kibang chieta a kihawp dinguh ahi.

¹¹Chun, ziehaw hi, chamna thillat te, LALPA kawma piek dân dingte chuh ahi:

¹²Kipah thugenna thillat ahih chun, thau a mêk chawl tello, chângthâk pan haw leh changbuong nêl tak, thau a guntaka kimek a lat tel ding ahi.

¹³Kipahthu genna a chamna thillat kithawihna achun chângthâk chawl kihel a lat tel ding ahi.

¹⁴Chun, zie apat chun thillat tina LALPA dinga pei thillat dingin khat chiet la’n intin, chamna thisana thehpa thiempu chan ding ahi.

¹⁵Chun, a kipahthu genna ding a a chamna thillat kithawihna sa chuh, thillat a lat ni mah mah a nek zawh ding ahi a, a zing chana bangmah sit loh ding ahi.

¹⁶Amahvang chuh, a thillat kithawihna chuh thutiem ahim, mah utthu a thillat ahim ahih chun, a kithawihna a kilân chuh ani mah mah a nek zawh ding ahi a;

¹⁷amahvang chuh, kithawihna sa aval um nalai chuh ni thum ni chuleh hâl tum ding ahi.

¹⁸A chamna thillat kithawihna sa chuh ni thum ni chana a nek u chun, pawm sak hi puou intin, a lânpa chule a lân a ngaih hi diek puo’n a; thil kihdak-um hi’n tin, kuole, a ne ta’n, a mawh kipuok ina.

¹⁹Chun, a sa thil thienglo tawh kisukha himhim chuh nêk loh ding ahi a, hâltum ding ahi. Chun, a sa dang um nalai chuh a thiengtho taphawt chuh nek ding ahi.

²⁰Chamna thillat kithawihna sa, LALPA chanvo, thiengtho lo puma ne vang chuh a chipihte lak apat satthak a um ding ahi.

²¹“Chun, kuo’n le, thil kihdak-um, mi thiengtho lo ahim, gancha thienglo ahim, thil thienglo himhim a khawih a, chamna thillat kithawihna sa, LALPA chanvo a nek chun, amah chuh a chipihte lak akipat a satthak hi ding ahi, ti’n Aron leh a chapate chuh hilh in,” ti’n.

²²LALPA’n zie dante hi Mosi kawmah,

²³Israel chate zuih dingin a pie a: bâwng thaute, kel thau te, leh belam thau ahim chuh nek ding ahi puoi.

²⁴Ganhing thikam ahim, gamsa thah ahim chule a thau nek ding ahi puoi, thil dang banga him khat achun vang mat theih hi’n a.

²⁵Kuole, LALPA kawma mei a thillat sathau ne taphawt chuh, a chipihte lak apat satthak a um ding ahi.

²⁶Na umna phawt u ah, khawitak hitaleh, thisan himhim, gamsa thisan ahim, vacha thisan ahim chuh na nek loh dinguh ahi.

²⁷Kuole, thisan ne mawngmawng chuh a chipihte lak apat satthak a um ding ahi, ti’n Israel chate hopih in, ti’n.

²⁸LALPA’n zie dante hi

²⁹Israel chate zuih dingin Mosi kawmah a pie a: Kuo’n le, kichamna thillat a piek chun, a thilpiek laka huntieng chuh LALPA kawma chamna thillat a piek ding ahi a,

³⁰An thillat banga amah khut ngeia a hun chawih ding ahi. A thau leh a awmpheh chuh LALPA kawma pei thillat dinga pei ahih theih na dingin.

³¹A thau chuh thiempu’n maichâm achun hâl intin, himahleh, a awmpheh vang chuh Aron leh a chapate chanvo hi ding ahi.

³²Amal changlam chuh kichamna thillat kithawihna a pei thillat dingin thiempu na piek dinguh ahi.

³³Aron chapate laka chamna thillat thisan leh thau ana lân pên chun, a mal changlam a chan ding ahi.

³⁴A âwm leh a mal a pei sek u chuh, thilpiek chuom mawngmawng ahi a, a mal changlam vang chuh Israel mipite lak apat a thiempu chanvo ding a LALPA’n a phut chuh ahi. Hun hung tung zel ding ale Israel chate’n thiempute kawma a piek zel dinguh ahi.

³⁵Zie hi LALPA a dinga thiempu na sem ding Aron leh a chapate thau nuh ahih niu akipat LALPA a dinga mei thillat apat a chanvo dinguh chuh ahi.

³⁶Zie hi thau nuh ahih niu apat a Israel chate’n a piek ding u a LALPA’n thu a piek Israel chate’n akhang akhang a a zuih dingu chuh ahi.

³⁷Ziehaw chengcheng hi hâlmanga thilpiek, changbuong thilpiek, gitloh thawihna, sukkhelh kithawihna, namdetna kithawihna leh kichamna kithawihna dân haw chuh ahi.

³⁸LALPA’n thaleka Sinai tânga a thugen, Israel mipite’n LALPA kawma thilpiek a piek ding dân uh ti a, thu a piek ni a a gen haw chuh ahi.